Viral News: సోషల్ మీడియాలో లైకులు, వ్యూస్ కోసం కొందరు చేసే పనులు ఒక్కోసారి ప్రాణాల మీదకు లేదా నిలువునా ముంచేసే ప్రమాదాలకు దారితీస్తుంటాయి. తమిళనాడులో సరిగ్గా అలాంటి ఘటనే జరిగింది. యూట్యూబ్లో మిలియన్ల కొద్దీ వ్యూస్ వస్తున్నాయని మురిసిపోతూ.. ఇంట్లో ఉన్న బంగారం, నోట్ల కట్టలను వీడియోల్లో చూపించిన ఓ యూట్యూబర్ జంటకు దొంగలు కోలుకోలేని షాకిచ్చారు. ఏకంగా కోటి రూపాయల విలువైన బంగారు నగలపై కన్నేసి లూటీ చేశారు.
వీడియోల్లో సంపదను చూపించి చిక్కుల్లో..
కన్యాకుమారి జిల్లా నాగర్కోయిల్ సమీపంలోని తమ్మట్టుకోణం విఐపి గార్డెన్లో వ్యాపారవేత్త వినోద్ కుమార్, మధుమిత దంపతులు ఉంటున్నారు. వీరు యూట్యూబ్, ఇన్స్టాగ్రామ్లలో వీడియోలు చేస్తుంటారు. వ్యూస్ ఎక్కువ వస్తున్నాయన్న ఆశతో.. మధుమిత ఇంట్లో ఉన్న 118 సవర్ల (సుమారు కిలోపైగా) బంగారు ఆభరణాలు, వజ్రాలు, కట్టల కొద్దీ నగదును వీడియోలు తీసి పోస్ట్ చేయడం మొదలుపెట్టారు. ఆఖరికి దొంగతనం జరగడానికి కొద్దిసేపటి ముందు కూడా పూజా గదిలో ఉన్న నగలు, సంపదను చూపిస్తూ వీరు మరో వీడియోను అప్లోడ్ చేశారు.
పక్కా ప్లాన్తో దొంగతనం..
షాపింగ్ ముగించుకుని ఇంటికి వచ్చిన దంపతులు.. పగిలిపోయిన తలుపులు, ఖాళీ అయిన బీరువాలు చూసి గుండెలు బాదుకున్నారు. వెంటనే రాజక్కమంగళం పోలీసులకు ఫిర్యాదు చేశారు. పోలీసులు రంగంలోకి దిగి సీసీటీవీ ఫుటేజ్, ఫోన్ సిగ్నల్స్ ఆధారంగా దొంగల కోసం గాలింపు ముమ్మరం చేశారు. సోషల్ మీడియాలో లైకుల కోసం వ్యక్తిగత విషయాలు, ఇంట్లోని సంపదను ఓపెన్గా చూపించడం ఎంత ప్రమాదకరమో చెప్పడానికి ఈ ఘటనే పెద్ద ఉదాహరణగా నిలిచింది.
This Youtuber from KanyaKumari showed off her money & jewelry in the vlog.
Thieves broke the house & stole 1 Cr. worth of jewelry.pic.twitter.com/WEebM03dkZ
— Vije (@vijeshetty) September 25, 2026