AP Sir Update: ఏపీలో 44.71 లక్షల ఓట్లు రద్దు.. ఎందుకో తెలుసా..?

1. ఓట్ల తొలగింపుకు ప్రధాన కారణాలు ఇవే!

అధికారులు సేకరించిన ‘అన్‌కలెక్టబుల్’ జాబితా వివరాల ప్రకారం..

• చిరునామా మారిన వారు: వేరే ప్రాంతాలకు శాశ్వతంగా వలస వెళ్లిన వారు 14.34 లక్షల (3.45%) మంది ఉన్నారు.

• మరణించిన వారు: చనిపోయిన ఓటర్ల సంఖ్య 15.19 లక్షలు (3.65%) గా ఉంది.

• వివరాలు లేని వారు (ఆచూకీ లేని వారు): ఆయా చిరునామాల్లో నివసించని వారు లేదా వివరాలు అసలు లభ్యం కాని వారు 7.76 లక్షల (1.87%) మంది ఉన్నారు.

• డబుల్ ఎంట్రీలు: రెండు లేదా అంతకంటే ఎక్కువ చోట్ల పేర్లు నమోదు చేసుకున్న ఓట్లు 7.32 లక్షలు (1.76%) ఉన్నాయి.

• సాంకేతిక కారణాలు: ఇతర సాంకేతిక లోపాల వల్ల మరో 8,387 ఓట్లను పక్కన పెట్టారు.

2. ‘నో మ్యాపింగ్’ విభాగంలో మరో 8.55 లక్షల ఓట్లు

సాంకేతిక కారణాలు, లేఅవుట్ల మార్పు లేదా వివరాలు సరిపోలకపోవడం వల్ల 8,55,560 ఓట్లను ‘నో మ్యాపింగ్’ విభాగంలో ఉంచారు. ముసాయిదా జాబితా ప్రచురించాక వీరికి ఈసీ నోటీసులు జారీ చేస్తుంది. వీరు ఈసీ గుర్తించిన 11 రకాల గుర్తింపు కార్డుల్లో ఏదో ఒకటి సమర్పించి తమ ఓటును రీ-మ్యాపింగ్ చేయించుకోవాల్సి ఉంటుంది.

3. నెల్లూరు, తిరుపతి జిల్లాల్లోనే అత్యధికం!

రాష్ట్రవ్యాప్తంగా తొలగించనున్న మొత్తం 44.71 లక్షల ఓట్లలో దాదాపు 29% ఓట్లు (13 లక్షలకు పైగా) కేవలం 5 జిల్లాల్లోనే నమోదయ్యాయి..

• నెల్లూరు: 2,90,579 ఓట్లు

• తిరుపతి: 2,87,789 ఓట్లు

• వైఎస్సార్ కడప: 2,44,879 ఓట్లు

• విశాఖపట్నం: 2,39,148 ఓట్లు

• గుంటూరు: 2,37,789 ఓట్లు

4. ఓటర్లు గుర్తుంచుకోవాల్సిన కీలక తేదీలు!

• జూలై 31: ముసాయిదా ఓటర్ల జాబితా ప్రచురణ (దీనిలో మీ పేరు ఉందో లేదో సరిచూసుకోవాలి).

• జూలై 31 – ఆగస్టు 30: అభ్యంతరాలు, ఫిర్యాదుల స్వీకరణ. జాబితాలో మీ పేరు లేకపోతే లేదా తొలగిస్తే, ఫారమ్-6 ద్వారా మళ్లీ దరఖాస్తు చేసుకోవచ్చు.

• ఆగస్టు 31 – సెప్టెంబరు 28: దరఖాస్తులు, నోటీసుల విచారణ మరియు పరిష్కారం.

• అక్టోబరు 3: తుది ఓటర్ల జాబితా (Final Voters List) ప్రచురణ.

ముఖ్య గమనిక: ముసాయిదా జాబితాలో మీ పేరు లేనట్లయితే, ఆగస్టు 30 లోపు ఆధార్ కార్డు, అడ్రస్ ప్రూఫ్ పత్రాలతో ఫారమ్-6 సమర్పించి ఓటు హక్కును పునరుద్ధరించుకోవచ్చు.