DK Shivakumar: కర్ణాటక రాజకీయాల్లో గత కొంతకాలంగా ఉత్కంఠ రేపిన నాయకత్వ మార్పు అంశానికి ఎట్టకేలకు ఉపముఖ్యమంత్రి డీకే శివకుమార్ (డీకేఎస్) స్పష్టమైన ప్రకటనతో ముగింపు పలికారు. ముఖ్యమంత్రి పదవిని రెండున్నరేళ్ల తర్వాత డీకే శివకుమార్‌కు అప్పగిస్తారనే ఊహాగానాలు జోరందుకున్న నేపథ్యంలో, డీకేఎస్ స్వయంగా జోక్యం చేసుకుని ఆ ప్రచారానికి తెర దించారు.
కర్ణాటకలో కాంగ్రెస్ ప్రభుత్వం ఏర్పడి రెండున్నర సంవత్సరాలు పూర్తయిన సందర్భంగా, అధికార పంపిణీ (Power Sharing) ఒప్పందం అమలులోకి వస్తుందనే ప్రచారం జరిగింది. ముఖ్యమంత్రి సిద్ధరామయ్య వర్గం, ఉపముఖ్యమంత్రి డీకే శివకుమార్ వర్గం మధ్య సీఎం పదవి కోసం తీవ్రమైన అంతర్గత రాజకీయాలు నడుస్తున్నట్లు వార్తలు వచ్చాయి. దీనికి బలం చేకూర్చినట్లుగా, ఇరు వర్గాలకు చెందిన ఎమ్మెల్యేలు ఇటీవల ఢిల్లీ వెళ్లి పార్టీ హైకమాండ్‌ను కలిశారు. డీకే శివకుమార్‌కు సీఎం పగ్గాలు ఇవ్వాలని ఆయన మద్దతుదారులు డిమాండ్ చేసినట్లు కూడా సమాచారం.
Also Read: Nara Bhuvaneshwari: ఉచిత బస్సు టికెట్ పొందిన నారా భువనేశ్వరి
అయితే, ఈ రాజకీయ వేడికి ఉపశమనం కల్పిస్తూ డీకే శివకుమార్ శుక్రవారం తన అధికారిక ‘ఎక్స్’ (X – గతంలో ట్విట్టర్) ఖాతాలో ఒక పోస్ట్ చేశారు. ఐదేళ్లూ ముఖ్యమంత్రిగా సిద్ధరామయ్యే కొనసాగుతారని ఆయన ప్రకటించారు. ముఖ్యమంత్రిగా కొనసాగుతున్నందుకు సిద్ధరామయ్యకు అభినందనలు తెలుపుతూ, తామంతా ఆయనకు పూర్తి సహకారం అందిస్తామని స్పష్టం చేశారు.
మొత్తం 140 మంది శాసనసభ్యులు నా ఎమ్మెల్యేలే. గ్రూపులు కట్టడం నా రక్తంలోనే లేదు అని డీకే శివకుమార్ తన పోస్ట్‌లో పేర్కొన్నారు. ఎమ్మెల్యేలు మంత్రి పదవుల కోసం లేదా ఇతర విషయాల కోసం ఢిల్లీ వెళ్లి హైకమాండ్‌ను కలవడం వారి హక్కు అని, దానిని తాము అడ్డుకోలేమని తెలిపారు. తాము ఏ విషయంలోనైనా హైకమాండ్ ఆదేశాలకు కట్టుబడి ఉంటామని డీకేఎస్ స్పష్టం చేశారు. ఈ ప్రకటనతో కర్ణాటక కాంగ్రెస్ పాలిటిక్స్‌లో నెలకొన్న అనిశ్చితికి, ఎమ్మెల్యేల వర్గపోరుకు తాత్కాలికంగా ముగింపు పడినట్లయింది.
మంత్రివర్గ విస్తరణకు సన్నాహాలు
ఒకవైపు నాయకత్వ మార్పు ప్రచారం ఆగిపోగా, మరోవైపు ముఖ్యమంత్రి సిద్ధరామయ్య మంత్రివర్గ పునర్వ్యవస్థీకరణపై దృష్టి సారించారు. క్యాబినెట్‌లో మార్పులు చేయడం ద్వారా అసంతృప్తిగా ఉన్న ఎమ్మెల్యేలను బుజ్జగించాలని ఆయన భావిస్తున్నారు. ఈ విషయంలో కాంగ్రెస్ హైకమాండ్ నుంచి కూడా ఆయనకు అంగీకారం లభించినట్లు తెలుస్తోంది.