TG News: తెలంగాణ ఇరిగేషన్ శాఖలో పెద్ద ఎత్తున అవకతవకలు జరిగినట్లు ఆరోపణలు రావడంతో ప్రభుత్వం కఠిన చర్యలు చేపట్టింది. ముఖ్యంగా హైదరాబాద్, సంగారెడ్డి సీఈ కార్యాలయాల పరిధిలో ఫిర్యాదులు రావడంతో ఏకంగా 51 మంది ఇంజినీర్లపై బదిలీ వేటు పడింది. వీరిని హైదరాబాద్ నుంచి ఇతర జిల్లాలకు బదిలీ చేస్తూ ఇరిగేషన్ శాఖ ఆదేశాలు జారీ చేసింది.
సీఎం, మంత్రి కార్యాలయాలకు ఫిర్యాదులు
హైదరాబాద్, సంగారెడ్డి చీఫ్ ఇంజినీర్ (CE) కార్యాలయాలపై పెద్దఎత్తున ఫిర్యాదులు అందినట్లు తెలుస్తోంది. ఈ ఫిర్యాదులు నేరుగా ముఖ్యమంత్రి, ఇరిగేషన్ శాఖ మంత్రి కార్యాలయాలకు చేరాయి. ఇరిగేషన్ శాఖ అధికారులు ముడుపులు తీసుకుని చెరువులు, కుంటల పరిధిలో నిర్మాణాలకు అక్రమంగా అనుమతులు (NOCలు) జారీ చేస్తున్నారని ఆరోపణలు వచ్చాయి.
సంచలనం సృష్టించిన కొత్తకుంట చెరువు అక్రమాలు
ఈ ఫిర్యాదుల నేపథ్యంలో కొత్తకుంట చెరువుకు సంబంధించిన ‘నిరభ్యంతర ధృవీకరణ పత్రం’ (NOC) జారీలో జరిగిన అక్రమాలపై జరిపిన విచారణలో సంచలన విషయాలు వెలుగులోకి వచ్చాయి.
ఇది కూడా చదవండి: Balanagar Crime News: అనారోగ్యం తో చిన్న పిల్లలు.. మనస్తాపం చెంది చివరికి పిల్లల్ని చంపి తల్లి ఆత్మహత్య
- అధికార పరిధి దాటి: ఈ చెరువు ‘లేక్‌ డెవలప్‌మెంట్ లిమిట్’ (LDL) పరిధి 8.28 ఎకరాలు ఉండగా, కేవలం 2.03 ఎకరాలుగా తప్పుగా చూపిస్తూ NOC జారీ చేశారు.
- రికార్డులు లేకుండానే: అత్యంత అక్రమంగా, ఎలాంటి అధికారిక ఫైల్ కూడా లేకుండానే ఇంజినీర్లు ఈ NOCని ఇచ్చేసినట్లు విచారణలో తేలింది.
ప్రక్షాళన చర్యలు.. 51 మంది ఇంజినీర్లపై బదిలీ
ప్రధానంగా కొత్తకుంట చెరువు అక్రమాలతో పాటు అనేక చెరువులు, కుంటల పరిధిలో అక్రమ అనుమతులపై వచ్చిన ఫిర్యాదులు నిజమని తేలడంతో, ప్రభుత్వం ఇరిగేషన్ శాఖలో ప్రక్షాళనకు శ్రీకారం చుట్టింది. మంత్రి ఆదేశాల మేరకు అక్రమాలకు పాల్పడినట్లుగా భావిస్తున్న 51 మంది ఇంజినీర్లపై బదిలీ వేటు పడింది. ఈ ఇంజినీర్లను హైదరాబాద్‌తో పాటు కీలక ప్రాంతాల నుంచి ఇతర జిల్లాలకు బదిలీ చేస్తూ ఇరిగేషన్ శాఖ ఉన్నతాధికారులు ఉత్తర్వులు జారీ చేశారు.
ఈ చర్యల ద్వారా ఇరిగేషన్ శాఖలో పారదర్శకతను పెంచాలని, నీటి వనరుల చట్టాలను ఉల్లంఘించే అధికారులపై కఠిన చర్యలు ఉంటాయని ప్రభుత్వం సంకేతాలు పంపినట్లయింది.