Sonam Wangchuk: పర్యావరణ వేత్త సోనమ్ వాంగ్చుక్ (Sonam Wangchuk) తన 26 రోజుల నిరాహార దీక్షపై వస్తున్న విమర్శలకు, “ప్రభుత్వంతో డీల్ కుదుర్చుకున్నారు” అనే ఆరోపణలకు తీవ్రంగా స్పందించారు. ఢిల్లీలో విద్యార్థులపై దాడులు జరగకూడదనే ఉద్దేశంతోనే లిఖితపూర్వక హామీ లభించిన వెంటనే దీక్ష విరమించానని ఆయన స్పష్టం చేశారు.
1. నా పోరాటానికి క్యారెక్టర్ సర్టిఫికెట్ కావాలా?
లడఖ్ చల్లటి వాతావరణం నుంచి ఢిల్లీ ఎండల్లోకి వచ్చి 26 రోజుల పాటు ఆకలితో అలమటించానని, ఈ దీక్ష వల్ల 11 కిలోల బరువు తగ్గడమే కాకుండా శరీర భాగాలు దెబ్బతినే స్థితికి చేరానని ఆవేదన వ్యక్తం చేశారు. నేను ప్రభుత్వంతో డీల్ చేసుకోవాలనుకుంటే 26 రోజులు ఆకలితో ఎందుకు ఉంటాను? హాయిగా ఏసీ గదిలో కూర్చుని మాట్లాడుకోలేనా? నా పోరాటం ఎంత స్వచ్ఛమైందో నిరూపించుకోవడానికి ఎవరి వద్ద నుంచో క్యారెక్టర్ సర్టిఫికెట్ తీసుకోవాలా?” అని విమర్శకులను సూటిగా ప్రశ్నించారు.
2. దీక్ష విరమణకు అసలు కారణం ఏంటి?
ఢిల్లీలో నిరసన తెలుపుతున్న విద్యార్థులపై పోలీసులు తీవ్రంగా విరుచుకుపడే అవకాశం ఉందనే సమాచారంతోనే తాను త్వరపడి దీక్ష ముగించాల్సి వచ్చిందని తెలిపారు. గతంలో లడఖ్లో యువతపై జరిగిన కాల్పుల ఘటన గుర్తుకు వచ్చి, ఇక్కడ విద్యార్థులకు ఏ హానీ జరగకూడదనే శాంతి కోసం దీక్ష విరమించానని వెల్లడించారు. సఫ్దర్జంగ్ ఆస్పత్రిలో ఉన్న సమయంలో తనను ఒక ఖైదీలా చూశారని, ఎవరినీ కలవనివ్వకుండా, ఫోన్ లేదా ల్యాప్టాప్ కూడా వాడనివ్వలేదని ఆయన ఆరోపించారు.
3. విద్యాశాఖ మంత్రి రాజీనామాపై స్పందన
విద్యాశాఖ మంత్రి ధర్మేంద్ర ప్రధాన్ రాజీనామా కంటే నిరసన తెలుపుతున్న విద్యార్థులపై కేసులు పడకుండా రక్షించడానికే తాను ప్రాధాన్యత ఇచ్చానని చెప్పారు. రాజీనామా అంశాన్ని నాన్చడం వల్ల కేంద్ర ప్రభుత్వానికే అపార నష్టం జరుగుతోందని, ప్రజల్లో ఆగ్రహం వ్యక్తమవుతోందని పేర్కొన్నారు. త్వరలోనే మంత్రి రాజీనామా చేయక తప్పదని ఆయన ధీమా వ్యక్తం చేశారు.
4. కాంగ్రెస్ ఎంపీ విమర్శలు
కాగా, కాంగ్రెస్ ఎంపీ ఇమ్రాన్ మసూద్ వాంగ్చుక్ నిర్ణయాన్ని తప్పుపట్టారు. ఆయనను “అన్నా హజారే పార్ట్-2″గా అభివర్ణిస్తూ, గతంలో అన్నా హజారేలాగే వాంగ్చుక్ కూడా ఇకపై మౌనంగా ఉండిపోతారని వ్యాఖ్యానించారు.