AP News: ఆంధ్రప్రదేశ్‌లో మున్సిపల్ ఎన్నికల పోలింగ్‌కు సమయం ఆసన్నమైంది. రాష్ట్రవ్యాప్తంగా ఆదివారం మున్సిపల్ పోలింగ్ జరగనుండగా, నవంబర్ 3న ఫలితాలు వెల్లడి కానున్నాయి. ఈ స్థానిక సమరంలో అధికార కూటమి, ప్రధాన ప్రతిపక్షం వైఎస్సార్‌సీపీలు ప్రతిష్టాత్మకంగా తలపడుతున్నాయి. ఒకవైపు క్లీన్ స్వీప్ చేయాలని కూటమి వ్యూహాలు రచిస్తుంటే, మరోవైపు తమ క్షేత్రస్థాయి బలాన్ని చాటుకోవాలని వైసీపీ గట్టిగా ప్రయత్నిస్తోంది. మరోవైపు, ఓటర్లు ఎలాంటి గందరగోళం లేకుండా ఓటు హక్కు వినియోగించుకునేలా ఆంధ్రప్రదేశ్ రాష్ట్ర ఎన్నికల సంఘం (APSEC) అన్ని ఏర్పాట్లు పూర్తి చేసింది.
ఎన్నికల సంఘం కొత్త పోర్టల్.. క్షణాల్లో ఓటరు సమాచారం
ఓటర్లు, బరిలో ఉన్న అభ్యర్థులకు అవసరమైన పూర్తి సమాచారాన్ని ఒకేచోట అందించేందుకు ఎన్నికల సంఘం తన అధికారిక పోర్టల్‌ను ఆధునికీకరించింది. ఓటర్లు నేరుగా sec-ems.ap.gov.in/apsec వెబ్‌సైట్‌లోకి వెళ్లి తమ వివరాలను సులభంగా తెలుసుకోవచ్చు.
-
ఓటర్ స్లిప్ & పోలింగ్ కేంద్రం లొకేషన్: మీ ఓటరు గుర్తింపు కార్డు (EPIC) నంబర్‌ను నమోదు చేసి మీ పేరు ఓటర్ల జాబితాలో ఉందో లేదో సరిచూసుకోవచ్చు. మీ ఓటు ఏ వార్డులో ఉంది, పోలింగ్ కేంద్రం చిరునామా, లొకేషన్ మ్యాప్ వివరాలు నేరుగా స్క్రీన్‌పై కనిపిస్తాయి.
-
ఎపిక్ (EPIC) నంబర్ లేకపోతే?: ఒకవేళ ఓటరు గుర్తింపు కార్డు నంబర్ అందుబాటులో లేకపోయినా కంగారు పడాల్సిన పనిలేదు. పేరు, తండ్రి/భర్త పేరు, పుట్టిన తేదీ వంటి వ్యక్తిగత వివరాలను నమోదు చేసి కూడా EPIC నంబర్‌ను మరియు ఓటరు వివరాలను పొందే సదుపాయం కల్పించారు.
-
ఓటర్ల సంఖ్య & రిజర్వేషన్లు: జిల్లా, మున్సిపాలిటీ, కార్పొరేషన్ డివిజన్లు, వార్డుల వారీగా స్త్రీ, పురుష, ఇతరుల ఓటర్ల సంఖ్యను పారదర్శకంగా పరిశీలించవచ్చు. అంతేకాకుండా ఏయే వార్డులు ఏ కేటగిరీకి రిజర్వ్ అయ్యాయో తెలుసుకోవచ్చు.
-
అభ్యర్థుల వివరాలు: పోటీలో ఉన్న అభ్యర్థులు, వారి వివరాలు తెలుసుకునేందుకు ప్రత్యేకంగా ‘అభ్యర్థుల పోర్టల్’ (Candidates Portal) ఆప్షన్‌ను అందుబాటులో ఉంచారు.
రాష్ట్రవ్యాప్తంగా ఎన్నికల కోడ్ అమలు
మున్సిపల్ ఎన్నికలతో పాటు జడ్పీటీసీ, ఎంపీటీసీ ఎన్నికల సమాచారాన్ని కూడా పోర్టల్‌లో క్రోడీకరించారు. నోటిఫికేషన్ విడుదలైనప్పటి నుంచే రాష్ట్రవ్యాప్తంగా ఎన్నికల ప్రవర్తనా నియమావళి (కోడ్) అమల్లోకి వచ్చింది. పోలింగ్ రోజున ఎలాంటి అవాంఛనీయ సంఘటనలు జరగకుండా భారీ భద్రతా ఏర్పాట్లు చేశారు.
ఓటు వేసేందుకు వెళ్లేవారు తమ ఓటరు కార్డుతో పాటు గుర్తింపు కోసం ప్రభుత్వం జారీ చేసిన ఆధార్ కార్డ్, డ్రైవింగ్ లైసెన్స్, పాస్‌పోర్ట్ వంటి గుర్తింపు కార్డులలో ఏదైనా ఒకదాన్ని వెంట తీసుకెళ్లాలని అధికారులు సూచిస్తున్నారు. ఓటర్లు చివరి నిమిషంలో ఇబ్బంది పడకుండా ముందస్తుగానే తమ పోలింగ్ కేంద్రాన్ని నిర్ధారించుకుని స్వేచ్ఛగా ఓటు హక్కును వినియోగించుకోవాలని ఎన్నికల సంఘం పిలుపునిచ్చింది.