Ambati Rambabu: ఆంధ్రప్రదేశ్లో సంచలనం రేపిన మద్యం రవాణా కుంభకోణం కేసులో మాజీ మంత్రి, వైఎస్సార్సీపీ సీనియర్ నేత అంబటి రాంబాబుకు ఎన్ఫోర్స్మెంట్ డైరెక్టరేట్ (ED) మరోసారి నోటీసులు జారీ చేసింది. తొలుత శుక్రవారం ఉదయం 10:30 గంటలకు హైదరాబాద్లోని ఈడీ ప్రాంతీయ కార్యాలయంలో విచారణకు హాజరుకావాలని అధికారులు ఫోన్ ద్వారా సమాచారం అందించిన సంగతి తెలిసిందే. అయితే, తనకు ఇటీవల గుండె శస్త్రచికిత్స జరిగి స్టంట్లు వేశారని, వైద్యుల సలహా మేరకు విశ్రాంతిలో ఉన్నందున హాజరుకాలేనని అంబటి అధికారులకు సమాధానం పంపారు. ఆయన విజ్ఞప్తిని పరిశీలించిన దర్యాప్తు సంస్థ.. కొత్త తేదీని ఖరారు చేస్తూ ఈ నెల 28 (సోమవారం)న తప్పనిసరిగా విచారణకు రావాలని తాజా నోటీసుల్లో స్పష్టం చేసింది.
కేంద్రీకృత టెండర్లు – రూ.195 కోట్ల నష్టంపై ఈడీ గురి..
-
2020 రవాణా టెండర్లలో అక్రమాలు:గత వైసీపీ ప్రభుత్వ హయాంలో ఆంధ్రప్రదేశ్ స్టేట్ బేవరేజెస్ కార్పొరేషన్ (APSBCL) డిపోల నుంచి ప్రభుత్వ మద్యం దుకాణాలకు మద్యం సరఫరా చేసేందుకు జారీ చేసిన కేంద్రీకృత రవాణా టెండర్లలో నిబంధనలు ఉల్లంఘించారనేది ప్రధాన ఆరోపణ.
-
సిగ్మా, ప్రసాద్ ట్రాన్స్పోర్ట్ కాంట్రాక్టులు:రవాణా కాంట్రాక్టులను సిగ్మా, ప్రసాద్ ట్రాన్స్పోర్ట్ సంస్థలకు కట్టబెట్టడం, అనంతరం వాటికి సంబంధించిన సబ్-కాంట్రాక్టుల కేటాయింపుల్లో పెద్ద ఎత్తున గోల్మాల్ జరిగినట్లు ఈడీ గుర్తించింది.
-
భారీగా ఛార్జీల పెంపు:మొదటి విడతలోనే సుమారు 59.14 లక్షల మద్యం పెట్టెల రవాణాకు గాను సిగ్మా సంస్థ నుంచి రూ.15.44 కోట్లు చేతులు మారినట్లు అధికారులు ఆధారాలు సేకరించారు. నిబంధనలకు విరుద్ధంగా రవాణా ఛార్జీలను అడ్డగోలుగా పెంచడం వల్ల ప్రభుత్వ ఖజానాకు రూ.195 కోట్లకు పైగా నష్టం వాటిల్లినట్లు ఈడీ లెక్కగట్టింది.
ఈ కుంభకోణంలో ఇప్పటికే కీలక వ్యక్తుల వాంగ్మూలాలను రికార్డ్ చేసిన ఈడీ.. రవాణా సబ్-కాంట్రాక్టులు, నిధుల మళ్లింపు వ్యవహారాల్లో అంబటి రాంబాబు పాత్రపై ఆరా తీసేందుకు సోమవారం ఆయనను సమగ్రంగా విచారించనుంది.