Nara Lokesh: ఆంధ్రప్రదేశ్‌ విద్య, ఐటీ శాఖల మంత్రి నారా లోకేష్ ప్రస్తుతం రెండు రోజుల పర్యటన నిమిత్తం ఢిల్లీలో బిజీగా ఉన్నారు. కేంద్ర మంత్రులతో పాటు ఉపరాష్ట్రపతి జగదీప్ ధన్‌ఖడ్, బ్రిటన్ మాజీ ప్రధాని టోనీ బ్లెయిర్‌తోనూ ఆయన సమావేశాలు ఏర్పాటు చేసుకోవడం రాజకీయంగా ఆసక్తికర పరిణామాలకే దారితీస్తోంది. ప్రధాని మోదీ రాష్ట్ర పర్యటనకు ముందుగా లోకేష్ ఢిల్లీకి వెళ్లడం కూడా విశేష చర్చనీయాంశంగా మారింది.
బుధవారం (జూన్ 18) షెడ్యూల్:
-
ఉదయం 10:30కి ఉపరాష్ట్రపతి జగదీప్ ధన్‌ఖడ్‌తో భేటీ
-
మధ్యాహ్నం 2 గంటలకు కేంద్ర ఆహార శుద్ధి, పరిశ్రమల శాఖ మంత్రి చిరాగ్ పాసవాన్‌తో సమావేశం
-
సాయంత్రం 4:30కి కేంద్ర విద్యాశాఖ మంత్రి ధర్మేంద్ర ప్రధాన్‌తో భేటీ
-
సాయంత్రం 5:30కి కేంద్ర న్యాయశాఖ మంత్రి అర్జున్ రామ్ మేఘ్‌వాల్‌తో సమావేశం
గురువారం (జూన్ 19) షెడ్యూల్:
-
ఉదయం కేంద్ర కార్మికశాఖ మంత్రి మన్‌సుఖ్ మాండవీయతో భేటీ
-
సాయంత్రం బ్రిటన్ మాజీ ప్రధాని టోనీ బ్లెయిర్‌తో ప్రత్యేక సమావేశం
ఈ సమావేశాల ద్వారా లోకేష్ ఏపీకి సంబంధించిన విద్య, ఉద్యోగాలు, పరిశ్రమల అభివృద్ధికి అవసరమైన సహకారం కోరనున్నట్లు సమాచారం. కేంద్ర మంత్రులతో పాటు టోనీ బ్లెయిర్‌తో భేటీ జరుగుతున్న నేపథ్యం మరింత ఆసక్తి రేపుతోంది. ముఖ్యంగా ఉపరాష్ట్రపతిని కలవడం రాజకీయం కోణంలో విశేష చర్చనీయాంశమైంది. ఇది మర్యాదపూర్వక భేటీగా తెలిసినా… రాజకీయ వర్గాల్లో దీని వెనుక అసలు ఉద్దేశం గురించి చర్చలు ముమ్మరంగా సాగుతున్నాయి.
మోదీతో గత భేటీ జ్ఞాపకం
ఇదే నేపథ్యంలో, మే నెలలో నారా లోకేష్ కుటుంబంతో కలిసి ప్రధాని మోదీతో సమావేశమైన విషయం గుర్తించాల్సిందే. బ్రాహ్మణి, దేవాన్ష్‌లతో కలిసి ప్రధాని నివాసానికి వెళ్లిన లోకేష్ 2 గంటల పాటు మోదీతో మాట్లాడారు. ‘యువగళం’ పాదయాత్ర వివరాలతో కూడిన కాఫీ టేబుల్ బుక్‌ను మోదీ ఆవిష్కరించగా, ప్రత్యేకంగా సంతకం చేసిన పుస్తకాన్ని బహుమతిగా అందించారు. మోదీ వారిని కుటుంబ సమేతంగా ఆత్మీయంగా ఆహ్వానించిన సందర్భం ఇంకా రాజకీయ వర్గాల్లో చర్చనీయాంశంగా నిలిచింది.
రాజకీయ ప్రాధాన్యం
ప్రధాని పర్యటనకు ముందు లోకేష్ ఢిల్లీ పర్యటన, కేంద్రమంత్రులతో కలసి ఏపీ అవసరాలపై చర్చించాలన్న ఉద్దేశమేనన్న భావన ఉన్నా… ఈ పరంపర భేటీలకు లోతైన రాజకీయ లక్ష్యాలున్నాయన్నది రాజకీయ పరిశీలకుల అభిప్రాయం. కేంద్రంతో సంబంధాలు బలోపేతం చేసుకోవాలన్న సంకేతమా? లేకుండా కొత్త ప్రణాళికలకు బీజం వేయడమా? అనే ప్రశ్నలు ఊగేస్తున్నాయి.
మొత్తంగా చూస్తే, ఈ ఢిల్లీ పర్యటనలో నారా లోకేష్ అడుగులు కేవలం మర్యాదపూర్వక భేటీలకే కాదు, భవిష్యత్ రాజకీయ అడుగులకూ దోహదపడేలా ఉన్నాయని స్పష్టంగా కనిపిస్తోంది.