Tulasi: హిందూ సనాతన ధర్మంలో తులసి మొక్కకు అత్యంత విశిష్టమైన, పవిత్రమైన ప్రాధాన్యత ఉంది. హిందూ మతాచారాల ప్రకారం తులసి మొక్కను సాక్షాత్తూ లక్ష్మీదేవి స్వరూపంగా భావించి పూజిస్తారు. ఇంట్లో తులసి కోటను నిర్మించి, నిత్యం దీపధూప నైవేద్యాలు సమర్పించడం వల్ల ఆ ఇల్లంతా సుఖశాంతులతో, అష్టైశ్వర్యాలతో వర్ధిల్లుతుందని నమ్ముతారు. అయితే, కొన్నిసార్లు ఎంత జాగ్రత్తగా చూసుకున్నప్పటికీ ఇంట్లోని తులసి మొక్క ఎండిపోతూ ఉంటుంది. మరి అలా తులసి మొక్క ఎండిపోవడం శుభమా లేక అశుభమా? ఒకవేళ ఎండిపోతే ఎలాంటి పరిహారాలు చేయాలి? అనే పూర్తి వివరాలను వాస్తు ఇంకా ధర్మశాస్త్రాల ప్రకారం ఇప్పుడు వివరంగా తెలుసుకుందాం.
ఎండిపోయిన తులసి శుభమా? అశుభమా?
వాస్తు శాస్త్రం ప్రకారం, ఇంట్లో ఎండిపోయిన తులసి మొక్క ఉండటం అస్సలు మంచిది కాదు. దీనిని తీవ్రమైన అశుభంగా పరిగణిస్తారు.
నకారాత్మక శక్తి: ఎండిపోయిన తులసి మొక్క ఉన్న చోట సానుకూల శక్తి (Positive Energy) లోపించి, ప్రతికూల శక్తి (Negative Energy) వేగంగా పెరుగుతుంది.
ఆర్థిక సంక్షోభం: తులసి మొక్క ఉన్నట్టుండి ఎండిపోవడం అనేది రాబోయే ఆర్థిక ఇబ్బందులకు లేదా కుటుంబంలో తలెత్తబోయే తీవ్రమైన మనస్పర్థలకు, సంక్షోభాలకు ముందస్తు సంకేతంగా శాస్త్రాలు చెబుతున్నాయి. అందుకే ఎట్టి పరిస్థితుల్లోనూ ఎండిపోయిన తులసిని ఇంట్లోనే ఉంచకూడదు.
తులసి మొక్క ఎండిపోతే ఏం చేయాలి?
ఒకవేళ మీ ఇంట్లో ఉన్న తులసి మొక్క ఎండిపోతే, లక్ష్మీదేవి ఆగ్రహానికి గురికాకుండా ఉండేందుకు కింద పేర్కొన్న జాగ్రత్తలను అత్యంత భక్తిశ్రద్ధలతో పాటించాలి:
ఎండిపోయిన తులసి మొక్కను కుండీ లేదా తులసి కోట నుంచి పీకేటప్పుడు ఎంతో గౌరవంగా, మనసులో లక్ష్మీదేవిని స్మరిస్తూ పక్కకు తీయాలి. ఆ ఎండిపోయిన మొక్కను ఏదైనా పవిత్రమైన నదిలో లేదా ప్రవహించే కాలువ నీటిలో నిమజ్జనం చేయడం ఉత్తమమైన పద్ధతి. ఒకవేళ నది లేదా ప్రవహించే నీరు అందుబాటులో లేకపోతే.. ఎవరూ తొక్కని ప్రదేశంలో, ఏదైనా పెద్ద చెట్టు మొదట్లో మట్టిని తవ్వి అందులో ఆ తులసి కొమ్మలను జాగ్రత్తగా పూడ్చిపెట్టాలి.
