Satya Nadella: ఆర్టిఫిషియల్ ఇంటెలిజెన్స్ (AI) అభివృద్ధి రోజురోజుకూ ఊహకందని వేగంతో దూసుకుపోతోంది. అయితే ఇదే సమయంలో సైబర్ దాడులు, అక్రమ నిఘా, జీవాయుధాల తయారీ వంటి వినాశకర కార్యకలాపాలకు ఏఐ దుర్వినియోగం అవుతుండటం, భవిష్యత్తులో ఈ సాంకేతికత మానవాళి మనుగడకే పెనుముప్పుగా మారుతుందన్న ఆందోళనలు ప్రపంచవ్యాప్తంగా మొదలయ్యాయి.
ఈ నేపథ్యంలో ఏఐ అభివృద్ధి వేగానికి కాస్త విరామం ఇచ్చి, భద్రతకే తొలి ప్రాధాన్యం ఇవ్వాలంటూ టెక్ ప్రపంచంలో మొదలైన ‘స్లోడౌన్’ నినాదానికి మైక్రోసాఫ్ట్ అధినేత సత్య నాదెళ్ల కూడా పూర్తి మద్దతు ప్రకటించారు.
మానవ నియంత్రణ లేకపోతే ఏఐ వ్యర్థం – సత్య నాదెళ్ల..
మైక్రోసాఫ్ట్ సీఈవో సత్య నాదెళ్ల ‘X’ (ట్విట్టర్) వేదికగా ఈ అంశంపై తన అభిప్రాయాన్ని కుండబద్దలు కొట్టారు.
సూపర్ ఇంటెలిజెన్స్ సాధించే ఏ ప్రయాణమైనా ఒక ప్రాథమిక సూత్రంపైనే ఆధారపడి ఉండాలి. మనం సృష్టిస్తున్న ఏఐ మానవాళికి మేలు చేయకపోతే, అది పూర్తిగా మనుషుల నియంత్రణలో లేకపోతే.. అలాంటి సాంకేతికతను వెంబడించడంలో ఎలాంటి అర్థం లేదు.
అత్యాధునిక ఏఐ సాంకేతికత కొద్దిమంది దిగ్గజాల చేతుల్లో మాత్రమే బందీ కాకూడదు. అన్ని దేశాలు, వివిధ రంగాలు, విశ్వవిద్యాలయాలు సమానంగా భాగస్వామ్యం కావాలి. ప్రతి సంస్థ లేదా కంపెనీ ఏ ఒక్క నిర్దిష్ట ఏఐ ప్రొవైడర్పైనే పూర్తిగా ఆధారపడకూడదు. తమ విజ్ఞానం, డేటాపై ఆయా సంస్థలకే పూర్తి యాజమాన్య హక్కులు ఉండాలి. మైక్రోసాఫ్ట్ తమ స్వంత ‘MAI’ మోడళ్ల కోసం రూపొందించిన ప్రత్యేక ప్రవర్తనా నియమావళిని (Code of Conduct) ప్రజల అభిప్రాయాల కోసం అందుబాటులోకి తీసుకురానున్నట్లు తెలిపారు.
ఒకే తాటిపైకి ప్రపంచ టెక్ దిగ్గజాలు..
ఇటీవల ప్రముఖ ఏఐ పరిశోధనా సంస్థల చీఫ్లు ఏఐ నియంత్రణపై చేసిన హెచ్చరికలను సత్య నాదెళ్ల బలపరిచారు.
-
డారియో అమోడెయ్ (Anthropic CEO):సరైన మార్గదర్శకాలు లేకపోతే ఏఐ మానవాళిని తుడిచిపెట్టే ప్రమాదం ఉందన్న హెచ్చరికలతో ఆయన పాక్షికంగా ఏకీభవించారు. మోడళ్ల సామర్థ్యాన్ని పెంచే వేగాన్ని తగ్గించి, స్వతంత్ర నిపుణులకు ఏఐ ల్యాబ్లలో పరిశీలించే వెసులుబాటు కల్పించాలని ప్రతిపాదించారు.
-
సామ్ ఆల్ట్మన్ (OpenAI CEO):ఓపెన్ఏఐ కూడా అమోడెయ్ ప్రతిపాదనను స్వాగతిస్తోందని, ఏఐ అభివృద్ధిని సరైన వేగంతో నడిపించడంపై (Pacing the frontier) తమ సంస్థలోనూ తీవ్ర చర్చ జరుగుతోందని తెలిపారు.
-
ఎలాన్ మస్క్ (xAI / SpaceX):“డారియో చెప్పింది ముమ్మాటికీ నిజం” అంటూ మస్క్ సంక్షిప్తంగా స్పందించి ఏఐ వేగాన్ని తగ్గించాల్సిన అవసరాన్ని సమర్థించారు.
-
డెమిస్ హస్సాబిస్ (Google DeepMind):ఆల్ఫాబెట్ చీఫ్ సైంటిస్ట్ డెమిస్ హస్సాబిస్ కూడా ఏఐ నమూనాల సామర్థ్య పరుగును నెమ్మదించాలనే పిలుపునకు మద్దతు పలికారు. ప్రపంచవ్యాప్తంగా ఏఐ భద్రతా ప్రమాణాల కోసం ప్రత్యేక సంస్థాగత వేదిక అవసరమని అభిప్రాయపడ్డారు.
సూపర్ పవర్ ఏఐ మనిషి మాట వినని రోబోగా మారకముందే.. దానికి కళ్లెం వేసి, పకడ్బందీ చట్టాలు, రక్షణ వలయాలు నిర్మించాలన్న విషయంలో ప్రపంచ టెక్ లీడర్లంతా ఒకే మాటపైకి రావడం గమనార్హం.