Fire Accident: హైదరాబాద్ శివారు రాజేంద్రనగర్ పరిధిలోని హైదర్ గూడలో శుక్రవారం తీవ్ర కలకలం రేగింది. అక్కడి ప్రభుత్వ పాఠశాలలో ఒక్కసారిగా భారీ అగ్నిప్రమాదం సంభవించింది. తరగతి గదుల్లోంచి దట్టమైన పొగలు, మంటలు వ్యాపించడంతో చుట్టుపక్కల ప్రజలు తీవ్ర భయాందోళనలకు గురయ్యారు. అయితే, శుక్రవారం (అక్టోబర్ 2) గాంధీ జయంతి సందర్భంగా పాఠశాలకు సెలవు దినం కావడంతో పెను ప్రమాదం త్రుటిలో తప్పింది. ఆ సమయంలో స్కూల్లో విద్యార్థులు గానీ, ఉపాధ్యాయులు గానీ ఎవరూ లేకపోవడంతో పెను ప్రాణనష్టం తప్పి అందరూ ఊపిరి పీల్చుకున్నారు.
అసలేం జరిగింది? – తరగతి గదుల్లోంచి ఎగసిపడ్డ మంటలు..
సమాచారం అందుకున్న వెంటనే పోలీసులు, విద్యాశాఖ అధికారులు సంఘటనా స్థలానికి చేరుకుని పరిస్థితిని సమీక్షించారు.విద్యుత్ షార్ట్ సర్క్యూట్ కారణంగానే ఈ ప్రమాదం జరిగిందా? లేక స్కూల్ ఆవరణలో ఎవరైనా చెత్తకు నిప్పు పెట్టడం వల్ల మంటలు లోపలికి వ్యాపించాయా? లేదా ఇతర కారణాలేమైనా ఉన్నాయా? అనే కోణంలో అధికారులు ఆరా తీస్తున్నారు. సాధారణ పనిదినం రోజున గనుక ఈ ప్రమాదం జరిగి ఉంటే విద్యార్థులు తరగతి గదుల్లో ఉండేవారని, తీవ్ర విషాదం జరిగి ఉండేదని.. గాంధీ జయంతి సెలవు కావడం వల్లే పిల్లలంతా సురక్షితంగా ఉన్నారని స్థానికులు పేర్కొంటున్నారు.