Cyclone Montha: బంగాళాఖాతంలో ఏర్పడిన తీవ్ర మొంథా తుపాను కారణంగా రైలు ప్రయాణాలపై తీవ్ర ప్రభావం పడింది. కోస్తా ప్రాంత జిల్లాలకు తుపాను ముప్పు పొంచి ఉన్న నేపథ్యంలో, ప్రయాణికుల భద్రతను దృష్టిలో ఉంచుకుని రైల్వేశాఖ ముందస్తు చర్యలు చేపట్టింది. మంగళవారం, బుధవారాల్లో నడవాల్సిన మొత్తం 107 రైలు సర్వీసులను రద్దు చేస్తున్నట్లు దక్షిణ మధ్య రైల్వే (SCR) ప్రకటించింది.
మొత్తం రద్దైన 107 రైళ్లలో, మంగళవారం (ఈ రోజు) నడవాల్సిన 70 రైళ్లు, బుధవారం నడవాల్సిన 36 రైళ్లు, అలాగే గురువారం బయలుదేరాల్సిన ఒక రైలు కూడా ఉన్నాయి. హైదరాబాద్, చెన్నై, బెంగళూరు, భువనేశ్వర్ వంటి ప్రధాన నగరాల నుంచి విజయవాడ, విశాఖపట్నం, రాజమహేంద్రవరం, గుంటూరు, కాకినాడ మీదుగా రాకపోకలు సాగించే పలు ముఖ్యమైన ఎక్స్‌ప్రెస్, ప్యాసింజర్ రైళ్లు ఈ రద్దు చేసిన జాబితాలో ఉన్నాయి.
వీటితో పాటు, తెనాలి, రేపల్లె, మార్కాపురం, మచిలీపట్నం, నర్సాపురం, నిడదవోలు, ఒంగోలు, భీమవరం, మాచర్ల వంటి ప్రాంతాల నుంచి ప్రారంభమయ్యే రైళ్లను కూడా రద్దు చేశారు.
మళ్లింపులు, వేళల్లో మార్పులు: రైళ్ల రద్దుతో పాటు, అధికారులు మరో ఆరు రైళ్లను దారి మళ్లించి నడుపుతున్నారు. అంతేకాక, తుపాను ప్రభావం వల్ల 18 రైళ్ల బయలుదేరే సమయాల్లో మార్పులు చేసినట్లు కూడా రైల్వే అధికారులు తెలిపారు. ఈ మార్పులన్నీ ప్రయాణికులకు ఇబ్బందులు కలగకుండా, భద్రతకు ప్రాధాన్యత ఇస్తూ తీసుకున్న నిర్ణయాలని రైల్వేశాఖ స్పష్టం చేసింది.
Also Read: Arvind Dharmapuri: కవిత ‘జనం బాట’ యాత్రపై ఎంపీ అరవింద్ ఫైర్
ప్రయాణికులకు సమాచారం, సహాయ కేంద్రాలు:
టికెట్ మొత్తం తిరిగి చెల్లింపు: రద్దయిన రైళ్లకు రిజర్వేషన్ చేసుకున్న ప్రయాణికులందరికీ టికెట్ మొత్తం ధరను రైల్వేశాఖ తిరిగి చెల్లించనుంది.
ప్రత్యేక హెల్ప్‌డెస్క్‌ల ఏర్పాటు: ప్రయాణికులకు సమాచారాన్ని అందించడానికి, వారి సందేహాలను నివృత్తి చేయడానికి విజయవాడ డివిజన్‌లోని ప్రధాన రైల్వే స్టేషన్లలో ప్రత్యేక హెల్ప్‌డెస్క్‌లను ఏర్పాటు చేశారు.
హెల్ప్‌ డెస్క్ నంబర్లు:
విజయవాడ- 0866-2575167
నెల్లూరు- 9063347961
ఒంగోలు- 7815909489
బాపట్ల- 7815909329
తెనాలి- 7815909463
ఏలూరు- 7569305268
రాజమహేంద్రవరం- 8331987657
సామర్లకోట- 7382383188
తుని- 7815909479
అనకాపల్లి- 7569305669
భీమవరం- 7815909402
గుడివాడ- 7815909462
అధికారుల సూచన: ప్రయాణికులు తమ రైలు స్థితిని (స్టేటస్) తెలుసుకోవడానికి రైల్వేశాఖ అధికారిక వెబ్‌సైట్ లేదా హెల్ప్‌డెస్క్‌లను సంప్రదించాలని, అత్యవసరమైతే తప్ప ప్రయాణం చేయకుండా ఉండాలని అధికారులు సూచించారు.
మొంథా తుపాను తాజా పరిస్థితి: మరోవైపు, మొంథా తుపాను క్రమంగా తీరానికి చేరువవుతోంది. ఏపీ విపత్తుల నిర్వహణ సంస్థ (APSDMA) అందించిన వివరాల ప్రకారం, ఇది ప్రస్తుతం మచిలీపట్నానికి 160 కి.మీ, కాకినాడకు 240 కి.మీ, విశాఖపట్నానికి 320 కి.మీ దూరంలో కేంద్రీకృతమై ఉంది. కాకినాడ సమీపంలో తీరం దాటే అవకాశం ఉన్నందున, నిజాంపట్నం హార్బర్‌లో 7వ నంబర్, కాకినాడ పోర్టులో 10వ నంబర్ ప్రమాద హెచ్చరికలు జారీ చేశారు. తీరం దాటే సమయంలో గంటకు 90-110 కి.మీ వేగంతో బలమైన ఈదురుగాలులు వీచే అవకాశం ఉందని వాతావరణ శాఖ హెచ్చరించింది.