Delhi: పాకిస్థాన్‌కు గూఢచర్యం చేశారన్న ఆరోపణలపై పంజాబ్‌కు చెందిన ప్రముఖ యూట్యూబర్ జస్బీర్ సింగ్‌ను పోలీసులు అరెస్ట్ చేశారు. ‘జాన్‌మహల్ వీడియో’ అనే యూట్యూబ్ ఛానెల్ నిర్వహిస్తున్న జస్బీర్, దేశ భద్రతకు సంబంధించి సున్నితమైన సమాచారం పాకిస్థాన్‌కు చేరవేస్తున్నాడన్న అనుమానంతో జూన్ 4న అరెస్ట్ అయ్యాడు. ఈ అరెస్ట్ దేశం అంతటా విస్తరించి ఉన్న గూఢచర్య ముఠాలపై జరుగుతున్న దర్యాప్తులో కీలక మలుపుగా భావిస్తున్నారు.
విచారణలో వెలుగులోకి వచ్చిన ముఖ్యాంశాలు:
ప్రస్తుతం పోలీసుల కస్టడీలో ఉన్న జస్బీర్‌ను విచారించగా, అతను గతంలో ఆరు సార్లు పాకిస్థాన్‌కు వెళ్లినట్లు తెలిసింది. అతని ఫోన్‌లో సుమారు 150 మంది పాకిస్థానీ నంబర్లు ఉన్నట్లు పోలీసులు గుర్తించారు. అంతేకాక, పాకిస్థాన్ నిఘా సంస్థకు చెందిన ఒక అధికారికి తన ల్యాప్‌టాప్‌ను దాదాపు గంటపాటు ఉపయోగించేందుకు ఇచ్చినట్లు సమాచారం.
గతంలో అరెస్టైన మరో యూట్యూబర్ జ్యోతి మల్హోత్రా కేసులో వెలుగులోకి వచ్చిన గూఢచర్య నెట్‌వర్క్‌తో జస్బీర్‌కు కూడా సంబంధాలున్నట్లు పోలీసుల అనుమానం. ఇస్లామాబాద్‌లోని పాకిస్థాన్ రాయబార కార్యాలయంలో వీసా అధికారిగా పనిచేసిన ఐఎస్ఐ ఏజెంట్ డానిష్ అలియాస్ ఎహసాన్-ఉర్-రెహమాన్‌తో జస్బీర్ నేరుగా సంబంధాల్లో ఉన్నట్లు దర్యాప్తులో వెల్లడైంది.
డానిష్‌తో పరిచయం తన మిత్రురాలిచే ఏర్పడిందని, ఆయన కొరకు కొంతమంది పేర్లపై సిమ్ కార్డులు కూడా తీసి ఇచ్చినట్లు జస్బీర్ మోహాలీ కోర్టులో ఇచ్చిన ప్రకటనలో పేర్కొన్నాడు. జ్యోతి మల్హోత్రా అరెస్ట్ అనంతరం డానిష్ పేరు బయటపడిన తర్వాత, అతన్ని ఢిల్లీ నుంచి వెనక్కు పంపించారు.
జూన్ 8న, మోహాలీ కోర్టు జస్బీర్ సింగ్‌కు పోలీస్ కస్టడీని మరో రెండు రోజుల పాటు పొడిగించింది. జ్యోతి మల్హోత్రాతో అతని సంబంధాలు సన్నిహితంగా ఉన్నాయని, పాకిస్థాన్ నిఘా సంస్థలు మరియు ఆర్మీకి చెందిన వ్యక్తులతో సంబంధాలున్నట్లు పోలీసులు వెల్లడించారు. ఇది ఉగ్రవాద ప్రేరేపిత గూఢచర్య నెట్‌వర్క్‌లో భాగంగా చూస్తున్నారు.
అంతేకాక, 2020, 2021, 2024 సంవత్సరాల్లో పాకిస్థాన్ పర్యటనల సందర్భంగా జస్బీర్ ఐఎస్ఐ అధికారులతో నేరుగా కలసినట్లు విచారణలో తేలింది. లాహోర్‌కు చెందిన పాకిస్థాన్ మాజీ పోలీస్ అధికారి నాసిర్ ధిల్లాన్, జస్బీర్‌ను ఐఎస్ఐ అధికారులకు పరిచయం చేశాడని కూడా సమాచారం.
జస్బీర్ నిర్వహిస్తున్న యూట్యూబ్ ఛానెల్‌కు సుమారు 11 లక్షల మంది సబ్‌స్క్రైబర్లు ఉన్నారు. ఆయన ఆ ఛానెల్‌లో ప్రధానంగా ప్రయాణం, వంటలపై వీడియోలు అప్‌లోడ్ చేస్తూ వచ్చినట్టు గుర్తించారు.