Nara Lokesh: విజయవాడ నగరం ఈ రోజు నుంచి 11 రోజులపాటు పండుగ వాతావరణంలో తేలిపోనుంది.‘విజయవాడ ఉత్సవ్’ ను మాజీ ఉపరాష్ట్రపతి ఎం. వెంకయ్య నాయుడు, రాష్ట్ర ఐటీ & విద్యాశాఖ మంత్రి నారా లోకేశ్ లు కలిసి ఘనంగా ప్రారంభించారు. సొసైటీ ఫర్ వైబ్రంట్ విజయవాడ ఆధ్వర్యంలో నిర్వహిస్తున్న ఈ ఉత్సవాలు నగరానికి కొత్త ఊపును, ప్రత్యేక గుర్తింపును తీసుకురావనున్నాయి.
లోకేశ్ వ్యాఖ్యలు
ఈ సందర్భంగా మంత్రి నారా లోకేశ్ మాట్లాడుతూ.. విజయవాడ చరిత్ర, సంస్కృతి, ఆధ్యాత్మికత సమ్మేళనమని, అలాంటి నేలపై ఇలాంటి వేడుకలు నిర్వహించడం గర్వకారణమని అన్నారు. మాజీ ఉపరాష్ట్రపతి వెంకయ్యనాయుడు తెలుగు భాష అభివృద్ధి కోసం చేసిన కృషి కారణంగానే ఇప్పుడు ప్రభుత్వ ఉత్తర్వులు తెలుగులో జారీ అవుతున్నాయని కృతజ్ఞతలు తెలిపారు. విజయవాడ ఉత్సవాలను మైసూర్ దసరా ఉత్సవాల తరహాలో నిర్వహించాలన్న సంకల్పంతో ప్రభుత్వం ముందుకు వెళ్తోందని చెప్పారు. సెప్టెంబర్ 25న మెగా డీఎస్సీ సభ, అక్టోబర్ 2న 3 వేల మంది కళాకారులతో అతి పెద్ద కార్నివాల్ నిర్వహించనున్నట్లు వెల్లడించారు.
వెంకయ్య నాయుడు సందేశం
ప్రారంభ సభలో వెంకయ్య నాయుడు మాట్లాడుతూ.. విజయవాడ ఉత్సవ్ నగరానికి కొత్త స్ఫూర్తిని, గర్వకారణమైన గుర్తింపును ఇచ్చిందని అన్నారు. తెలుగు భాష, సంప్రదాయ కుటుంబ విలువలు, సంస్కృతిని కాపాడుకోవాల్సిన బాధ్యత అందరిదేనని సూచించారు. సమాజానికి సేవలందించే వ్యక్తులను గుర్తించి సత్కరించడం ఉత్సవాల ముఖ్య ఉద్దేశమని తెలిపారు.
ఇది కూడా చదవండి: Modi: ప్రధాన మంత్రి మోదీ జీఎస్టీ పండుగ ప్రారంభం – అన్ని వర్గాలకు లబ్ధి
ప్రత్యేక ఆకర్షణలు
ఈ ఉత్సవాల సందర్భంగా ప్రజలకు అనేక వినోదాలు, సాహస కార్యక్రమాలు అందుబాటులోకి రానున్నాయి:
-
కార్నివాల్: 3 వేల మంది కళాకారుల ప్రదర్శనలు (సెప్టెంబర్ 28, అక్టోబర్ 2).
-
డ్రోన్ షోలు: ప్రతిరోజూ ఆకాశంలో రంగుల కాంతుల విందు.
-
సాహస కార్యక్రమాలు: పారాగ్లైడింగ్, హెలికాప్టర్ రైడ్స్.
-
సాంస్కృతిక ప్రదర్శనలు: ఆంధ్ర సంప్రదాయ కళారూపాలు, వినోద కార్యక్రమాలు.
ప్రజల ఉత్సాహం
ప్రారంభ రోజునే పున్నమి ఘాట్ వద్ద బాణసంచా ఆకాశాన్ని అలరించగా, పెద్ద సంఖ్యలో ప్రజలు వేడుకల్లో పాల్గొన్నారు. ఇందిరాగాంధీ మున్సిపల్ స్టేడియంలో హెలికాప్టర్ రైడ్‌ను రవాణా మంత్రి ఎం. రాంప్రసాద్ రెడ్డి ప్రారంభించి ప్రజలకు అందుబాటులోకి తెచ్చారు.