Pawan Kalyan: ఆంధ్రప్రదేశ్ రాజకీయాలు రసవత్తరంగా మారుతున్నాయి. ఒకవైపు వైసీపీ నాయకులు తాము చేసిన తప్పుల కారణంగా చట్టపరమైన చర్యలను ఎదుర్కొంటూ జైలు గోడల మధ్య శిక్షను అనుభవిస్తున్నారు. మరోవైపు, వారు ఈ విషయాన్ని పక్కనపెట్టి, తాము మళ్లీ అధికారంలోకి వస్తే కూటమి నాయకులపై ప్రతీకారం తీర్చుకుంటామని బెదిరింపులకు దిగుతున్నారు. ఈ నేపథ్యంలో ఏపీ డిప్యూటీ సీఎం, జనసేన అధినేత పవన్ కల్యాణ్ వైసీపీ నాయకులకు గట్టి కౌంటర్ ఇచ్చారు. వైసీపీ బెదిరింపులకు తాము ఎట్టి పరిస్థితిలోనూ భయపడబోమని, 2029లో వైసీపీ అధికారంలోకి ఎలా వస్తుందో మేమూ చూస్తామని సవాల్ విసిరారు.
ప్రకాశం జిల్లాలో జలజీవన్ మిషన్ పథకం కింద నీటి సరఫరా ప్రాజెక్టు పనులకు శంకుస్థాపన చేసిన సందర్భంలో పవన్ ఈ సంచలన వ్యాఖ్యలు చేశారు. వైసీపీ గతంలో ప్రజలను, ప్రతిపక్ష నాయకులను భయపెట్టే ప్రయత్నం చేసిందని, అయినా తాము ఆ ఒత్తిడిని తట్టుకొని ఈ స్థాయికి చేరామన్నారు పవన్. మళ్లీ అధికారంలోకి వస్తామని, మీ అంతు చూస్తామని బెదిరిస్తున్న వైసీపీ నాయకులకు… ముందు అది ఎలా సాధ్యమవుతుందో తామూ చూస్తామని పవన్ తనదైన శైలిలో వ్యాఖ్యానించారు. వైసీపీ రౌడీయిజం, గూండాయిజంతో రాష్ట్రాన్ని గత ఐదేళ్లలో గడగడలాడించిందని, అందుకే ప్రజలు వారిని చిత్తుగా ఓడించి పదకొండో నంబర్‌ దగ్గర కూర్చోబెట్టారని ఆయన గుర్తు చేశారు.
పవన్ కల్యాణ్ వ్యాఖ్యలు కేవలం రాజకీయ ఆరోపణలకే పరిమితం కాలేదు. ఆయన తన పనితీరుతోనూ రాష్ట్రంలో మంచి మార్కులు కొట్టేస్తున్నారు. గత వైసీపీ ప్రభుత్వంలో నిర్విరామంగా మూలన పడిన జలజీవన్ మిషన్ పథకాన్ని పవన్ తన నాయకత్వంలో తిరిగి పట్టాలెక్కించారు. కేంద్ర ప్రభుత్వంతో సమన్వయం చేసి, గడువు ముగిసిన ఈ పథకానికి నిధులు సమకూర్చి, ప్రకాశం జిల్లాలోని గ్రామాలకు తాగునీరు అందించేందుకు 1290 కోట్ల రూపాయల ప్రాజెక్టును ప్రారంభించారు. ఈ ప్రాజెక్టులో సగం నిధులు కేంద్రం, మిగిలినవి రాష్ట్రం భరిస్తున్నాయి. గతంలో వైసీపీ ప్రభుత్వం కేంద్రం నిధులిచ్చే పథకాలను నిర్లక్ష్యం చేసిందని, దీనివల్ల రాష్ట్రంలో లక్షల కోట్ల రూపాయల ప్రాజెక్టులు నిలిచిపోయాయని పవన్ ఆరోపించారు.
Also Read: Donald Trump: ట్రంప్ ‘వన్‌ బిగ్‌ బ్యూటిఫుల్‌ బిల్’పై ఆమోదముద్ర.. అమెరికా ఆర్థిక విధానంలో కొత్త శకం
Pawan Kalyan: ఈ మధ్య కాలంలో పవన్ రాజకీయ శైలి ఆసక్తికరంగా ఉంటోంది. ఆయన ఏ నిర్ణయం తీసుకున్నా, ఏ వ్యాఖ్య చేసినా దాని వెనుక లోతైన ఆలోచన కనబడుతోంది. వైసీపీపై ఆయన చేస్తున్న విమర్శలు కేవలం రాజకీయ కస్సుబుస్సు కోసం కాదని, రాష్ట్ర ప్రజలకు మేలు చేయాలనే లక్ష్యంతోనే అని స్పష్టమవుతోంది. తనకు ఎవరిపైనా వ్యక్తిగత కక్షలు లేవనీ…. కానీ, రౌడీయిజం, గూండాయిజంతో ప్రజలను బెదిరించే వారిని మాత్రం వదిలిపెట్టనని పవన్ తేల్చి చెప్పారు. ఈ వ్యాఖ్యలతో ఆయన వైసీపీ నాయకులకు గట్టి సందేశం ఇచ్చారు. మరోవైపు, కూటమి ప్రభుత్వంలో డిప్యూటీ సీఎంగా పవన్ చేస్తున్న కృషి అందరి దృష్టినీ ఆకర్షిస్తోంది. ఆయన చంద్రబాబు నాయకత్వాన్ని ప్రశంసిస్తూ, కూటమి ఐక్యతకు భంగం కలగకుండా జాగ్రత్తలు తీసుకుంటున్నారు. కేంద్రంతో సమన్వయం, రాష్ట్ర ప్రజలకు మేలు చేసే పథకాల అమలు, వైసీపీ రాజకీయ బెదిరింపులకు చెక్ పెట్టడం… ఇవన్నీ పవన్ రాజకీయ వ్యూహంలో భాగమని అర్థమవుతోంది. వైసీపీ మళ్లీ అధికారంలోకి రాకుండా చేయడమే తన లక్ష్యమని ఆయన స్పష్టం చేశారు.
వైసీపీ నాయకులు పవన్ వ్యాఖ్యలకు ఎలా స్పందిస్తారు? పవన్ వ్యూహం వెనుక దీర్ఘకాలిక రాజకీయ లక్ష్యం ఉందా? నాలుగేళ్ల తర్వాత రాష్ట్ర రాజకీయ చిత్రం ఎలా ఉంటుంది? ఈ ప్రశ్నలకు సమాధానం భవిష్యత్తులోనే తెలుస్తుంది. అయితే, ప్రస్తుతానికి పవన్ కల్యాణ్ తన పనితీరు, స్పష్టమైన వైఖరితో రాష్ట్ర ప్రజల మనసు గెలుచుకుంటున్నారు.