CM Revanth Reddy Japan Tour: తెలంగాణ అభివృద్ధికి గ్లోబల్ పెట్టుబడులు కీలకమన్న దృక్పథంతో సీఎం రేవంత్ రెడ్డి విదేశీ పర్యటనలు ప్రారంభించారు. ముఖ్యమంత్రిగా బాధ్యతలు చేపట్టినప్పటి నుంచే విదేశీ పెట్టుబడులను ఆకర్షించేందుకు చురుకుగా ప్రయత్నాలు చేస్తూ వస్తున్న ఆయన, తాజా చర్యగా జపాన్ పర్యటనకు పయనమయ్యారు.
ఏప్రిల్ 16 నుంచి 22వ తేదీ వరకు జరగనున్న ఈ పర్యటనలో సీఎం రేవంత్ రెడ్డి టోక్యో, ఒసాకా, మౌంట్ ఫుజీ, హిరోషిమా వంటి నగరాల్లో పర్యటించనున్నారు. ఆయన్ని పరిశ్రమల శాఖ మంత్రి దుద్దిళ్ల శ్రీధర్ బాబు, స్పెషల్ సెక్రటరీ జయేశ్ రంజన్ సహా పలువురు ఉన్నతాధికారులు అనుసరిస్తున్నారు.
కీలక సమావేశాలు – వ్యూహాత్మక చర్చలు
ఈ పర్యటనలో సీఎం వివిధ జపాన్ సంస్థల ప్రతినిధులతో సమావేశమై పెట్టుబడి అవకాశాలను చర్చించనున్నారు. టోక్యోలో సోనీ గ్రూపు, జెట్రో, జపాన్ బయో ఇండస్ట్రీ అసోసియేషన్, జైకా వంటి సంస్థలతో సమావేశాలు షెడ్యూల్ అయ్యాయి. ఏప్రిల్ 17న తోషిబా ఫ్యాక్టరీని సందర్శించి కంపెనీ కార్యకలాపాలపై అవగాహన పొందనున్నారు.
గాంధీజీ విగ్రహానికి పుష్పాంజలి – రాజకీయ మర్యాదలు
ఏప్రిల్ 18న టోక్యోలో గాంధీ విగ్రహానికి పుష్పాంజలి ఘటించిన తర్వాత, టోక్యో గవర్నర్‌తో మర్యాదపూర్వక సమావేశం జరగనుంది. అదే రోజు ఇండియన్ ఎంబసీ ఆధ్వర్యంలో పారిశ్రామికవేత్తలతో రౌండ్‌టేబుల్ సమావేశం కూడా జరగనుంది.
ఇది కూడా చదవండి: YCP Criminal Politics: ఆ పార్టీ చేస్తోంది రాజకీయాలా? నేరాలా?
టెక్నాలజీ, పర్యావరణం పై ఫోకస్
సుమిదా రివర్ ఫ్రంట్‌, మౌంట్ ఫుజీ, అరకురయామా పార్క్‌, కిటాక్యూషు సిటీ ఎకో టౌన్, మురసాకి రివర్ మ్యూజియం వంటి ప్రదేశాల సందర్శన ద్వారా పర్యావరణ పరిరక్షణ, శుద్ధి, జీవన శైలిపై అధ్యయనం చేయనున్నారు.
వరల్డ్ ఎక్స్‌పోలో తెలంగాణ గొప్పతనాన్ని చాటనున్న సీఎం
ఏప్రిల్ 21న ఒసాకాలో జరగనున్న వరల్డ్ ఎక్స్‌పో – 2025లో సీఎం తెలంగాణ పావిలియన్‌ను అధికారికంగా ప్రారంభించనున్నారు. అదే రోజు మరోసారి బిజినెస్ రౌండ్‌టేబుల్ సమావేశంలో పాల్గొననున్నారు.
హిరోషిమా పర్యటన – శాంతి సందేశం
జపాన్ పర్యటన చివర్లో, ఏప్రిల్ 22న సీఎం హిరోషిమా పీస్ మెమోరియల్‌ను సందర్శించి గాంధీ విగ్రహానికి పుష్పాంజలి ఘటించనున్నారు. హిరోషిమా వైస్ గవర్నర్, అసెంబ్లీ చైర్మన్‌తో సమావేశాల తర్వాత మజ్డా మోటార్స్, హిరోషిమా ఇన్‌స్టిట్యూట్ ఆఫ్ టెక్నాలజీని సందర్శించనున్నారు.
పర్యటన ఉద్దేశ్యం – తెలంగాణకు పెట్టుబడుల వర్షం
ఈ పర్యటనలో పెట్టుబడులే లక్ష్యంగా ప్రభుత్వం వ్యూహాత్మక సమావేశాలు, పరిశ్రమల పరిశీలన, సాంకేతిక సహకారంపై చర్చలు జరుపుతోంది. ఈ పర్యటనతో రాష్ట్రానికి కొత్త పెట్టుబడుల తలుపులు తెరుచుకుంటాయని, పారిశ్రామిక, టెక్నాలజీ రంగాల్లో భాగస్వామ్యం పెరుగుతుందని భావిస్తున్నారు.