Chandrababu: ఆంధ్రప్రదేశ్ శాసనసభ వేదికగా ముఖ్యమంత్రి నారా చంద్రబాబు నాయుడు బీసీ సంక్షేమం, రాజకీయ ప్రాతినిధ్యంపై ఉద్వేగభరితమైన ప్రసంగం చేశారు. స్థానిక సంస్థల్లో బీసీలకు 34 శాతం రిజర్వేషన్లు పునరుద్ధరిస్తూ ప్రభుత్వం తీసుకున్న నిర్ణయం ఎన్నికల హామీ మాత్రమే కాదని, అది తమ పార్టీ రాజకీయ సిద్ధాంతమని స్పష్టం చేశారు.
ఈ నిర్ణయం బీసీల జీవితాల్లో ఒక నూతన అధ్యాయాన్ని ప్రారంభిస్తుందని, రాజకీయంగా వారికి అత్యున్నత అవకాశాల ద్వారాలను తెరుస్తుందని పేర్కొన్నారు.
ఎన్టీఆర్ రాకతోనే బీసీలకు రాజకీయ అధికారం
తెలుగుదేశం పార్టీ ఆవిర్భావం నుంచే బీసీలకు, పార్టీకి మధ్య విడదీయరాని అవినాభావ సంబంధం ఉందని ముఖ్యమంత్రి గుర్తుచేశారు
-
రాజకీయ మార్పు: గతంలో రాజకీయ అధికారం కేవలం కొద్ది వర్గాలకే పరిమితమై ఉండేదని, స్వర్గీయ ఎన్టీ రామారావు తెలుగుదేశం పార్టీని స్థాపించిన తర్వాతే బీసీలకు అసలైన రాజకీయ అధికారం దక్కిందని చెప్పారు.
-
నాయకత్వ ఎదుగుదల: నాడు ఎన్టీఆర్ హయాంలో బీసీలకు 20% రిజర్వేషన్లు కల్పిస్తే.. 1995లో దాన్ని 34 శాతానికి పెంచిన ఘనత టీడీపీదేనని అన్నారు. అయ్యన్నపాత్రుడు, కళా వెంకట్రావు, దేవేందర్గౌడ్, ఎర్రన్నాయుడు, యనమల రామకృష్ణుడు, కేఈ కృష్ణమూర్తి వంటి ఎందరో బీసీ నేతలు ఉన్నత స్థాయికి ఎదిగారని వివరించారు.
-
సామాన్య కార్యకర్తలకు గుర్తింపు: గ్రామీణ స్థాయి ఎంపీటీసీగా ఉన్న బస్వరాజు సారయ్య నాగరాజును కర్నూలు ఎంపీగా గెలిపించి పార్లమెంట్కు పంపిన చరిత్ర ఎన్డీయే కూటమిదని పేర్కొన్నారు.
గత ప్రభుత్వ తీరుపై నిప్పులు.. భిక్ష కాదు.. చట్టబద్ధమైన హక్కులు!
గత ఐదేళ్ల పాలనలో బీసీలకు తీవ్ర అన్యాయం జరిగిందని చంద్రబాబు మండిపడ్డారు..
-
రిజర్వేషన్ల నిర్వీర్యం: గత ప్రభుత్వం జీవోల పేరిట రిజర్వేషన్లను తగ్గించి నాటకాలకు తెరలేపిందని, హైకోర్టు ఉత్తర్వులిచ్చినా కనీసం సుప్రీంకోర్టుకు వెళ్లి పోరాడలేదని విమర్శించారు.
-
కార్పొరేషన్ల నాటకం: 56 బీసీ కార్పొరేషన్లు అని గొప్పలు చెప్పి, కనీసం కుర్చీలు, ఫర్నీచర్ కూడా ఇవ్వకుండా కార్యాలయాలను గాలికి వదిలేశారని ఎద్దేవా చేశారు.
-
హక్కుల సాధన: “బీసీలకు కావాల్సింది భిక్ష కాదు.. అధికారంలో నిజమైన భాగస్వామ్యం, చట్టబద్ధమైన హక్కులు. 217 జీవోను రద్దు చేసి మత్స్యకారులను ఇప్పటికే ఆదుకున్నాం. బీసీల రిజర్వేషన్లపై ఎవరు కోర్టుకు వెళ్లినా వారు చరిత్రహీనులుగా మిగిలిపోతారు” అని స్పష్టం చేశారు.