YS Sharmila: నాది కాని దాని కోసం ఆశపడే నీచత్వం నాది కాదు.. కుమార్తె అంజిలి పెళ్లి వేదిక మార్పు!

యలహంక ఆస్తి వివాదంపై వస్తున్న వార్తలకు సమాధానమిస్తూ షర్మిల తీవ్ర వ్యాఖ్యలు చేశారు. నాది కాని దాని కోసం ఆశపడే నీచత్వం నాది కాదు. జగన్ మోహన్ రెడ్డి గారు ముఖ్యమంత్రి అయిన తర్వాత, అప్పటివరకు ఉమ్మడి ఆస్తిగా ఉన్న యలహంక ప్రాపర్టీ ఆస్తుల పంపకాల్లో భాగంగా 100 శాతం నాకు, నా పిల్లల భాగానికి వచ్చింది. ఇది దేవుడి సాక్షిగా పచ్చి నిజం” అని షర్మిల స్పష్టం చేశారు.

తన బిడ్డల హక్కు కావడంతో పాటు, దివంగత ముఖ్యమంత్రి డాక్టర్ వైఎస్ రాజశేఖర్ రెడ్డి తిరిగిన  ఇల్లు కావడంతో, తాను పెరిగిన ఇంట్లోనే పెళ్లి చేసుకోవాలన్న కుమార్తె అంజిలి కోరిక మేరకు అక్కడ వివాహం చేయాలని నిర్ణయించినట్లు తెలిపారు. సొంత ఇంట్లో బిడ్డ పెళ్లి చేయడం ప్రతి తల్లిదండ్రులకు దక్కే అదృష్టమని, అయితే బిడ్డ ఆకాంక్షను నెరవేర్చలేకపోయినందుకు తీవ్రంగా బాధపడుతున్నానని ఆమె ఆవేదన వ్యక్తం చేశారు.

షర్మిల కుమార్తె వివాహ ఆహ్వాన పత్రికల్లో తొలుత బెంగళూరు యలహంక ఇంటినే వేదికగా పేర్కొన్నారు. అయితే, వైఎస్సార్సీపీ అధినేత వైఎస్ జగన్ మోహన్ రెడ్డి ఈ వేదికపై అభ్యంతరం వ్యక్తం చేశారు. సెక్యూరిటీ సమస్యలను ప్రస్తావిస్తూ మొదటి నుంచీ అక్కడ వద్దని చెబుతున్నట్లు ఆయన పేర్కొన్నారు.

ఈ వివాదంపై స్పందించిన షర్మిల.. తన కుమార్తె అంజిలి పెళ్లి పెద్దలు కుదిర్చిన శుభకార్యమని, ఇలాంటి సమయంలో ఎలాంటి గొడవలు, వివాదాలు తలెత్తకూడదనే ఉద్దేశంతోనే ఈ కఠిన నిర్ణయం తీసుకున్నట్లు తెలిపారు. వివాహ వేదిక విషయంలో జరుగుతున్న పరిణామాలను చూసి, నా బిడ్డ గురించి బాధపడిన ప్రతి ఒక్కరికీ నా వందనాలు. వివాహం వివాద రహితంగా, ప్రశాంతంగా జరిపించాల్సిన బాధ్యత మాపై ఉంది.

అందుకే వైఎస్ అంజిలి రెడ్డి – సోమల రఘురామ్ రెడ్డిల పరిణయ వేడుకను యలహంక ఇంట్లో కాకుండా, వేరే ప్రదేశంలో బంధుమిత్రులు, ఆత్మీయుల సమక్షంలో ఘనంగా నిర్వహించాలని నిశ్చయించుకున్నాం. అని పేర్కొన్నారు.

కుమార్తె పెళ్లి వేదిక మారినప్పటికీ, కాబోయే నవదంపతులు వైఎస్ అంజిలి రెడ్డి, సోమల రఘురామ్ రెడ్డిలపై తెలుగు ప్రజల ప్రేమాభిమానాలు, ఆశీస్సులు, దీవెనలు ఎల్లప్పుడూ ఉండాలని వైఎస్ షర్మిల మనసారా ఆకాంక్షించారు. కొత్త వేదిక ఎక్కడ అనేది త్వరలోనే కుటుంబ సభ్యులు అధికారికంగా వెల్లడించే అవకాశముంది.

నాది కానీ దానికోసం ఆశపడే నీచత్వం నాది కాదు.
జగన్ మోహన్ రెడ్డి గారు @ysjagan ముఖ్యమంత్రి అయ్యాక, అప్పటి వరకు ఉమ్మడి ఆస్తిగా ఉన్న యలహంక ప్రాపర్టీ.. ఆస్తుల పంపకాల్లో భాగంగా, పూర్తిగా 100 శాతం నా, నా పిల్లల భాగానికి వచ్చింది. ఇది దేవుడి సాక్షిగా నిజం.

నా బిడ్డల హక్కు కాబట్టి, నాన్న YSR తిరిగిన ఇల్లు కనుక, నా కుమార్తె అంజిలి కోరినట్లుగా తన వివాహం అక్కడ చేయాలనుకున్నాం. మన తెలుగింట ఏ గుమ్మాన్ని అడిగినా చెప్తుంది.. సొంత ఇంట్లో బిడ్డ పెళ్లి చేయడం ప్రతి తల్లిదండ్రులకు అదృష్టమని.
కానీ, తాను పెరిగిన ఇల్లే పెళ్లి వేదిక కావాలన్న నా బిడ్డ ఆకాంక్షను నెరవేర్చలేక పోయామని చాలా బాధపడుతున్నాం.

వివాహ వేదిక విషయంలో జరుగుతున్న పరిణామాలను చూసి, నా బిడ్డ గురించి బాధపడిన ప్రతి ఒక్కరికీ నా వందనం. నా కుమార్తె అంజిలి పెళ్లి.. పెద్దలు కుదిర్చిన సంబంధం. వివాద రహితంగా, ఎలాంటి గొడవలు లేకుండా, వివాహం జరిపించాల్సిన బాధ్యత మా మీద ఉంది.

అందుకే వైఎస్ అంజిలి రెడ్డి – సోమల రఘురామ్ రెడ్డిల పరిణయ వేడుకను యలహంక ఇంట్లో కాకుండా, వేరే ప్రదేశంలో బంధుమిత్రులు, ఆత్మీయుల సమక్షంలో నిర్వహించాలని నిశ్చయించుకున్నాం.

కాబోయే నవదంపతులకు తెలుగు ప్రజల ఆశీస్సులు, దీవెనలు ఉండాలని మనసారా ఆకాంక్షిస్తున్నాం.

— YS Sharmila (@realyssharmila) October 31, 2026