TDP: తెలుగుదేశం పార్టీలోకి కొత్తగా సభ్యులను చేర్చే విషయంలో కఠిన నిబంధనలను రాష్ట్ర పార్టీ ప్రకటించింది. పార్టీ అధినేత, ముఖ్యమంత్రి నారా చంద్రబాబు నాయుడు సూచనల మేరకు ఈ కొత్త మార్గదర్శకాలను రూపొందించినట్లు టీడీపీ రాష్ట్ర అధ్యక్షుడు పల్లా శ్రీనివాసరావు తెలిపారు.
ఇకపై ఎవరినైనా పార్టీలోకి చేర్చే ముందు నిర్దిష్ట విధానాన్ని అనుసరించాల్సి ఉంటుంది. పార్టీలో చేరదలచిన వ్యక్తుల వివరాలను ముందుగా పార్టీ కేంద్ర కార్యాలయానికి తెలియజేయాల్సి ఉంటుంది. వారి వాస్తవిక నేపథ్యం, సామాజిక ప్రతిష్ట, రాజకీయ అనుభవం తదితర అంశాలపై పూర్తిగా పరిశీలించిన తరువాత మాత్రమే పార్టీలోకి ఆహ్వానం ఇవ్వాలనే నిర్ణయాన్ని పార్టీ తీసుకుంది.
ఈ ప్రక్రియలో ఎలాంటి తొందరపాటు నిర్ణయాలు తీసుకోరాదని, ప్రతి చేరిక కూడా పార్టీ నియమావళికి అనుగుణంగా ఉండాలని పల్లా స్పష్టంగా పేర్కొన్నారు. పార్టీ పటిష్టత, పరిపాలనా నైతికతను దృష్టిలో ఉంచుకుని ఈ మార్గదర్శకాలు రూపొందించబడ్డాయని తెలిపారు.
పార్టీలో ఉన్న అన్ని స్థాయిల నాయకులు ఈ మార్గదర్శకాలను గమనించి కచ్చితంగా పాటించాల్సిన అవసరం ఉందని పల్లా శ్రీనివాసరావు పేర్కొన్నారు. ఈ నూతన విధానంతో పార్టీకి చేరేవారి విషయంలో పారదర్శకత పెరుగుతుందని, నిర్ణయాల్లో బాధ్యత కలుగుతుందని పార్టీ వర్గాలు విశ్వాసం వ్యక్తం చేస్తున్నాయి.