Satya Nadella: మనిషి చేతుల్లో లేని ఏఐ ఎందుకు దండగ?

ఈ నేపథ్యంలో ఏఐ అభివృద్ధి వేగానికి కాస్త విరామం ఇచ్చి, భద్రతకే తొలి ప్రాధాన్యం ఇవ్వాలంటూ టెక్ ప్రపంచంలో మొదలైన ‘స్లోడౌన్’ నినాదానికి మైక్రోసాఫ్ట్ అధినేత సత్య నాదెళ్ల కూడా పూర్తి మద్దతు ప్రకటించారు.

మైక్రోసాఫ్ట్ సీఈవో సత్య నాదెళ్ల ‘X’ (ట్విట్టర్) వేదికగా ఈ అంశంపై తన అభిప్రాయాన్ని కుండబద్దలు కొట్టారు.

సూపర్ ఇంటెలిజెన్స్ సాధించే ఏ ప్రయాణమైనా ఒక ప్రాథమిక సూత్రంపైనే ఆధారపడి ఉండాలి. మనం సృష్టిస్తున్న ఏఐ మానవాళికి మేలు చేయకపోతే, అది పూర్తిగా మనుషుల నియంత్రణలో లేకపోతే.. అలాంటి సాంకేతికతను వెంబడించడంలో ఎలాంటి అర్థం లేదు.

అత్యాధునిక ఏఐ సాంకేతికత కొద్దిమంది దిగ్గజాల చేతుల్లో మాత్రమే బందీ కాకూడదు. అన్ని దేశాలు, వివిధ రంగాలు, విశ్వవిద్యాలయాలు సమానంగా భాగస్వామ్యం కావాలి. ప్రతి సంస్థ లేదా కంపెనీ ఏ ఒక్క నిర్దిష్ట ఏఐ ప్రొవైడర్‌పైనే పూర్తిగా ఆధారపడకూడదు. తమ విజ్ఞానం, డేటాపై ఆయా సంస్థలకే పూర్తి యాజమాన్య హక్కులు ఉండాలి. మైక్రోసాఫ్ట్ తమ స్వంత ‘MAI’ మోడళ్ల కోసం రూపొందించిన ప్రత్యేక ప్రవర్తనా నియమావళిని (Code of Conduct) ప్రజల అభిప్రాయాల కోసం అందుబాటులోకి తీసుకురానున్నట్లు తెలిపారు.

ఇటీవల ప్రముఖ ఏఐ పరిశోధనా సంస్థల చీఫ్‌లు ఏఐ నియంత్రణపై చేసిన హెచ్చరికలను సత్య నాదెళ్ల బలపరిచారు.

సూపర్ పవర్ ఏఐ మనిషి మాట వినని రోబోగా మారకముందే.. దానికి కళ్లెం వేసి, పకడ్బందీ చట్టాలు, రక్షణ వలయాలు నిర్మించాలన్న విషయంలో ప్రపంచ టెక్ లీడర్లంతా ఒకే మాటపైకి రావడం గమనార్హం.