Asia Cup Trophy Controversy: ఆసియా కప్ 2025 ఫైనల్‌లో భారత్ పాకిస్థాన్‌పై అద్భుత విజయాన్ని సాధించినా, ఆ గెలుపు కంటే ఎక్కువగా ఇప్పుడు దేశాల మధ్య “ట్రోఫీ వివాదం” చర్చనీయాంశమైంది. భారత జట్టు ట్రోఫీని స్వీకరించడానికి నిరాకరించడం, పీసీబీ చైర్మన్ మొహ్సిన్ నఖ్వీ ట్రోఫీని అబుదాబికి తరలించడం ఈ రెండు సంఘటనలు ఆసియా కప్ విజయాన్ని రాజకీయ, దౌత్య పరమైన ఉద్రిక్తతల మధ్య ఇరుక్కోబెట్టాయి.
విజయానందంలో కలకలం
సూర్యకుమార్ యాదవ్ నేతృత్వంలోని భారత జట్టు ఆసియా కప్ 2025లో అద్భుత ప్రదర్శన చేసి పాకిస్థాన్‌పై విజయం సాధించింది. అయితే ఫైనల్ తర్వాత ట్రోఫీని పాకిస్థాన్ హోంమంత్రి మరియు పీసీబీ చైర్మన్ మొహ్సిన్ నఖ్వీ చేతుల మీదుగా స్వీకరించమన్న ప్రతిపాదనను టీమ్‌ ఇండియా నిరాకరించింది. దీంతో కార్యక్రమం గందరగోళంగా మారింది. తరువాత ట్రోఫీని ఏసీసీ (Asian Cricket Council) ఆఫీసులో ఉంచారు. కానీ ఇప్పుడు ట్రోఫీ అక్కడ లేకుండా పోయిందనే సమాచారం వెలువడింది.
అబుదాబికి తరలించిన నఖ్వీ?
జియో న్యూస్ నివేదిక ప్రకారం, పీసీబీ చైర్మన్ మొహ్సిన్ నఖ్వీ ఆ ట్రోఫీని అబుదాబిలోని ఒక రహస్య ప్రదేశానికి తరలించారని సమాచారం. బీసీసీఐ అధికారి ఇటీవల ఏసీసీ ఆఫీసును సందర్శించి ట్రోఫీ గురించి అడగగా, “నఖ్వీ సర్ దగ్గరే ఉంది” అని సిబ్బంది సమాధానమిచ్చారట.
ఇది కూడా చదవండి: Cricket: విరాట్ కోహ్లీ రిటైర్మెంట్‌పై ఊహాగానాలు… గవాస్కర్ క్లారిటీ ఇచ్చారు!
భారత్ తరఫున అధికారిక లేఖ పంపి ట్రోఫీని అప్పగించమని కోరినా, నఖ్వీ మాత్రం “భారత ఆటగాడు స్వయంగా వచ్చి స్వీకరించాలి లేదా ప్రత్యేక కార్యక్రమంలో పాల్గొనాలి” అని షరతు పెట్టారని తెలుస్తోంది.
క్రికెట్‌లోకి వచ్చిన రాజకీయ ఉద్రిక్తత
ఇది కేవలం క్రికెట్ వివాదం కాదు ఇది భారత్-పాకిస్థాన్ రాజకీయ ఉద్రిక్తతల ప్రతిబింబం. కశ్మీర్‌లోని పహల్గామ్ ఉగ్రదాడి తర్వాత ఇరు దేశాలు మొదటిసారి ఒకరినొకరు ఎదుర్కొన్న టోర్నమెంట్ ఇది. ఫైనల్ సమయంలో పాకిస్థాన్ ఆటగాళ్లు తుపాకీ కాల్పులు, విమానం కూల్చడం వంటి అనుచిత సంకేతాలు చేస్తే, సూర్యకుమార్ యాదవ్ మాత్రం విజయాన్ని భారత సైన్యానికి అంకితం చేశారు.
ట్రోఫీ ఇప్పుడు ఎక్కడుంది?
ఏసీసీ కార్యాలయం నుండి ట్రోఫీ మాయమైన తర్వాత, దాని స్థానం రహస్యంగా మారింది. పీసీబీ చైర్మన్ “ట్రోఫీ నా ఆధీనంలో ఉంది” అని చెప్పినా, ఏసీసీ లేదా ఐసీసీ మాత్రం ఇప్పటి వరకు ఎటువంటి అధికారిక ప్రకటన చేయలేదు. క్రికెట్ అభిమానుల్లో ఇప్పుడు ఒక్క ప్రశ్నే “ఆసియా కప్ ట్రోఫీ నిజంగా ఎక్కడుంది?”