Tollywood: తెలుగు చిత్ర పరిశ్రమలో థియేటర్ల యజమానులకు (ఎగ్జిబిటర్లకు) ఎదురవుతున్న సమస్యలపై మెగాస్టార్ చిరంజీవి నివాసంలో జరిగిన కీలక సమావేశం ముగిసింది. ఎగ్జిబిటర్లు పడుతున్న ఇబ్బందులు, వారి భయాలను చిరంజీవి ఎంతో ఓపికగా పూర్తిగా విన్నారు. ఈ సందర్భంగా ఆయన మాట్లాడుతూ, పరిశ్రమలో భాగస్వాములైన నిర్మాతలకు, డిస్ట్రిబ్యూటర్లకు, ఎగ్జిబిటర్లకు.. ఇలా అందరికీ పూర్తి న్యాయం జరిగేలా నిర్ణయాలు ఉండాలని స్పష్టం చేశారు. ఇది ఏదో ఒక సినిమా గురించో, లేదా ఒక రంగానికి సంబంధించిన చర్చో కాదని, అందరికీ మేలు జరిగేలా ఇండస్ట్రీ కొన్ని మంచి పద్ధతులను ఏర్పరుచుకుందని గుర్తుచేశారు.
తెలుగు సినీ ఇండస్ట్రీకి అత్యున్నత సంస్థ ‘తెలుగు ఫిలిం ఛాంబర్ ఆఫ్ కామర్స్’ (TFCC) అని, ఆ ఛాంబర్ తీసుకునే నిర్ణయాలకు కట్టుబడి ఉండటం అందరి బాధ్యతని చిరంజీవి అన్నారు. థియేటర్ల ఆదాయానికి సంబంధించి అందరినీ సంప్రదించి, ‘పర్సెంటేజ్ మోడల్’ పై ఒక కమిటీని ఏర్పాటు చేస్తూ ఛాంబర్ ఒక నిర్ణయం తీసుకుందని చెప్పారు. అలా ఒక నిర్ణయం తీసుకున్న తర్వాత దానికి వ్యతిరేకంగా ఎవరూ కూడా మీడియా ముందుకు వచ్చి వ్యక్తిగత అభిప్రాయాలు మాట్లాడటం మంచిది కాదని హితవు పలికారు. ఇలాంటి పనుల వల్ల ఇండస్ట్రీలో ఐక్యత లేదనే తప్పుడు సందేశం ప్రజల్లోకి వెళ్తుందని ఆయన ఆందోళన వ్యక్తం చేశారు.
గతంలో వేసిన కొన్ని కమిటీల పనితీరు, వాటి వల్ల వచ్చిన ఫలితాలపై సింగిల్ స్క్రీన్ థియేటర్ల యజమానుల్లో కొంత అసంతృప్తి, నమ్మకం లేకపోవడం వంటివి ఉన్నాయనే విషయాన్ని తాను అర్థం చేసుకున్నానని చిరంజీవి పేర్కొన్నారు. అయితే, ఈసారి ఛాంబర్ ఏర్పాటు చేసిన కమిటీ అనుకున్న సమయానికి అంటే జూన్ 30వ తేదీ లోపల అన్ని విషయాలను క్షుణ్ణంగా పరిశీలిస్తుందని చెప్పారు. ప్రొడ్యూసర్స్, డిస్ట్రిబ్యూటర్స్, ఎగ్జిబిటర్స్ అందరికీ ఆమోదయోగ్యంగా ఉండేలా పర్సెంటేజ్ మోడల్పై మంచి ప్రతిపాదనలు చేస్తుందని తనకు నమ్మకం ఉందన్నారు. ఆ కమిటీ తన బాధ్యతలను సకాలంలో పూర్తి చేసి నివేదిక ఇచ్చేలా తన వంతుగా పూర్తి ప్రయత్నం చేస్తానని మెగాస్టార్ గట్టి హామీ ఇచ్చారు.
మెగాస్టార్ చిరంజీవి తమ కోసం సమయం కేటాయించి, సింగిల్ స్క్రీన్ థియేటర్లు ప్రస్తుతం ఎదుర్కొంటున్న కష్టాలను అవగాహన చేసుకుని అందరికీ న్యాయం చేస్తానని భరోసా ఇవ్వడం పట్ల ఎగ్జిబిటర్ల సభ్యులందరూ పూర్తి సంతృప్తి వ్యక్తం చేశారు. తమ అసోసియేషన్లలోని మిగతా సభ్యులందరికీ ఈ సమావేశం వివరాలను తెలియజేసి, రాబోయే 24 గంటల్లో తమ పూర్తి ఆమోదాన్ని తెలుపుతామని ఎగ్జిబిటర్ల ప్రతినిధులు వెల్లడించారు.
ఈ అత్యంత ప్రాధాన్యత కలిగిన సమావేశంలో తెలుగు ఫిలిం ఛాంబర్ ప్రెసిడెంట్ సురేష్ బాబు, ప్రముఖ నిర్మాత అల్లు అరవింద్, టి.ఎఫ్.డి.సి చైర్మన్ దిల్ రాజులతో పాటు ప్రముఖ నిర్మాతలు కేఎల్ నారాయణ, సునీల్ నారంగ్, భరత్ నారంగ్, తెలంగాణ ఫిలిం ఛాంబర్ ప్రెసిడెంట్ శేఖర్, అనుపమ్, శ్రీధర్, సదానంద్ గౌడ్, సుదర్శన్ థియేటర్ అధినేత రాజ్ తదితరులు పాల్గొని తమ అభిప్రాయాలను పంచుకున్నారు.