ఆంధ్రప్రదేశ్ రాజకీయాల్లో మాటల యుద్ధం మళ్లీ ముదురుతోంది. వైసీపీ నేత, మాజీ మంత్రి గుడివాడ అమర్నాథ్ మంత్రి నారా లోకేశ్ పై చేసిన విమర్శలకు టీడీపీ సీనియర్ ఎమ్మెల్యే గోరంట్ల బుచ్చయ్య చౌదరి ఘాటుగా స్పందించారు. “పదే పదే జగన్ పెట్టిన గుడ్డే అంటే గుడ్డు పగిలిపోతుంది” అంటూ ఆయన వ్యంగ్యంగా వ్యాఖ్యానించారు. లోకేశ్ చెప్పినట్టే… “మీకు, జగన్ గారికి అసలు విషయం తెలియదు. ఆవేశపడకుండా గుడ్డే ముద్దు” అంటూ అమర్నాథ్‌కు హెచ్చరిక జారీ చేశారు.
🔹 ఏమి జరిగింది?
గూగుల్ డేటా సెంటర్ విషయంలో టీడీపీ, వైసీపీ మధ్య మాటల యుద్ధం చెలరేగింది. శుక్రవారం మీడియాతో మాట్లాడిన అమర్నాథ్, మంత్రి లోకేశ్‌పై తీవ్రస్థాయిలో విరుచుకుపడ్డారు. “లోకేశ్ నన్ను గుడ్డు అంటే, నేను పప్పు అంటాను. దీని వల్ల ప్రజలకు లాభమేమిటి?” అని ప్రశ్నించారు. అంతేకాకుండా “నేను వెటకారంగా మాట్లాడితే లోకేశ్ ఉరేసుకోవాల్సి వస్తుంది” అని సంచలన వ్యాఖ్య చేశారు.
లోకేశ్‌ను “ట్రోలింగ్‌లో జాతిపిత” అని అభివర్ణించిన ఆయన, “వర్ధంతి, జయంతి మధ్య తేడా కూడా తెలియని మంత్రి” అంటూ ఎద్దేవా చేశారు.
🔹 గూగుల్ డేటా సెంటర్ వివాదం
విశాఖలో గూగుల్ డేటా సెంటర్‌తో 1.8 లక్షల ఉద్యోగాలు వస్తాయని కూటమి ప్రభుత్వం చేస్తున్న ప్రచారంపై అమర్నాథ్ ప్రశ్నల వర్షం కురిపించారు. “ఇది నిజమైతే గూగుల్ సంస్థ అధికారికంగా ప్రెస్ నోట్ విడుదల చేయాలి. అది జరిగితే మేమే ప్రభుత్వానికి సన్మానం చేస్తాం” అని అన్నారు.
అలాగే, “పత్రికల కథనాల ప్రకారం ఈ ప్రాజెక్ట్ వల్ల కేవలం 200 మందికే ఉద్యోగాలు వస్తాయి. నీరు, విద్యుత్, పర్యావరణ అనుమతులపై ప్రభుత్వం ప్రజలకు వివరాలు ఇవ్వాలి” అని డిమాండ్ చేశారు. “నేను కష్టపడి, జగన్ ఆశీర్వాదాలతో ఈ స్థాయికి వచ్చాను. డబ్బులు కట్టి చదువుకోలేదు” అని వ్యాఖ్యానించారు.
🔹 బుచ్చయ్య చౌదరి కౌంటర్
అమర్నాథ్ వ్యాఖ్యలపై గోరంట్ల బుచ్చయ్య చౌదరి సూటిగా సమాధానం ఇచ్చారు. “ప్రతిదీ జగన్ పెట్టిన గుడ్డే అంటే ఒక రోజు అది పగిలిపోతుంది. లోకేశ్ గారు చెప్పినది నిజం – మీకు సబ్జెక్ట్‌ తెలియదు. అసలు విషయం అర్థం చేసుకోకుండా ఆవేశపడొద్దు” అని బుచ్చయ్య చౌదరి గట్టి హెచ్చరిక జారీ చేశారు.