devineni uma: జగన్‌పై దేవినేని ఉమా ఘాటు విమర్శలు: అసెంబ్లీకి రాని నేతకు ప్రతిపక్ష హోదా ఎక్కడి నుంచి? టీడీపీ సీనియర్ నేత, మాజీ మంత్రి దేవినేని ఉమామహేశ్వరరావు వైసీపీ అధినేత జగన్‌మోహన్ రెడ్డిపై తీవ్ర వ్యాఖ్యలు చేశారు. అసెంబ్లీకి హాజరుకాకపోయే జగన్‌ను “పిరికిపంద” అంటూ ఎద్దేవా చేసిన ఆయన, ఇటువంటి నేత ప్రతిపక్ష నేతగా ఉండటమే తగదన్నారు. అమరావతిలోని టీడీపీ కార్యాలయంలో నిర్వహించిన మీడియా సమావేశంలో ఆయన ఈ వ్యాఖ్యలు చేశారు. జగన్ తీరు ప్రజాస్వామ్యానికి మచ్చ: బెయిల్‌పై ఉన్న జగన్ చట్ట వ్యవస్థలను, న్యాయ వ్యవస్థను బెదిరించేలా ప్రవర్తిస్తున్నారంటూ ఆరోపించిన ఉమా, ఆయనకు న్యాయవ్యవస్థలపై గౌరవం లేదని విమర్శించారు.
జగన్‌పై ఉన్న కేసుల విచారణను త్వరితగతిన పూర్తి చేయాలని కోరారు. “వైఎస్ హయాంలో పెట్టిన కేసుల కోసమే నేను ఇప్పటికీ కోర్టుల చుట్టూ తిరుగుతున్నాను,” అని ఆయన గుర్తుచేశారు. ఒకే ఏడాదిలో చంద్రబాబు చేసిన అభివృద్ధి: గత ఐదేళ్లలో జగన్ చేయలేని అభివృద్ధిని, చంద్రబాబు ఒక్క ఏడాదిలోనే చేసి చూపించారని ఉమా స్పష్టం చేశారు. “ఒక్క ఛాన్స్” పేరుతో అధికారంలోకి వచ్చి రాష్ట్రాన్ని నాశనం చేశారని, ప్రజలు ఈసారి జగన్ పార్టీని కేవలం 11 సీట్లకు పరిమితం చేయడమే అందుకు నిదర్శనమని అన్నారు.
వైసీపీ కుట్రలపై హెచ్చరిక: ఇప్పటికీ వైసీపీ నేతలు రాజకీయ కుట్రలు పన్నడంలో తేడా లేకుండా కొనసాగుతున్నారని, సింగయ్య శవం ఘటన వంటి దుశ్చర్యలు రాజకీయం చేస్తున్నారని ఉమా ఆరోపించారు. ఇలాంటి కుట్రలు మానుకోకపోతే, ప్రజలే వారిని తీవ్రంగా ఎదిరిస్తారని హెచ్చరించారు.