UPI Charges: టీ కొట్టు దగ్గర ₹10 నుంచి మొదలుకొని మాల్స్లో వేల రూపాయల షాపింగ్ వరకు.. జేబులో పర్సు లేకపోయినా చేతిలో ఫోన్ ఉంటే చాలు అన్నట్లుగా భారతీయుల అలవాటును యూపీఐ (UPI) సమూలంగా మార్చేసింది. అయితే, గత కొద్దిరోజులుగా “యూపీఐ లావాదేవీలు ఇకపై ఉచితం కాదా? రూ.2,000 దాటితే ఛార్జీలు పడతాయా?” అనే వార్త సామాన్యులను తీవ్ర గందరగోళానికి గురిచేస్తోంది. ఈ క్రమంలో కేంద్ర ఆర్థిక మంత్రిత్వ శాఖ జారీ చేసిన తాజా నోటిఫికేషన్ ఈ వ్యవహారానికి సంబంధించిన పూర్తి వాస్తవాలను, మార్పులను స్పష్టం చేసింది.
రూ.2,000 వరకు లావాదేవీలు పూర్తిగా ఉచితం..
-
జీరో ఛార్జీలు..రూ.2,000 వరకు జరిగే యూపీఐ లావాదేవీలు, రూపే (RuPay) డెబిట్ కార్డుల ద్వారా చేసే ఎలక్ట్రానిక్ చెల్లింపులపై బ్యాంకులు గానీ, పేమెంట్ కంపెనీలు (Google Pay, PhonePe మొదలైనవి) గానీ ఎలాంటి ప్రత్యక్ష లేదా పరోక్ష ఛార్జీలను వసూలు చేయడానికి వీల్లేదు.
-
వ్యక్తుల మధ్య చెల్లింపులకు ఢోకా లేదు..సాధారణ వినియోగదారులు ఒకరికొకరు పంపుకునే వ్యక్తిగత చెల్లింపులు (Person-to-Person / P2P) ఎప్పటికీ ఉచితంగానే కొనసాగుతాయని ప్రభుత్వం స్పష్టం చేసింది.
అసలు రూ.2,000 దాటితే ఏం జరుగుతుంది?..
-
వ్యాపారులకే ఛార్జీలు..రూ.2,000 దాటిన పెద్ద లావాదేవీలపై ఛార్జీలు పడితే, ఆ భారాన్ని వ్యాపారులు (Merchants) మాత్రమే భరించాల్సి ఉంటుంది తప్ప వినియోగదారుల నుంచి ఎలాంటి అదనపు రుసుము కట్ కాదు.
-
పెద్ద సంస్థలపైనే దృష్టి..పెద్ద షాపింగ్ మాల్స్, కార్పొరేట్ సూపర్ మార్కెట్లు, లగ్జరీ హోటళ్ల వంటి అధిక టర్నోవర్ కలిగిన వ్యాపారాలపై 0.3% నుంచి 0.5% వరకు నామమాత్రపు ఎండీఆర్ విధించే అవకాశం ఉందని సమాచారం.
-
ఎందుకు ఈ మార్పు?..డిజిటల్ పేమెంట్ వ్యవస్థ దీర్ఘకాలంలో స్థిరంగా, పోటీతత్వంతో కొనసాగేందుకు, బ్యాంకులు-ఫిన్టెక్ కంపెనీల మౌలిక సదుపాయాల నిర్వహణ భారాన్ని తగ్గించేందుకే ప్రభుత్వం ఈ నిబంధనల్లో మార్పులు చేసింది.
సామాన్యులు ఆందోళన చెందాల్సిన పని ఉందా?..
సామాన్య పౌరులు నిత్య జీవితంలో చేసే కిరాణా, కూరగాయలు, రెస్టారెంట్లు లేదా చిన్న వ్యాపారుల వద్ద జరిపే లావాదేవీలపై ఎలాంటి అదనపు భారం పడదు.మొత్తం యూపీఐ లావాదేవీల విలువలో మర్చెంట్ పేమెంట్ల వాటా 29 శాతంగా ఉండగా, అందులో ఎక్కువ భాగం రూ.2,000 దాటినవే ఉంటున్నాయి.ఈ ఎండీఆర్ విధానంపై తుది ఫ్రేమ్వర్క్, అమలు తేదీలు, నిర్దిష్ట శ్లాబులకు సంబంధించిన విధివిధానాలను ‘నేషనల్ పేమెంట్స్ కార్పొరేషన్ ఆఫ్ ఇండియా’ (NPCI) త్వరలోనే అధికారికంగా వెల్లడించనుంది.