KTR: రైతుల నిరంతర ఆందోళనలు, పోరాటాల ఫలితంగా తెలంగాణ ప్రభుత్వం ఎట్టకేలకు దిగివచ్చింది. జూరాల ప్రాజెక్టు నుంచి ఎడమ, కుడి ప్రధాన కాలువలకు అధికారులు బుధవారం ఉదయం సాగునీటిని విడుదల చేశారు. పొలాలు ఎండిపోతున్న విపత్కర పరిస్థితుల్లో అన్నదాతలు చేపట్టిన ఉద్యమం ఫలించడంతో బీఆర్ఎస్ వర్కింగ్ ప్రెసిడెంట్, మాజీ మంత్రి కేటీఆర్ తీవ్రస్థాయిలో స్పందించారు. “పోరాడితే పోయేదేమీ లేదు.. బానిస సంకెళ్లు తప్ప!” అంటూ అన్నదాతల పోరాట పటిమను వేనోళ్ల కొనియాడారు.
కుంభకర్ణ ప్రభుత్వాన్ని ముల్లుగర్రతో తట్టి లేపారు.. కేటీఆర్ ఫైర్
అన్నదాతల కష్టాల్లో భాగస్వాములై, క్షేత్రస్థాయిలో వారితో కలిసి అడుగులు వేసి పోరాడిన బీఆర్ఎస్ నాయకులు, కార్యకర్తలందరికీ ప్రత్యేకంగా కృతజ్ఞతలు తెలియజేశారు.
రానున్న రెండేళ్లు ప్రశ్నించడం.. పోరాడటమే మన కర్తవ్యం
తెలంగాణ ప్రజల కనీస అవసరాలను తీర్చే విధంగా ఈ ప్రభుత్వాన్ని పరుగులు పెట్టించడమే తమ ముందున్న మిగిలిన రెండేళ్ల కర్తవ్యమని కేటీఆర్ స్పష్టం చేశారు. ప్రజా సంక్షేమం, తెలంగాణ హక్కుల రక్షణ కోసం నిరంతరం ప్రశ్నించడం, రాజీలేకుండా పోరాడటం, అవసరమైతే ఎవరితోనైనా కొట్లాడటమే బీఆర్ఎస్ పార్టీ ప్రధాన లక్ష్యమని తేల్చిచెప్పారు. పంటలను కాపాడుకునేందుకు రైతులు, వారికి మద్దతుగా బీఆర్ఎస్ చేపట్టిన క్షేత్రస్థాయి ఒత్తిడి వల్లే ఎట్టకేలకు అధికారులు గేట్లు ఎత్తి సాగునీటిని వదలాల్సి వచ్చిందని రాజకీయ విశ్లేషకులు భావిస్తున్నారు.
పోరాడితే పోయేదేమీలేదు…
బానిస సంకెళ్లు తప్పా!!!జూరాల ప్రాజెక్టు నుండి నీరు అందక, పొలాలు పూర్తిగా ఎండిపోతున్న తరుణంలో…రైతులు, వాళ్ల హక్కుల కోసం చేసిన పోరాటం చాలా స్ఫూర్తిదాయకం!
ఈ కుంభకర్ణ ప్రభుత్వన్ని, ముల్లుగర్రతో తట్టి, పరుగులు పెట్టించిన మీకు నా హృదయపూర్వక ధన్యవాదాలు!
— KTR (@KTRBRS) September 23, 2026