TVK Vijay: తమిళనాడు అసెంబ్లీ ఎన్నికల్లో ‘తమిళగ వెట్రి కళగం’ (TVK) పార్టీతో సంచలన విజయం సాధించిన నటుడు విజయ్, ఇప్పుడు రాజకీయంగా ఒక కీలక నిర్ణయం తీసుకోబోతున్నారు. ఈ ఎన్నికల్లో ఆయన తిరుచ్చి ఈస్ట్ మరియు పెరంబూర్ అనే రెండు చోట్ల పోటీ చేసి, రెండింటిలోనూ భారీ మెజార్టీతో గెలుపొందారు. అయితే, ఎన్నికల నిబంధనల ప్రకారం ఒక వ్యక్తి రెండు చోట్ల గెలిచినా, కేవలం ఒకే నియోజకవర్గానికి ప్రాతినిధ్యం వహించాల్సి ఉంటుంది. దీంతో విజయ్ ఏ సీటును ఉంచుకుంటారు, దేనికి రాజీనామా చేస్తారనే ఉత్కంఠ అందరిలోనూ నెలకొంది.
తాజా సమాచారం ప్రకారం, విజయ్ పెరంబూర్ నియోజకవర్గ ఎమ్మెల్యేగా కొనసాగాలని నిశ్చయించుకున్నట్లు తెలుస్తోంది. దీనికి ప్రధాన కారణం అక్కడ ఆయనకు వచ్చిన భారీ మెజార్టీ అని రాజకీయ విశ్లేషకులు భావిస్తున్నారు. పెరంబూర్లో విజయ్ ఏకంగా 53,715 ఓట్ల ఆధిక్యంతో గెలుపొందగా, తిరుచ్చి ఈస్ట్లో 27,416 ఓట్ల మెజార్టీ మాత్రమే లభించింది. పెరంబూర్తో పోలిస్తే తిరుచ్చిలో మెజార్టీ సగం తక్కువగా ఉండటంతో, ఆయన తిరుచ్చి ఈస్ట్ స్థానాన్ని వదులుకోవాలని ప్రాథమికంగా నిర్ణయించినట్లు పార్టీ వర్గాల టాక్.
నిజానికి రాజకీయ అరంగేట్రం చేసిన మొదటి ఎన్నికల్లోనే విజయ్ పార్టీ అద్భుతమైన ప్రభంజనం సృష్టించింది. మొత్తం 234 స్థానాలకు గాను టీవీకే ఒంటరిగానే 108 సీట్లు సాధించి అతిపెద్ద పార్టీగా అవతరించింది. అధికార డీఎంకే 73 స్థానాలకు, అన్నాడీఎంకే 53 స్థానాలకు పరిమితమయ్యాయి. ప్రభుత్వాన్ని ఏర్పాటు చేయడానికి కావాల్సిన 118 సీట్ల మ్యాజిక్ ఫిగర్కు కేవలం 10 సీట్ల దూరంలో విజయ్ ఆగిపోయారు. అయినప్పటికీ, మొదటి ప్రయత్నంలోనే ఇంతటి విజయం సాధించడం తమిళ రాజకీయాల్లో ఒక మైలురాయిగా నిలిచింది.
ప్రస్తుతానికి తిరుచ్చి సీటు వదులుకోవడంపై విజయ్ నుంచి కానీ, పార్టీ నుంచి కానీ అధికారిక ప్రకటన వెలువడలేదు. అయితే మెజార్టీ ఎక్కువగా ఉన్న చోటే కొనసాగడం ద్వారా ప్రజల్లో మరింత పట్టు సాధించవచ్చని ఆయన భావిస్తున్నట్లు సమాచారం. మరికొద్ది రోజుల్లోనే దీనిపై పూర్తి స్పష్టత రానుంది. ఏదేమైనా, సినిమా హీరోగా వెండితెరను ఏలిన విజయ్, ఇప్పుడు రాజకీయ క్షేత్రంలోనూ తన మార్కు చూపిస్తూ ముందుకు సాగుతున్నారు.