చెత్తబుట్టలో వేయొద్దు: ఎండిపోయిన తులసి మొక్కను పొరపాటున కూడా అగౌరవంగా చెత్తబుట్టలో (Dustbin) లేదా పాడుబడిన పెంకుల మధ్య పడేయకూడదు. ఇలాంటి తప్పులు చేయడం వల్ల లక్ష్మీదేవి తీవ్ర ఆగ్రహానికి గురై, జీవితంలో ఊహించని సమస్యలు ఇంకా దరిద్రం చుట్టుముట్టే ప్రమాదం ఉంది.
కొత్త మొక్కను ఎప్పుడు నాటాలి?: ఎండిపోయిన పాత తులసిని పద్ధతి ప్రకారం తొలగించిన తర్వాత.. అదే కుండీలో లేదా తులసి కోటలో గురువారం లేదా శుక్రవారం రోజుల్లో సరికొత్త తులసి మొక్కను నాటాలి. ఎందుకంటే గురువారం విష్ణుమూర్తికి, శుక్రవారం లక్ష్మీదేవికి అత్యంత ప్రీతిపాత్రమైన రోజులు.
వాస్తు ప్రకారం తులసి మొక్కను ఏ దిశలో నాటాలి?
మొక్కను నాటే ముందు దిశల నియమాలను ఖచ్చితంగా తెలుసుకోవడం ముఖ్యం. వాస్తు శాస్త్రం ప్రకారం తులసి మొక్కను ఉంచడానికి ఉత్తర లేదా తూర్పు దిశలను అత్యంత శుభప్రదమైనవిగా చెప్తారు.
ఉత్తర దిశ (North): ఈ దిశను ధన దేవుడైన కుబేరుడి స్థానంగా భావిస్తారు. ఇక్కడ తులసిని పెట్టడం వల్ల వ్యాపార అభివృద్ధి, సంపద కలుగుతాయి.
తూర్పు దిశ (East): ఈ దిశ సూర్యుడు ఉదయించే స్థానం కావడం వల్ల ఇంట్లోకి సానుకూల శక్తిని ఆరోగ్యాన్ని తీసుకువస్తుంది. ఈ రెండు దిశలలో తులసి మొక్కను నాటడం వల్ల లక్ష్మీదేవి అనుగ్రహంతో పాటు, ఇంట్లో అకాల మృత్యు భయాలు తొలగిపోయి నిరంతరం ప్రశాంతత లభిస్తుంది.
ఈ రెండు విషయాలను అస్సలు మరువకండి!
ధార్మిక నమ్మకాల ప్రకారం, లక్ష్మీదేవి ఎల్లప్పుడూ పరిశుభ్రత ఉన్న చోటే కొలువై ఉంటుంది. కాబట్టి తులసి కోట చుట్టుపక్కల ప్రాంతాన్ని ఎప్పుడూ ఎంతో శుభ్రంగా ఉంచుకోవాలి. అక్కడ చెప్పులు విడవడం, మురికి బట్టలు వేయడం లాంటివి చేయకూడదు.
ఆ రోజుల్లో నీరు పోయకూడదు: శాస్త్ర నియమాల ప్రకారం తులసి మొక్కకు ఆదివారం మరియు ఏకాదశి రోజుల్లో నీరు (జలాభిషేకం) పోయకూడదు, అలాగే ఆ రోజుల్లో తులసి ఆకులను కూడా కోయకూడదు. ఈ రోజుల్లో తులసి దేవి విష్ణుమూర్తి కోసం నిర్జల వ్రతం ఉంటుందని నమ్ముతారు. కాబట్టి ఆ సమయాల్లో నీరు పోసే తప్పు చేస్తే లక్ష్మీదేవి నారాజ్ అయి, ఇల్లు వదిలి వెళ్తుందని పండితులు హెచ్చరిస్తున్నారు.
తులసి మొక్క కేవలం ఒక పచ్చని మొక్క మాత్రమే కాదు.. అది ఇంటి ఐశ్వర్యానికి ప్రతీక. కాబట్టి పైన పేర్కొన్న వాస్తు నియమాలను, పూజా విధానాలను సరిగ్గా పాటిస్తూ తులసి దేవిని ఆరాధిస్తే, ఆ లక్ష్మీనారాయణుల కృపాకటాక్షాలు లభించి కష్టాలన్నీ తొలగిపోవడం ఖాయం!