Andessri: తెలంగాణ రాష్ట్ర గీతం ‘జయ జయహే తెలంగాణ’ రచయిత, ప్రజాకవి, రచయిత డాక్టర్ అందెశ్రీ (64) ఇక లేరు. హైదరాబాద్‌లోని లాలాగూడలో నివసిస్తున్న ఆయన రాత్రి ఇంట్లోనే అకస్మాత్తుగా కుప్పకూలి పడిపోయారు. కుటుంబ సభ్యులు వెంటనే గాంధీ ఆసుపత్రికి తరలించగా, వైద్యులు ఆయనను పరీక్షించి ఉదయం 7:25 గంటలకు మరణించినట్లు ప్రకటించారు.
1961 జూలై 18న వరంగల్ జిల్లా రేబర్తి గ్రామంలో జన్మించిన అందెశ్రీ అసలు పేరు ‘అందె ఎల్లయ్య’. చిన్నతనంలో గొర్రెల కాపరిగా, తరువాత భవన నిర్మాణ కూలీగా పనిచేశారు. కానీ కవిత్వంపై ఉన్న ఆసక్తి ఆయనను సాహితీ ప్రపంచంలో ప్రత్యేక స్థానానికి చేర్చింది. విద్యా అవకాశాలు లేకున్నా, తన అనుభవాలను పద్యాలుగా మలిచి ప్రజల మనసులను తాకగలిగారు.
తెలంగాణ రాష్ట్ర సాధన ఉద్యమంలో అందెశ్రీ కవిత్వం ప్రజల్లో ఉత్సాహాన్ని నింపింది. ఆయన రచించిన ‘జయ జయహే తెలంగాణ’ గీతం ఉద్యమానికి ప్రతీకగా నిలిచి, తరువాత రాష్ట్ర అధికారిక గీతంగా మారింది. ‘మాయమైపోతున్నడమ్మా మనిషన్నవాడు’ వంటి పాటలు ఆయనకు ప్రజల్లో అమోఘమైన గుర్తింపును తెచ్చిపెట్టాయి. అందెశ్రీ రచనలు ప్రజల జీవన గాధలను ప్రతిబింబించాయి.
ఆయనకు తెలుగు సాహిత్యరంగంలో అనేక పురస్కారాలు లభించాయి.
* 2006లో ‘గంగ’ సినిమాకు నంది పురస్కారం
* 2014లో అకాడమీ ఆఫ్ యూనివర్సల్ గ్లోబల్ పీస్ డాక్టరేట్
* 2015లో దాశరథి సాహితీ పురస్కారం, రావూరి భరద్వాజ సాహితీ పురస్కారం
* 2022లో జానకమ్మ జాతీయ పురస్కారం
* 2024లో దాశరథి కృష్ణమాచార్య సాహితీ పురస్కారం, లోక్‌నాయక్ పురస్కారం
* కాకతీయ యూనివర్సిటీ నుంచి గౌరవ డాక్టరేట్ కూడా అందుకున్నారు.
ఇటీవల తెలంగాణ ప్రభుత్వం ఆయనకు రూ. 1 కోటి పురస్కారం ప్రదానం చేసింది.
Also Read: Andhra Pradesh: ఆంధ్రప్రదేశ్‌లో డ్రైవింగ్‌ శిక్షణ కేంద్రాలు.. ఇక డ్రైవింగ్‌ టెస్ట్‌ అవసరం లేదు
కుటుంబం
అందెశ్రీకి ముగ్గురు కుమార్తెలు, ఒక కుమారుడు ఉన్నారు. సాధారణ జీవితం గడిపినా, ఆయన రాసిన కవిత్వం అసాధారణంగా మారి ప్రజల హృదయాల్లో నిలిచిపోయింది.
అందెశ్రీ మృతి పట్ల తెలుగు రాష్ట్రాల రాజకీయ నాయకులు, అభిమానులు తీవ్ర విచారం వ్యక్తం చేశారు.
ఆంధ్రప్రదేశ్ ముఖ్యమంత్రి నారా చంద్రబాబు నాయుడు మాట్లాడుతూ –ప్రజాకవి అందెశ్రీ గారి మృతి పట్ల నా ప్రగాఢ సంతాపం తెలియజేస్తున్నాను. మాయమైపోతున్నడమ్మా మనిషన్నవాడు వంటి అర్థవంతమైన పాటలతో ప్రజల హృదయాల్లో నిలిచిపోయిన ఆయన సాహిత్యానికి అందించిన సేవలు చిరస్మరణీయమైనవి.
టీడీపీ జాతీయ ప్రధాన కార్యదర్శి నారా లోకేష్ కూడా స్పందించారు.
తెలంగాణ రాష్ట్ర గీత రచయిత అందెశ్రీ మరణం తెలుగు సాహిత్యానికి తీరని లోటు. ఆయన కవిత్వం ఎల్లప్పుడూ ఉద్యమ స్ఫూర్తికి ప్రతీకగా నిలుస్తుంది. కుటుంబ సభ్యులకు నా హృదయపూర్వక సానుభూతి.”
తెలంగాణ సాహితీ లోకంలో ఒక వెలుగు చీకటిలో కలిసిపోయింది. కానీ ప్రజల గుండెల్లో ఆయన పద్యాలు, గీతాలు శాశ్వతంగా ప్రతిధ్వనిస్తూనే ఉంటాయి.