Chandrababu: రంపచోడవరంలో నిర్వహించిన ‘మెగా పీటీఎం’ (Mega PTM) కార్యక్రమంలో ముఖ్యమంత్రి నారా చంద్రబాబు నాయుడు పాల్గొన్నారు. విద్యాశాఖలో సాధిస్తున్న విజయాలు, సంక్షేమం మరియు అభివృద్ధి సమతుల్యతపై ఆయన మాట్లాడారు.
1. ఎంతమంది పిల్లలున్నా ‘తల్లికి వందనం’!
ఇంట్లో ఎంతమంది పిల్లలు ఉంటే అంతమందికీ ‘తల్లికి వందనం’ వర్తింపజేస్తున్నామని సీఎం స్పష్టం చేశారు.రాష్ట్రవ్యాప్తంగా 67 లక్షల మంది పిల్లలకు గానూ రూ.10,120 కోట్లు జమ చేస్తున్నామని, కేవలం గిరిజన ప్రాంతాల్లోనే 5 లక్షల మంది పిల్లల కోసం రూ.664 కోట్లు వారి ఖాతాల్లో వేశామని వెల్లడించారు.ఆర్థిక అసమానతలు తగ్గించడమే ప్రభుత్వ ధ్యేయమని, పిల్లలు సమాజానికి ఉపయోగపడే ఆస్తిగా మారాలని ఆకాంక్షించారు.
2. సంక్షేమం నాణేనికి ఒకవైపు.. అభివృద్ధి రెండో వైపు!
కేవలం అప్పులు తెచ్చి సంక్షేమం నడపడం సాధ్యం కాదని, ఆదాయాన్ని పెంచుతూ అభివృద్ధిని సాధిస్తేనే సంక్షేమం శాశ్వతంగా ఉంటుందని చెప్పారు.పేదరికాన్ని నిర్మూలించి పేదవారిని ఆదుకోవడానికి పీ4 కార్యక్రమం ద్వారా కృషి చేస్తున్నామని తెలిపారు.
3. టీచర్లే విద్యావ్యవస్థకు వెన్నెముక
విద్యార్థుల భవిష్యత్తు ఉపాధ్యాయుల చేతుల్లోనే ఉందని, సమాజంలో టీచర్లకు ఎంతో మంచి గుర్తింపు ఉందని కొనియాడారు.పిల్లలు సంతోషంగా ఉంటేనే బాగా చదువుతారనే ఉద్దేశంతో శనివారాలు ‘నో బ్యాగ్ డే’ అమలు చేస్తున్నామని, పిల్లల ఆరోగ్యానికి పౌష్టికాహారం అందిస్తున్నామని తెలిపారు.ఆగస్టు నెల నుంచి ఆరోగ్య సంరక్షణ కోసం ‘సంజీవని’ ప్రాజెక్టును తీసుకురాబోతున్నట్లు సీఎం వెల్లడించారు.
4. విద్యాశాఖపై లోకేష్ కృషిని మెచ్చుకున్న సీఎం
నారా లోకేష్ విద్యాశాఖను ఏరికోరి మరీ తీసుకున్నారని, గడిచిన రెండేళ్ల నుంచి ప్రభుత్వ పాఠశాలల పరిస్థితి మారి విద్యార్థుల సంఖ్య గణనీయంగా పెరిగిందని సీఎం ఆనందం వ్యక్తం చేశారు. కాగా, విద్యావ్యవస్థకు పూర్వవైభవం తీసుకురావడానికి ఉపాధ్యాయులు, తల్లిదండ్రులు, విద్యార్థులు కలిసికట్టుగా ముందుకు సాగాలని లోకేష్ పిలుపునిచ్చారు.