Foreigner: భారతదేశ సంస్కృతి, ఆతిథ్యం ప్రపంచవ్యాప్తంగా ఎందరో విదేశీయులను ఆకర్షిస్తుంటాయి. అయితే ఇక్కడి జీవనశైలి, రద్దీని మొదటిసారి చూసినప్పుడు కొందరు కంగారు పడటం కూడా సహజం. ఈ నేపథ్యంలో భారతదేశ పర్యటనకు వచ్చే విదేశీ పర్యాటకులకు, ముఖ్యంగా ఒంటరిగా ప్రయాణించే మహిళలకు (Solo Female Travelers) ఒక విదేశీ ట్రావెలర్ ఇచ్చిన విలువైన సలహాలు నెట్టింట తెగ వైరల్ అవుతున్నాయి. ‘సోలో ఫిమేల్ ట్రావెల్’ అనే ఇన్స్టాగ్రామ్ పేజీలో షేర్ చేసిన ఈ వీడియోలో.. ఆ మహిళ భారత్లో తన ప్రయాణాన్ని ఎంజాయ్ చేస్తూనే, ఇక్కడికి వచ్చే ముందు మానసికంగా ఎలా సిద్ధం కావాలో వివరించారు.
ఇండియా కేవలం ఒక టూరిస్ట్ ప్లేస్ కాదు.. ఒక సరికొత్త అనుభవం..
భారతదేశానికి రావాలనుకునే వారు ప్రధానంగా గుర్తుంచుకోవాల్సిన మూడు కీలక విషయాలను ఆమె పంచుకున్నారు.. భారతదేశం మీ ఆలోచనలను, అంచనాలను పూర్తిగా తారుమారు చేయగలదు. ఇక్కడి రోడ్లపై కనిపించే విపరీతమైన రద్దీ, ట్రాఫిక్, శబ్దాలు, జనాల హడావిడి మొదటిసారి చూసినప్పుడు కాస్త భారంగా, ఉక్కిరిబిక్కిరిగా అనిపించడం సహజం. అందుకే ఈ వాతావరణానికి అలవాటు పడటానికి కంగారు పడకుండా మీకు మీరే కాస్త సమయం ఇచ్చుకోవాలని ఆమె సూచించారు.
ప్రతి అనుభవం సౌకర్యవంతంగా ఉండదు – హద్దులు పెట్టుకోండి..
ఇక్కడ ప్రయాణించేటప్పుడు ప్రతి క్షణం ఎంతో సుఖంగా, కంఫర్ట్గా ఉండకపోవచ్చు. బయటకు వెళ్లినప్పుడు కొందరు మిమ్మల్ని వింతగా తేరిపార చూడటం (Staring), విదేశీయులని తెలియగానే ఆటోలు లేదా దుకాణాల్లో ఎక్కువ డబ్బులు వసూలు చేయడానికి ప్రయత్నించడం వంటివి జరగొచ్చు. ఇలాంటి విషయాల్లో విసిగిపోకుండా, ఒంటరిగా తిరిగే మహిళలు ఎల్లప్పుడూ ఆత్మవిశ్వాసంతో ఉండాలని, అవసరమైన చోట గట్టిగా స్పష్టమైన హద్దులను నిర్దేశించుకోవాలని స్పష్టం చేశారు.
అనుకోని అందమైన అనుభవాలు మీ సొంతం..
అన్నింటికంటే ముఖ్యంగా.. భారత్ మిమ్మల్ని ఎంతో అందమైన రీతుల్లో ఆశ్చర్యపరుస్తుంది. అపరిచితుల నుంచి లభించే నిస్వార్థమైన దయ, స్థానిక వంటకాల రుచులు, ఇక్కడి ఆధ్యాత్మిక వాతావరణం, ప్రజలతో ఏర్పడే ఆత్మీయ బంధాలు జీవితాంతం మీ మనసులో పదిలంగా నిలిచిపోతాయని వివరించారు.
నా గుండెల్లో ఇండియాకు ప్రత్యేక స్థానం..
ప్రపంచవ్యాప్తంగా తాను ఎన్నో దేశాల్లో తిరిగినప్పటికీ, భారతదేశానికి తన హృదయంలో ఒక ప్రత్యేక స్థానం ఉందని ఆమె భావోద్వేగంగా రాసుకొచ్చారు. ఎన్ని సవాళ్లు ఎదురైనా ఇండియా అందించే అనుభూతి జీవితాన్ని మార్చేస్తుందని, మీ తదుపరి టూర్కు ఖచ్చితంగా భారతదేశాన్ని ఎంచుకోవాలని ట్రావెలర్లకు పిలుపునిచ్చారు. ఈ వీడియోపై నెటిజన్లు పెద్ద ఎత్తున స్పందిస్తూ ప్రశంసలు కురిపిస్తున్నారు. “ప్రయాణం అంటే కేవలం అందమైన లొకేషన్లు మాత్రమే కాదు.. జీవితాన్ని మార్చే కొత్త అనుభవాలు నేర్చుకోవడమే” అంటూ కామెంట్లు పెడుతున్నారు.
View this post on Instagram