West Indies Test Series: వెస్టిండీస్‌తో జరగనున్న టెస్ట్ సిరీస్‌కు భారత జట్టు ఎంపికలో కర్ణాటక ఆటగాడు దేవదత్ పడిక్కల్, తెలుగు కుర్రాడు నితీష్ కుమార్ రెడ్డిల పేర్లను సెలెక్టర్లు పరిశీలిస్తున్నట్లు నివేదికలు చెబుతున్నాయి. ఈ సిరీస్ అక్టోబర్ 2న అహ్మదాబాద్‌లోని నరేంద్ర మోడీ స్టేడియంలో ప్రారంభం కానుంది. పడిక్కల్ ఇటీవలి కాలంలో దేశీయ క్రికెట్‌లో అద్భుతమైన ఫామ్‌ను కనబరిచాడు. ముఖ్యంగా ఆస్ట్రేలియా ‘A’తో జరిగిన అనధికారిక టెస్ట్ మ్యాచ్‌లో భారీ సెంచరీ (150 పరుగులు) సాధించాడు. గతంలో ఇంగ్లాండ్‌పై టెస్ట్ అరంగేట్రం చేసిన పడిక్కల్, తన తొలి ఇన్నింగ్స్‌లోనే 65 పరుగులు చేసి ఆకట్టుకున్నాడు.
ఈ టెస్ట్ సిరీస్‌కు శ్రేయాస్ అయ్యర్ గైర్హాజరీతో మిడిల్ ఆర్డర్ బ్యాటర్ స్థానాన్ని భర్తీ చేయడానికి పడిక్కల్‌ను ప్రధానంగా పరిశీలిస్తున్నారు. ఇక తెలుగు కుర్రాడు నితీష్ కుమార్ రెడ్డి ఒక ఆల్రౌండర్‌గా జట్టుకు ఎంపికయ్యే అవకాశం ఉంది. బ్యాటింగ్‌తో పాటు బౌలింగ్‌లోనూ అతను తన నైపుణ్యాన్ని ప్రదర్శిస్తాడు. గతంలో ఆస్ట్రేలియాపై జరిగిన టెస్ట్ సిరీస్‌లో నితీష్ కుమార్ రెడ్డి అరంగేట్రం చేసి సెంచరీ సాధించాడు. ఒక భారతీయ బ్యాటర్ నెం.8 స్థానంలో బ్యాటింగ్ చేసి సెంచరీ చేసిన మొదటి ఆటగాడిగా చరిత్ర సృష్టించాడు. అతను బౌలింగ్‌లో కూడా వికెట్లు తీసి జట్టుకు ఉపయోగపడ్డాడు.
ఇది కూడా చదవండి: Shahid Afridi: ఫఖర్ జమాన్ ఔట్ పై షాహిద్ అఫ్రిది కీలక కామెంట్స్
ఇక శ్రేయాస్ అయ్యర్ వ్యక్తిగత కారణాల వల్ల రెండో అనధికారిక టెస్టు నుంచి తప్పుకోవడంతో, పడిక్కల్, నితీష్ కుమార్ రెడ్డిల ప్రదర్శనలు సెలెక్టర్లను ఆకట్టుకున్నాయి. ఈ యువ ప్రతిభావంతులు వెస్టిండీస్ సిరీస్‌లో చోటు సంపాదించే అవకాశం ఎక్కువగా ఉంది. ఈ సిరీస్ భారత్-వెస్టిండీస్ మధ్య 2025-27 వరల్డ్ టెస్ట్ ఛాంపియన్షిప్ సైకిల్‌లో భాగంగా జరగనుంది. గత సంవత్సరం న్యూజిలాండ్ చేతిలో 3-0 వైట్‌వాష్ తర్వాత మొదటి స్వదేశీ సిరీస్ ఇదే.