TG News: రాష్ట్రంలోని పట్టణ స్థానిక సంస్థలను ఆర్థికంగా బలోపేతం చేసే దిశగా తెలంగాణ ప్రభుత్వం కీలక నిర్ణయం తీసుకుంది. 16వ ఆర్థిక సంఘం సిఫార్సుల మేరకు రాష్ట్రానికి కేటాయించిన నిధుల్లో నుంచి మున్సిపాలిటీల వాటా కింద ఏకంగా రూ. 296 కోట్లను విడుదల చేస్తూ ప్రభుత్వం ఉత్తర్వులు జారీ చేసింది. దీంతో రాష్ట్రవ్యాప్తంగా వివిధ పట్టణ ప్రాంతాల్లో నిలిచిపోయిన మౌలిక వసతులు, అభివృద్ధి పనులకు మార్గం సుగమమైంది. కేంద్ర ఆర్థిక సంఘం మార్గదర్శకాలకు అనుగుణంగా స్థానిక సంస్థలకు అందాల్సిన గ్రాంట్లలో రాష్ట్ర వాటాను రేవంత్ రెడ్డి ప్రభుత్వం సమకూర్చింది.
ఈ నిధులతో చేపట్టే ప్రధాన పనులు..
విడుదలైన రూ. 296 కోట్ల నిధులను ప్రధానంగా పట్టణాల్లో అత్యవసర పౌర సేవల మెరుగుదల కోసం కేటాయించనున్నారు. పట్టణాల్లో పేరుకుపోతున్న చెత్తాచెదారం తొలగింపు, సమర్థవంతమైన ఘన వ్యర్థాల నిర్వహణ (Solid Waste Management) ప్రక్రియను వేగవంతం చేస్తారు. తాగునీటి సరఫరాలో ఎదురవుతున్న సమస్యలను పరిష్కరించడం, పైప్‌లైన్ లీకేజీల నివారణ, కాలం చెల్లిన మోటార్లు, పాడైపోయిన పైప్‌లైన్లకు అవసరమైన మరమ్మతులు చేపడతారు. నిధుల కొరత కారణంగా మున్సిపాలిటీల్లో గత కొంతకాలంగా పెండింగ్‌లో ఉన్న డ్రైనేజీ, వీధి దీపాలు, అంతర్గత మరమ్మతులు వంటి చిన్న చిన్న అభివృద్ధి పనులన్నీ ఇకపై వేగవంతం కానున్నాయి.
పట్టణ ప్రగతిపై ప్రభుత్వ ప్రత్యేక దృష్టి..
కేంద్ర ప్రభుత్వం నుంచి స్థానిక సంస్థలకు వచ్చే ప్రతి పైసాను సద్వినియోగం చేసుకుంటూ, గ్రామీణ, పట్టణ ప్రాంతాలను ప్రగతిపథంలో నడిపించేందుకు ప్రభుత్వం ప్రాధాన్యం ఇస్తోంది. తాజాగా రూ. 296 కోట్ల గ్రాంట్లు ఖాతాల్లో జమకానుండటంతో మున్సిపల్ అధికారులు, వార్డు కౌన్సిలర్లు స్థానిక సమస్యల పరిష్కారంపై దృష్టి సారించేందుకు వీలు కలుగుతుంది.