Vijay: తమిళనాడు రాజకీయాలు శుక్రవారం నాడు ఊపిరి బిగబట్టే మలుపులతో అట్టుడికాయి. ముఖ్యమంత్రి పీఠాన్ని అధిరోహించడానికి అడుగు దూరంలో నిలిచిన నటుడు, రాజకీయ నాయకుడు విజయ్, మెజారిటీ మార్కును అందుకోవడంలో తడబడటంతో రాష్ట్రంలో తీవ్ర ఉత్కంఠ నెలకొంది. కాంగ్రెస్ ఇంకా వామపక్షాల మద్దతుతో అధికారం ఖాయమనుకున్న తరుణంలో, మిత్రపక్షాల నుంచి వచ్చిన పరస్పర విరుద్ధ సంకేతాలు విజయ్ నాయకత్వంలోని తమిళగ వెట్రి కజగం (TVK) పార్టీని అనిశ్చితిలోకి నెట్టాయి.
ప్రస్తుతం తమిళనాడు అసెంబ్లీలో ప్రభుత్వం ఏర్పాటు చేయడానికి కావాల్సిన బల నిరూపణ చుట్టూ రాజకీయాలు తిరుగుతున్నాయి. నిన్నటి పరిణామాల ప్రకారం అసలు ఏం జరిగిందంటే.
మెజారిటీ మార్కు మిస్టరీ
తమిళనాడు అసెంబ్లీలో మొత్తం 234 స్థానాలు ఉండగా, మెజారిటీకి 118 మంది ఎమ్మెల్యేల మద్దతు అవసరం. విజయ్ సొంత పార్టీకి 108 సీట్లు ఉండగా, కాంగ్రెస్ (5), సిపిఐ (2), సిపిఎం (2) మద్దతు ప్రకటించడంతో ఆ సంఖ్య 116కు చేరింది. అంటే విజయ్ ముఖ్యమంత్రి కావడానికి మరో రెండు ఓట్ల తక్కువలో ఉన్నారు. అయితే విజయ్ గవర్నర్ రాజేంద్ర విశ్వనాథ్ అర్లేకర్ను కలిసి ప్రభుత్వం ఏర్పాటుకు అనుమతి కోరినప్పటికీ, ఆయన వద్ద కేవలం 116 మంది సంతకాలు మాత్రమే ఉన్నట్లు సమాచారం.
VCK ‘కింగ్మేకర్’ డ్రామా
విజయ్ సర్కార్కు మద్దతు ఇచ్చే విషయంలో విడుతలై చిరుతైగల్ కచ్చి (VCK) పార్టీ వింత ధోరణిని అవలంబిస్తోంది. తొలుత మద్దతు ఇస్తామని సంకేతాలిచ్చిన ఆ పార్టీ, సాయంత్రానికి మాట మార్చింది. విజయ్ నుంచి డిప్యూటీ సీఎం పదవిని ఆశిస్తున్న వీసీకే చీఫ్ తిరుమావళవన్, దీనిపై ఇంకా ఒక స్పష్టమైన నిర్ణయాన్ని ప్రకటించలేదు. టీవీకే మాత్రం కేవలం ‘అర్బన్ అఫైర్స్’ శాఖను మాత్రమే ఇస్తామని చెప్పడంతో ప్రతిష్టంభన ఏర్పడింది.
క్యాంపు రాజకీయం.. ఫోర్జరీ ఆరోపణలు
మరోవైపు, ఎమ్మెల్యేల కొనుగోలు భయంతో క్యాంపు రాజకీయాలు మళ్లీ తెరపైకి వచ్చాయి. నలుగురు కాంగ్రెస్ ఎమ్మెల్యేలు రహస్యంగా హైదరాబాద్ వెళ్లినట్లు వార్తలు వస్తున్నాయి. ఇదే సమయంలో ఏఎంఎంకే (AMMK) అధినేత టిటివి దినకరణ్ విజయ్పై సంచలన ఆరోపణలు చేశారు. తన పార్టీ ఎమ్మెల్యే కామరాజ్ సంతకాన్ని విజయ్ వర్గం ఫోర్జరీ చేసిందని ఆరోపిస్తూ పోలీసులకు ఫిర్యాదు చేశారు. అయితే, కామరాజ్ స్వయంగా సంతకం చేస్తున్న వీడియోను టీవీకే విడుదల చేయడం గమనార్హం.
విజయ్ను అడ్డుకునేందుకు డీఎంకే ఎత్తుగడ?
విజయ్ అధికారంలోకి రాకుండా అడ్డుకునేందుకు డీఎంకే ఒక రహస్య ప్లాన్ వేసినట్లు వామపక్ష నేత ఎం.ఏ బేబి ఆరోపించారు. విజయ్ను అడ్డుకోవడానికి డీఎంకే బయటి నుండి ఏఐఏడీఎంకే (AIADMK) ప్రభుత్వానికి మద్దతు ఇవ్వాలని చూసిందని, అయితే తాము ఆ ప్రతిపాదనను తిరస్కరించామని ఆయన తెలిపారు. గవర్నర్ వ్యవస్థను ఉపయోగించుకుని బీజేపీ రాష్ట్రంలో రాజకీయాలు చేస్తోందని, అందుకే లౌకికవాదాన్ని కాపాడటానికి తాము విజయ్కు మద్దతు ఇస్తున్నామని లెఫ్ట్ పార్టీలు స్పష్టం చేశాయి.