Target Mavo Ganapati: మావోయిస్టు పార్టీని నిర్మూలించే లక్ష్యంతో కొనసాగుతున్న ఆపరేషన్ ‘కగార్’ కొత్త పంథాలో ముందుకు సాగుతోంది. ‘బ్లాక్ ఫారెస్ట్’ పేరుతో భద్రతా బలగాలు అగ్రనేతలైన గణపతి, హిడ్మాలను టార్గెట్ చేస్తూ అడవుల్లో వేట మొదలుపెట్టాయి. నంబాల కేశవరావు మృతి తర్వాత మావోయిస్టు పార్టీలో అనూహ్య మార్పులు చోటుచేసుకున్నాయి. భద్రతా బలగాలు అగ్రనేతలపై దృష్టి సారించి వ్యూహాలు రచిస్తున్నాయని గుర్తించిన నక్సలైట్లు నేషనల్ పార్క్‌లో తలదాచుకుంటున్నారు. 2026 మార్చి 31 నాటికి మావోయిస్టు ఉద్యమాన్ని సమూలంగా అంతం చేయాలనే లక్ష్యంతో కేంద్రం విస్తృత కార్యాచరణ చేపట్టింది. ఆపరేషన్ ‘కగార్’పై ఒత్తిళ్లు రాగా, ‘బ్లాక్ ఫారెస్ట్’ రహస్యంగా కొనసాగుతోంది. మోస్ట్ వాంటెడ్ PLGA చీఫ్ హిడ్మా కోసం అదనపు బలగాలను మోహరించారు.
గణపతి, హిడ్మా, దేవాలను లక్ష్యంగా మరో ఆపరేషన్ జరుగుతోంది. బీజాపూర్‌లోని దండకారణ్యం నేషనల్ పార్క్‌లో 25 వేల బలగాలు మోహరించగా, పోలీసు బలగాలు పూర్తి ఆధిపత్యం సాధించాయి. బస్తర్ రేంజ్ ఐజీ సుందర్ రాజ్ ఈ క్రమంలోనే సంచలన వ్యాఖ్యలు చేశారు. “లొంగిపోండి, లేదా ఎన్‌కౌంటర్‌లో చనిపోతారు” అంటూ హెచ్చరించారు. ఈ కూంబింగ్‌పై పౌర హక్కుల సంఘాలు ఆందోళన వ్యక్తం చేస్తూ, ఆపరేషన్‌ను ఆపాలని డిమాండ్ చేస్తున్నాయి.
ముప్పాళ్ల లక్ష్మణరావు అలియాస్ గణపతి నేతృత్వంలో మావోయిస్టు పార్టీ విస్తరించింది. నిధుల సేకరణ, ఆధునిక ఆయుధాల సమీకరణ, ప్రజల ఆలోచనలకు అనుగుణంగా విధానాల రూపకల్పనలో గణపతి వ్యూహాలు కీలకం. హింసకు వ్యతిరేకమైన గణపతి, పీపుల్స్ వార్ గ్రూప్‌ను మావోయిస్టు కమ్యూనిస్టు సెంటర్‌లో విలీనం చేశారు. 13 రాష్ట్రాల్లో అనేక కేసులతో నిందితుడైన గణపతిని జాతీయ దర్యాప్తు సంస్థలు వెంబడిస్తున్నాయి. 45 ఏళ్లుగా దండకారణ్యంలో సమాంతర ప్రభుత్వం నడిపిన గణపతిని టార్గెట్ చేసినట్లు సమాచారం.
Also Read: Indira canteen: ఇందిరమ్మ క్యాంటీన్లలో ఆరోగ్యకర అల్పాహారం… కేవలం రూ.5కే!
కేంద్ర హోంమంత్రి అమిత్ షా వర్షాకాలంలోనూ మావోయిస్టుల ఏరివేత కొనసాగుతుందని స్పష్టం చేశారు. ‘వర్షాకాలం విశ్రాంతి సమయం కాదు, నక్సలైట్లకు నిద్రలేని రాత్రులు ఇస్తాం’ అని దృఢంగా చెప్పారు. నక్సలిజం నిర్మూలనకు సమగ్ర వ్యూహంతో బలగాలను ముమ్మరం చేస్తామని, అభివృద్ధి కార్యక్రమాల ద్వారా స్థానికులను మావోయిస్టుల ప్రభావం నుంచి దూరం చేస్తామని పేర్కొన్నారు. లొంగిపోయి అభివృద్ధిలో భాగస్వాములు కావాలని, లేకుంటే కఠిన చర్యలు తప్పవని హెచ్చరించారు.
దండకారణ్యంలో ఆపరేషన్ బ్లాక్ ఫారెస్ట్ మావోయిస్టు నాయకత్వాన్ని కూల్చే దిశగా సాగుతోంది. గణపతి, హిడ్మా వంటి నేతలపై దృష్టి సారించిన భద్రతా బలగాలు, 2026 నాటికి ఉద్యమాన్ని అంతం చేయాలనే లక్ష్యంతో ఉన్నాయి. పౌర హక్కుల సంఘాల ఆందోళనల నడుమ, ఈ ఆపరేషన్ ఎటువైపు సాగుతుందన్నది ఆసక్తికరంగా మారింది.