Gen Z: నెలనెలా చేతికొచ్చే స్థిరమైన జీతం.. సౌకర్యవంతమైన కార్పొరేట్ ఉద్యోగం.. వీటన్నింటినీ వదిలేసి సొంతంగా ఏదైనా సాధించాలనే తపనతో వ్యాపార రంగంలోకి దిగే యువత సంఖ్య నేడు పెరుగుతోంది. అయితే, ఆలోచన గొప్పదే అయినా క్షేత్రస్థాయి వ్యాపార వాస్తవాలు ఎంత కఠినంగా ఉంటాయో నిరూపిస్తోంది ఢిల్లీకి చెందిన ఒక 22 ఏళ్ల జెన్-జెడ్ (Gen Z) యువతి అనుభవం. వార్షిక వేతనం ₹15 లక్షలు (₹15 LPA) ఉన్న ఐటీ/కార్పొరేట్ ఉద్యోగానికి రాజీనామా చేసి, తన కలల కేఫ్ను ప్రారంభించిన ఏడాదికే తీవ్ర ఆర్థిక నష్టాలు చవిచూడాల్సి రావడంతో ఆమె పెట్టిన సోషల్ మీడియా పోస్ట్ ఇప్పుడు నెట్టింట హాట్ టాపిక్గా మారింది.
భారీ ఖర్చులు – అడుగంటిన పొదుపు..
21 ఏళ్ల వయసులోనే రిస్క్ తీసుకుని, ఢిల్లీలోని ప్రముఖ విద్యార్థి కేంద్రమైన హడ్సన్ లేన్ (Hudson Lane) పరిధిలో తన సొంత పొదుపు మొత్తంతో ఆమె ఈ కేఫ్ను ప్రారంభించింది. 17 ఏళ్ల వయసు నుంచే కామిక్ ఫ్రీలాన్సర్గా పనిచేసి దాదాపు ₹30 లక్షల వరకు ఆదా చేసినట్లు ఆమె తెలిపింది. అయితే ఏడాది గడిచేసరికి వ్యాపార నిర్వహణ పెను భారంగా మారింది..
-
నెలవారీ అద్దె: రూ. 1.20 లక్షలు
-
సిబ్బంది జీతాలు: రూ. 2.00 లక్షలు
-
నిర్వహణ వ్యయం (ఇతర ఖర్చులు): మొత్తం బడ్జెట్లో మరో 30 శాతం
కాఫీ, ఫుడ్ క్వాలిటీ బాగున్నప్పటికీ.. కేఫ్లో సరైన సీటింగ్ స్పేస్ లేకపోవడం, ఇంటీరియర్స్ను మార్చి ఆధునీకరించేందుకు (రెనోవేషన్) చేతిలో పైసలు లేకపోవడం ప్రధాన సమస్యగా మారిందని ఆమె వాపోయింది.
నెటిజన్ల విశ్లేషణ – ప్రాక్టికల్ సలహాలు..
రెడ్డెట్ (Reddit) వేదికగా ఆ యువతి పెట్టిన పోస్ట్పై నెటిజన్లు, ఇతర వ్యాపారవేత్తలు పలు విలువైన సలహాలను పంచుకున్నారు. హడ్సన్ లేన్లో ఇప్పటికే పదుల సంఖ్యలో కేఫ్లు ఉన్నాయని, బయటి బోర్డులు లేదా లుక్ చూస్తే ఇదొక ప్రత్యేకమైన కాఫీ షాప్ అనే భావన కలగడం లేదని స్థానికులు ఎత్తిచూపారు. రద్దీ మార్కెట్లో పోటీని తట్టుకోవాలంటే ప్రత్యేకమైన ‘ఎక్స్-ఫ్యాక్టర్’ లేదా ఆకర్షణీయమైన సిగ్నేచర్ ప్రొడక్ట్ ఉండాలని సూచించారు.
ఆన్లైన్ డెలివరీలు & లాస్ లీడర్ ప్రొడక్ట్స్..
సీటింగ్ సమస్య ఉన్నప్పుడు రెస్టారెంట్ టేబుల్స్పైనే కాకుండా స్విగ్గీ, జొమాటో వంటి ఫుడ్ డెలివరీ ప్లాట్ఫామ్లపై దృష్టి సారించాలని మరికొందరు సలహా ఇచ్చారు. ఒక ప్రముఖ ఐటెమ్ను తక్కువ ధరకు (లాస్ లీడర్ స్ట్రాటజీ) అందించి కస్టమర్లను ఆకర్షించాలని పేర్కొన్నారు.
తొలి 3 ఏళ్లు నష్టాలు సహజమే..
స్వయంగా కేఫ్ నిర్వహిస్తున్న మరో వ్యాపారి స్పందిస్తూ.. తాను కూడా ఆరంభంలో మూడేళ్ల పాటు నష్టాలను చూశానని, సరైన మార్గదర్శిని (మెంటార్) ఎంచుకుని ముందుకు సాగితే ఫలితం ఉంటుందని ధైర్యం చెప్పారు.
వెనకడుగు వేసేదే లేదు..
కేఫ్ను మూసేయాలంటూ కొందరు నెటిజన్లు చేసిన వ్యాఖ్యలను ఆమె గట్టిగానే తిప్పికొట్టింది. తాను కేవలం ప్రాక్టికల్ సలహాల కోసమే వచ్చానని, ఎవరూ తమ కలను అంత సులభంగా వదులుకోరని స్పష్టం చేసింది. సీటింగ్, కస్టమర్ సర్వీస్, టేస్ట్ కంట్రోల్ వంటి లోపాలను సరిదిద్దుకుని తన కేఫ్ను ఎలాగైనా లాభాల బాట పట్టిస్తానని ఆమె తెలిపిన ఆత్మవిశ్వాసం పలువురి ప్రశంసలు అందుకుంటోంది.