CM Chandrababu: ఆంధ్రప్రదేశ్ ముఖ్యమంత్రి నారా చంద్రబాబు నాయుడు రాష్ట్ర భవిష్యత్తుకు సంబంధించి పలు కీలక ప్రకటనలు చేశారు. గ్రీన్ హైడ్రోజన్ సదస్సులో పాల్గొన్న సీఎం, రాష్ట్రంలో ఇంధన రంగంలో విప్లవాత్మక మార్పులు తీసుకురావాలనే తన ఆకాంక్షను వెలిబుచ్చారు. పర్యావరణ పరిరక్షణ, తక్కువ ఖర్చుతో హరిత విద్యుత్ ఉత్పత్తి లక్ష్యంగా రాష్ట్ర ప్రభుత్వం పనిచేస్తుందని ఆయన స్పష్టం చేశారు.
గ్రీన్ హైడ్రోజన్‌కు అత్యధిక ప్రాధాన్యం:
గ్లోబల్ వార్మింగ్ నేపథ్యంలో గ్రీన్ హైడ్రోజన్‌కు ప్రాధాన్యత పెరిగిందని, దీనికి కేంద్ర ప్రభుత్వం కూడా అధిక ప్రాధాన్యం ఇస్తోందని సీఎం చంద్రబాబు అన్నారు. 500 గిగావాట్ల హరిత విద్యుత్ ఉత్పత్తి చేయాలని ప్రధాని నరేంద్ర మోదీ లక్ష్యంగా పెట్టుకున్నారని, దీనిపై నీతి ఆయోగ్ కూడా దృష్టి సారించిందని ఆయన గుర్తు చేశారు. ఆంధ్రప్రదేశ్ సౌర, పవన, పంప్డ్ ఎనర్జీ, సుదీర్ఘ తీరప్రాంతం వంటి అపారమైన వనరులను కలిగి ఉందని, ఇవి ఇతర ఏ రాష్ట్రానికీ లేవని సీఎం పేర్కొన్నారు. ఈ వనరులను సద్వినియోగం చేసుకొని, రాష్ట్రంలో క్వాంటం వ్యాలీ, హైడ్రోజన్ వ్యాలీలను ఏర్పాటు చేయాలని ఆలోచిస్తున్నామని ఆయన తెలిపారు.
దేశంలోనే తొలిసారిగా 1999లో విద్యుత్ సంస్కరణలను తాను ప్రారంభించానని సీఎం చంద్రబాబు గర్వంగా చెప్పుకున్నారు. నాణ్యమైన విద్యుత్ వినియోగదారులకు అందించాలనే లక్ష్యంతో ఈ సంస్కరణలు చేపట్టానని, అయితే వాటి అమలు కారణంగా అప్పట్లో అధికారం కోల్పోయానని ఆయన గుర్తు చేసుకున్నారు. గతంలో చాలా గ్రామాల్లో కరెంటు సౌకర్యం కూడా ఉండేది కాదని, ఇప్పుడు తక్కువ ఖర్చుతో హరిత విద్యుత్ తయారీ, నిల్వపై దృష్టి సారించామని ఆయన వివరించారు.
Also Read: Mithun Reddy: మిథున్ రెడ్డికి సుప్రీంకోర్టులో చుక్కెదురు, ముందస్తు బెయిల్ పిటిషన్ కొట్టివేత
ఆంధ్రప్రదేశ్ కొత్త ఆవిష్కరణలకు ఎప్పుడూ ముందుంటుందని సీఎం చంద్రబాబు అన్నారు. విద్యుత్ తయారీ సంస్థలు పరిశోధనలు చేసి, ఇంధన రంగంలో సమూల మార్పులు తీసుకురావాలని ఆయన పిలుపునిచ్చారు. ఏపీ ఇలాంటి పరిశోధనలు, ఆవిష్కరణలకు కేంద్ర బిందువు కావాలని ఆయన ఆకాంక్షించారు. గ్రీన్ హైడ్రోజన్ సమ్మిట్‌లో వివిధ కంపెనీల సీఈఓలతో సమావేశమైన సీఎం, వారి ఆలోచనలు వినడానికి, ఆవిష్కరణల గురించి తెలుసుకోవడానికి వచ్చానని తెలిపారు.
అమరావతిలోని ఎస్‌ఆర్‌ఎం యూనివర్సిటీలో జరిగిన ఈ గ్రీన్ హైడ్రోజన్ సమ్మిట్‌లో కేంద్రమంత్రి పెమ్మసాని చంద్రశేఖర్, నీతి ఆయోగ్ సభ్యుడు వి.కె. సారస్వత్, సి.ఎస్. విజయానంద్, ఇంధన రంగానికి చెందిన వివిధ కంపెనీల ప్రతినిధులు హాజరయ్యారు. ఈ సదస్సు గ్రీన్ హైడ్రోజన్ ప్రాధాన్యం, ప్రస్తుతం ఉన్న అవసరాలకు అనుగుణంగా గ్రీన్ హైడ్రోజన్‌తో విద్యుత్ ఉత్పత్తికి ఉన్న అవకాశాలపై లోతైన చర్చకు వేదికైంది.