Dk Shivakumar: కర్ణాటక శాసనసభ వేదికగా ముఖ్యమంత్రి డీకే శివకుమార్ చేసిన ఓ వివాదాస్పద వ్యాఖ్య రాష్ట్ర రాజకీయాల్లో పెను దుమారం రేపింది. ఇతర ప్రాంతాల నుంచి బెంగళూరుకు వచ్చి స్థిరపడిన దాదాపు 12 మంది (డజను) ఎమ్మెల్యేలు ఇక్కడే రెండో పెళ్లిళ్లు చేసుకున్నారంటూ ఆయన చేసిన వ్యాఖ్యలు రాజకీయ వర్గాల్లో తీవ్ర ప్రకంపనలు సృష్టిస్తున్నాయి. అసెంబ్లీ గౌరవాన్ని దిగజార్చేలా మాట్లాడారంటూ ప్రతిపక్ష బీజేపీ తీవ్ర ఆగ్రహం వ్యక్తం చేస్తూ.. ఆ ఎమ్మెల్యేల పేర్లను తక్షణమే బయటపెట్టాలని డిమాండ్ చేసింది.
అసెంబ్లీలో సీఎం ఏమన్నారు?
శాసనసభలో కరవు పరిస్థితులు, పట్టణీకరణపై చర్చ జరుగుతున్న సమయంలో ముఖ్యమంత్రి డీకే శివకుమార్ బెంగళూరు నగరంపై పెరుగుతున్న జనాభా ఒత్తిడి గురించి ప్రస్తావించారు. రాష్ట్రంలోని ఇతర ప్రాంతాల నుంచి బెంగళూరుకు వచ్చిన వారు తిరిగి సొంత ఊర్లకు వెళ్లడం లేదని సీఎం పేర్కొన్నారు.
ఈ సందర్భంగా సభలోని ఎమ్మెల్యేలను ఉద్దేశించి మాట్లాడుతూ.. “ఇతర ప్రాంతాల నుంచి ఇక్కడికి వచ్చిన ఎమ్మెల్యేలు కూడా తిరిగి వెళ్లడం లేదు. నగరానికి వచ్చిన వారిలో చాలా మందికి రెండో పెళ్లిళ్లు జరిగాయి. అలా రెండో పెళ్లి చేసుకుని ఇక్కడే స్థిరపడిన వారు దాదాపు 12 మంది ఉన్నారు. కావాలంటే వారి జాబితాను కూడా నేను సభ ముందు ఉంచగలను” అంటూ వ్యాఖ్యానించారు. ధార్వాడ్, దక్షిణ కన్నడ వంటి జిల్లాల నుంచి వచ్చిన ప్రజాప్రతినిధులను ఉద్దేశించి ఆయన ఈ వ్యాఖ్యలు చేసినప్పటికీ, ఎవరి పేర్లనూ నేరుగా ప్రస్తావించలేదు.
ప్రతిపక్ష నేత ఆర్. అశోక ధ్వజం..
సీఎం చేసిన వ్యాఖ్యలు అత్యంత అనుచితమని, ఇవి ఇతర ప్రాంతాల నుంచి వచ్చిన ప్రతి ఎమ్మెల్యేపై అనుమానాలు రేకెత్తించేలా ఉన్నాయని మండిపడ్డారు. “ఇది బయటి నుంచి వచ్చిన ప్రతి ఎమ్మెల్యే తలపై వేలాడుతున్న కత్తి లాంటిది” అని పేర్కొంటూ.. సీఎంకు నిజంగా చిత్తశుద్ధి ఉంటే ఆ డజను మంది ఎమ్మెల్యేల పేర్లను తక్షణమే బహిర్గతం చేయాలని డిమాండ్ చేశారు.
ఎమ్మెల్యే సురేశ్ కుమార్ అభ్యంతరం..
సీనియర్ బీజేపీ ఎమ్మెల్యే ఎస్. సురేశ్ కుమార్ మాట్లాడుతూ.. సరదాగా మాట్లాడినా కూడా అత్యున్నత చట్టసభ వేదికగా ఇలాంటి వ్యక్తిగత వ్యాఖ్యలు చేయడం ఎవరికీ గౌరవం తీసుకురాదని, సీఎం ఎవరిని ఉద్దేశించి మాట్లాడారో స్పష్టత ఇవ్వాలని కోరారు.
ప్రస్తుతం కర్ణాటక రాజకీయాల్లో ఈ ‘రెండో పెళ్లి’ వ్యాఖ్యలు అధికార, విపక్షాల మధ్య హాట్ టాపిక్గా మారాయి.