Delhi: ఢిల్లీ అసెంబ్లీ ఎన్నికల నేపథ్యంలో రాజధానిలో రాజకీయ వేడి తారస్థాయికి చేరుకుంది. అధికార ఆమ్ ఆద్మీ పార్టీ (AAP), భారతీయ జనతా పార్టీ (BJP), కాంగ్రెస్ (Congress) నేతలు పరస్పరం తీవ్ర ఆరోపణలు చేసుకుంటున్నారు.
హర్యానా ప్రభుత్వం సరఫరా చేస్తున్న నీటిలో విషం కలుపుతోంది (Yamuna Poisoning) అంటూ మాజీ సీఎం, ఆమ్ ఆద్మీ పార్టీ జాతీయ కన్వీనర్ అరవింద్ కేజ్రీవాల్ (Arvind Kejriwal) సంచలన ఆరోపణలు చేశారు. ఈ వ్యాఖ్యలు తీవ్ర వివాదానికి దారి తీసినట్లు, హర్యానా ప్రభుత్వం పేర్కొంది.
హర్యానా మంత్రి విపుల్ గోయల్ (Vipul Goyal) ప్రకటన ప్రకారం, కేజ్రీవాల్ పై చట్టపరమైన చర్యలు తీసుకోనున్నట్లు స్పష్టం చేశారు. కేజ్రీవాల్ అనవసరమైన భయాందోళనలు కలిగించే విధంగా బాధ్యతారహిత వ్యాఖ్యలు చేశారని, దీంతో హర్యానా, ఢిల్లీ ప్రజల్లో గందరగోళం ఏర్పడిందని అన్నారు. సోనిపట్‌లోని చీఫ్ జ్యుడీషియల్ కోర్టులో డిజాస్టర్ మేనేజ్‌మెంట్ సెక్షన్ల కింద కేసు నమోదు చేయనున్నట్లు హర్యానా అధికారులు వెల్లడించారు.
కేజ్రీవాల్, భగవంత్ మాన్ తీవ్ర ఆరోపణలు
సోమవారం అరవింద్ కేజ్రీవాల్, పంజాబ్ సీఎం భగవంత్ మాన్ (Bhagwant Mann) సంయుక్తంగా హర్యానా ప్రభుత్వం నీటిని కలుషితం చేస్తోందని, దీని వల్ల ఢిల్లీలో సామూహిక మరణాల ప్రమాదం ఉందని సంచలన వ్యాఖ్యలు చేశారు. హర్యానా ప్రభుత్వం పంపుతున్న కలుషిత నీటిని నిలిపివేయాల్సిన పరిస్థితి రావొచ్చని హెచ్చరించారు.
పరువు నష్టం దావా హెచ్చరిక
ఈ ఆరోపణలను త్రిప్పి పారేసిన హర్యానా సీఎం నాయబ్ సింగ్ సైనీ, ఎంపీ ధరంవీర్ సింగ్, ఇతర నేతలు కేజ్రీవాల్‌పై మండిపడ్డారు. తమ ప్రభుత్వాన్ని అపవాదులకు గురిచేసేలా ఆరోపణలు చేశారని, కేజ్రీవాల్‌పై పరువు నష్టం దావా వేస్తామని హెచ్చరించారు.
“ఈ ఆరోపణలు హర్యానా ప్రజల మనోభావాలను దెబ్బతీశాయి,” అని హర్యానా ఎంపీ ధరంవీర్ సింగ్ (Dharamveer Singh) అన్నారు.
కేజ్రీవాల్ ఆరోపణలపై ఆధారాలు సమర్పించాలన్న ఈసీ
కేజ్రీవాల్ చేసిన ఆరోపణలను నిర్ధారించేందుకు ఆధారాలు చూపాలని భారత ఎన్నికల సంఘం (Election Commission of India – ECI) ఆయనను ఆదేశించింది. యమునా నీటిలో కలిసిన విషపదార్థాల వివరాలు, రసాయన స్వభావాన్ని బుధవారం రాత్రి 8 గంటల్లోగా సమర్పించాలని ఒక లేఖ ద్వారా స్పష్టంగా తెలిపింది.
ఈ ఆరోపణలతో ఢిల్లీ ఎన్నికలకు ముందు హర్యానా-ఆమ్ ఆద్మీ పార్టీ మధ్య రాజకీయ విభేదాలు మరింత ముదిరే సూచనలు కనిపిస్తున్నాయి.