Allu aravind: టాలీవుడ్ సీనియర్ నిర్మాత అల్లు అరవింద్ తనపై వస్తున్న ట్రోలింగ్‌కు స్పందించారు. ఇటీవల ఓ ఈవెంట్‌లో తాను రామ్ చరణ్ స్థాయిని తగ్గించేలా మాట్లాడానంటూ వచ్చిన విమర్శలపై ఆయన వివరణ ఇచ్చారు. తాను ఉద్దేశపూర్వకంగా చరణ్ గురించి ఏమీ అనలేదని స్పష్టం చేశారు.
ఈ విషయమై అల్లు అరవింద్ మాట్లాడుతూ— *”నన్ను రామ్ చరణ్ స్థాయిని తగ్గించేలా మాట్లాడానని ట్రోల్ చేస్తున్నారు. కానీ, అది నిజం కాదు. కొద్ది రోజుల క్రితం ఓ సీనియర్ జర్నలిస్టు ఇదే అంశంపై నన్ను ప్రశ్నించారు. అప్పటి పరిస్థితి అనుకూలంగా లేకపోవడంతో ‘తగిన సమయంలో మాట్లాడతాను’ అని చెప్పాను. కానీ ఇప్పుడు పబ్లిక్‌గా చెప్పదలుచుకున్నది ఒక్కటే— నా మాటలను తప్పుగా అర్థం చేసుకున్నారు.
ఆ రోజున దిల్ రాజును వేదికపై ఆహ్వానిస్తూ, ఆయన గత కొన్ని రోజులుగా ఇన్‌కమ్ ట్యాక్స్ వ్యవహారాలతో కష్టాలు ఎదుర్కొంటున్నారని చెప్పే క్రమంలో కొన్ని మాటలు వచ్చాయి. కానీ అవి నా మనసులోని ఉద్దేశ్యాన్ని ప్రతిబింబించేలా కాదు. ఆ మాటలు మెగా అభిమానులను బాధించాయనుకోచ్చు. అందుకు నేను బాధపడ్డాను.
చరణ్ నా కొడుకులాంటివాడు. అతడు నాకున్న ఏకైక మేనల్లుడు, నేను అతనికున్న ఏకైక మేనమామ. మా మధ్య బంధం ఎంతో అద్భుతమైనది. ఆ రోజున ఆ మాటలు చెప్పాల్సిన అవసరం లేకుండా ఉండి ఉంటే బాగుండేది. కానీ, దిల్ రాజు పరిస్థితిని వివరించేందుకు మాత్రమే నేను అలా చెప్పాల్సి వచ్చింది. దయచేసి ఈ విషయాన్ని ఇక వదిలేయండి”* అని అల్లు అరవింద్ అన్నారు.
అల్లు అరవింద్ ఈ వివరణ ఇచ్చిన నేపథ్యంలో మెగా అభిమానులు దీనిని అర్థం చేసుకొని, ఈ విషయాన్ని కొనసాగించకుండా వదిలేయడం మంచిదని సినీ వర్గాలు భావిస్తున్నాయి.