Nirmala Sitharaman: నేను ఈ రాష్ట్ర కోడలిని.. మాట్లాడే హక్కు నాకుంది!

ఈ మహా సభలో ముఖ్యమంత్రి చంద్రబాబు, కేంద్రమంత్రి నిర్మలా సీతారామన్‌లతో పాటు డిప్యూటీ సీఎం పవన్ కల్యాణ్, మంత్రులు నారా లోకేశ్, కింజరాపు అచ్చెన్నాయుడు, బీజేపీ నేత పీవీఎన్ మాధవ్, రిలయన్స్ సంస్థ ప్రతినిధి అనంత్ అంబానీ తదితర ప్రముఖులు పాల్గొన్నారు.

కేంద్ర ఆర్థిక మంత్రి నిర్మలా సీతారామన్ మైక్ తీసుకుని రాయలసీమ అభివృద్ధి గురించి తెలుగులో మాట్లాడుతుండగా.. సభికుల్లోని కొందరు యువకులు కేరింతలు కొడుతూ, ఈలలు వేస్తూ, పదే పదే గట్టిగా అరుస్తూ నినాదాలతో ప్రసంగానికి అంతరాయం కలిగించారు. దీంతో వేదికపై ఉన్న సీఎం చంద్రబాబు తీవ్ర అసహనానికి లోనయ్యారు.

వెంటనే తన కుర్చీలోంచి లేచి పోడియం వద్దకు వెళ్లి మైక్ అందుకున్న చంద్రబాబు.. ప్రభుత్వ కార్యక్రమాల్లో క్రమశిక్షణ అత్యంత ముఖ్యం. సభా మర్యాదను ప్రతి ఒక్కరూ పాటించాలి. దేశ కేంద్ర ఆర్థిక మంత్రి స్వయంగా వచ్చి మాట్లాడుతుంటే.. ఇలా బాధ్యత లేకుండా, క్రమశిక్షణ లేకుండా ప్రవర్తించడం అస్సలు మంచి పద్ధతి కాదు! సభకు ఒక గౌరవం ఉంటుంది, దానిని కాపాడాలి” అంటూ తీవ్ర స్వరంతో హెచ్చరించారు. ముఖ్యమంత్రి అంత తీవ్రంగా మందలించడంతో గోల చేస్తున్న యువత సైలెంట్ అయిపోయారు. సభా ప్రాంగణమంతా క్షణాల్లో పిన్ డ్రాప్ సైలెన్స్ నెలకొంది.

ఇంతటి గందరగోళం ఎదురైనా కేంద్ర ఆర్థిక మంత్రి నిర్మలా సీతారామన్ ఏమాత్రం అసహనం ప్రదర్శించకుండా చిరునవ్వుతో, పూర్తి సంయమనంతో తన ప్రసంగాన్ని కొనసాగించారు..

ఆంధ్రప్రదేశ్ రాష్ట్రానికి కోడలిగా వచ్చిన నాకు ఈ నేల అన్నా, ఇక్కడి ప్రజలన్నా ఎనలేని అనురాగం, ప్రేమ ఉన్నాయి. కాబట్టే రాయలసీమ పురోగతిపై, ఇక్కడి హక్కులపై ఎంతైనా మాట్లాడే అధికారం

నాకుంది అని స్పష్టం చేశారు.

ఒకప్పుడు కరవుతో అల్లాడిన రాయలసీమను తిరిగి పూర్వవైభవం తెచ్చి ‘రతనాల సీమ’గా తీర్చిదిద్దే లక్ష్యంతోనే కేంద్ర, రాష్ట్ర ప్రభుత్వాలు కలిసి ఈ ₹లక్ష కోట్ల ప్రాజెక్టును మదనపల్లెకు తీసుకొచ్చాయని వివరించారు.

రిలయన్స్ ఎగ్జిక్యూటివ్ డైరెక్టర్ అనంత్ అంబానీ స్వయంగా వేదికపైకి వచ్చి.. “నన్ను ఆంధ్రా బిడ్డగా, మీ కుటుంబ సభ్యుడిగా చూడండి” అని కోరడం ఆయన సంస్కారానికి నిదర్శనమని నిర్మల కొనియాడారు. సీఎం చంద్రబాబు విజనరీ నాయకత్వానికి ఈ ప్రాజెక్టులు మరో నిదర్శనమని అభినందించారు.

రైతులు, పశుపోషకులు, మత్స్యకారుల కోసం కేంద్ర ప్రభుత్వం అందిస్తున్న సాయాన్ని నిర్మలా సీతారామన్ వివరంగా వెల్లడించారు:

రైతులకు దేశవ్యాప్తంగా ఎలాంటి ఎరువుల కొరత రాకుండా చూస్తున్నామని.. యూరియా బస్తా ధర రూ.300 దాటకూడదని కేంద్రం అత్యంత కఠినమైన ఆదేశాలు జారీ చేసిందని స్పష్టం చేశారు.

పీఎం కుసుమ్ (PM-KUSUM), పీఎం సూర్యఘర్ యోజనల ద్వారా పొలాల్లో సోలార్ పంపులను ఏర్పాటు చేసి రైతులకు ఉచిత విద్యుత్ అందిస్తున్నామన్నారు.

రైతులకు పెట్టుబడి ఇబ్బంది లేకుండా కిసాన్ క్రెడిట్ కార్డుల (KCC) ద్వారా సులభ రుణాలు, ప్రకృతి వైపరీత్యాలు వచ్చినప్పుడు ఆదుకునేందుకు సమగ్ర కిసాన్ ఇన్సూరెన్స్ సదుపాయం కల్పిస్తున్నట్లు చెప్పారు.

మూగజీవాల వైద్యం కోసం ప్రతి జిల్లాకు ప్రత్యేక మొబైల్ వెటర్నరీ ఆస్పత్రులను కేంద్రం మంజూరు చేసిందని.. గ్రామీణ ప్రాంతాల్లో వ్యర్థాల నుంచి సంపద సృష్టించేందుకు ‘గోవర్ధన్ స్కీమ్’ ద్వారా బయో గ్యాస్ ప్లాంట్లను విరివిగా ప్రోత్సహిస్తున్నామని ఆమె వివరించారు. సభలో కాసేపు హైడ్రామా నడిచినప్పటికీ.. సీఎం చంద్రబాబు కఠిన క్రమశిక్షణా చర్యలు, కేంద్ర మంత్రి నిర్మలా సీతారామన్ ప్రదర్శించిన పరిణతితో కార్యక్రమం విజయవంతంగా ముగిసింది.