నాలుగేళ్లలోనే అద్భుత ప్రగతి – ప్రధాని మోదీ ప్రసంగంలోని ముఖ్యాంశాలు..
మిగతా దేశాలు సాధించడానికి దశాబ్దాల సమయం తీసుకున్న ప్రగతిని భారత్ కేవలం నాలుగేళ్లలోనే సాధించిందని ప్రధాని గర్వంగా ప్రకటించారు. సామర్థ్యాల రూపకల్పన స్థాయి నుంచి నేరుగా కమర్షియల్ చిప్స్ తయారు చేసే స్థాయికి భారత్ చేరుకుందని వివరించారు.
ఇటీవలే మొహాలీ, సూరత్లలో ఉన్న రెండు సెమీకండక్టర్ ప్లాంట్లలో వాణిజ్యపరమైన చిప్ల ఉత్పత్తి ప్రారంభమైందని, భారత్లో తయారైన చిప్లు ఇప్పుడు దేశీయంగానే కాకుండా ప్రపంచ మార్కెట్లకు కూడా అందుబాటులోకి వస్తున్నాయని వెల్లడించారు.
ఇండియా సెమీకండక్టర్ మిషన్ 2.0 (ISM 2.0)..
తొలి దశలో 8 బిలియన్ డాలర్లుగా ఉన్న సెమీకండక్టర్ మిషన్ నిధులను.. సెమీకండక్టర్ మిషన్ 2.0 కింద భారీగా 13.5 బిలియన్ డాలర్లకు పెంచినట్లు ప్రధాని తెలిపారు. ఇప్పటివరకు 12 భారీ చిప్ తయారీ ప్రాజెక్టులకు ఆమోదం లభించిందని, రాబోయే రోజుల్లో ఈ సంఖ్య మరింత పెరుగుతుందని చెప్పారు.
ఆర్థిక బలం & ప్రపంచ విశ్వాసం..
ప్రపంచంలో తీవ్ర ఆర్థిక సవాళ్లు ఎదురవుతున్న సమయంలోనూ భారత్ 7.8 శాతం వృద్ధి రేటును నమోదు చేసిందని గుర్తుచేశారు. జపాన్ క్రెడిట్ రేటింగ్ ఏజెన్సీ కూడా భారత్ సావరిన్ రేటింగ్ను అప్గ్రేడ్ చేసిందని, న్యూఢిల్లీ వేదికగా ఏకాభిప్రాయంతో ఆమోదం పొందిన బ్రిక్స్ డిక్లరేషన్ భారత్పై ప్రపంచ దేశాలకు ఉన్న అచంచల నమ్మకానికి నిదర్శనమని పేర్కొన్నారు.
పీఎం గతిశక్తి & లక్షలాది ఉద్యోగాలు..
పీఎం గతిశక్తి, మల్టీ-మోడల్ లాజిస్టిక్స్ పార్కులు, ఎక్స్ప్రెస్వేల ద్వారా రవాణా ఖర్చులు, ప్రాజెక్టుల జాప్యం గణనీయంగా తగ్గాయని చెప్పారు. దేశంలో ఏర్పాటు కానున్న భారీ ఫ్యాబ్లు, అసెంబ్లీ ప్లాంట్లతో లక్షలాది మంది యువ ఇంజనీర్లు, టెక్నీషియన్లకు అధునాతన ఉద్యోగావకాశాలు లభిస్తాయని ధీమా వ్యక్తం చేశారు.
ఆరు మూలస్తంభాలపై ‘సెమికాన్ 2.0’ – కేంద్రమంత్రి అశ్విని వైష్ణవ్..
కేంద్ర ఎలక్ట్రానిక్స్, ఐటీ శాఖ మంత్రి అశ్విని వైష్ణవ్ మాట్లాడుతూ.. భారత్ ఎన్నో దశాబ్దాలుగా సెమీకండక్టర్ వ్యవస్థను నిర్మించాలనుకున్నప్పటికీ అది ప్రధాని మోదీ నాయకత్వంలోనే సాధ్యమైందన్నారు.
ఆరు ప్రాథమిక విభాగాలు: సెమికాన్ 2.0 ప్రధానంగా సెమీకండక్టర్ డిజైన్, యంత్రాలు-ముడిసరుకులు, మెమరీ, సిలికాన్, కాంపౌండ్ & లాజిక్ ఫ్యాబ్రికేషన్ యూనిట్లు మరియు పరిశోధన-అభివృద్ధి (R&D) అనే 6 రంగాలపై దృష్టి పెడుతుందని తెలిపారు.
200 స్టార్టప్లకు చేయూత: దేశంలో చిప్ డిజైనింగ్ కోసం కనీసం 200 స్టార్టప్లు, కంపెనీలకు ప్రభుత్వం పూర్తిస్థాయి మద్దతు అందించే లక్ష్యంతో పనిచేస్తోందని స్పష్టం చేశారు.
గ్లోబల్ టెక్ దిగ్గజాల సమాహారం – ఈవెంట్ ప్రత్యేకతలు..
ఈ ప్రదర్శనలో 600కు పైగా ఎగ్జిబిటర్లు, 300 అంతర్జాతీయ కంపెనీలు, 50కి పైగా దేశాల ప్రతినిధులు పాల్గొన్నారు. జపాన్, దక్షిణ కొరియా, మలేషియా, నెదర్లాండ్స్, సింగపూర్, స్వీడన్ దేశాలకు ప్రత్యేక కంట్రీ పెవిలియన్లతో పాటు, 12 రాష్ట్ర ప్రభుత్వాల పెవిలియన్లు, స్టార్టప్ పెవిలియన్లను ఏర్పాటు చేశారు.
