Bus Stop: హైదరాబాద్ నగరంలోని సబర్బన్ (లోకల్) రైల్వేస్టేషన్ల దగ్గర ప్రయాణికులకు ఒక పెద్ద సమస్య ఎదురవుతోంది. చాలా స్టేషన్ల నుండి నేరుగా ఆర్టీసీ (TSRTC) బస్సు కనెక్టివిటీ లేకపోవడంతో జనాలు ఇబ్బంది పడుతున్నారు. ఈ రైల్వేస్టేషన్లు ప్రధాన రోడ్లకు కాస్త దూరంగా ఉండటం వల్ల, దిగిన ప్రయాణికులు కిలోమీటర్ల దూరం నడుచుకుంటూ వెళ్లాల్సి వస్తోంది. స్టేషన్ల లోపలి నుండి బస్సులు నడపాలని ఎప్పటి నుంచో డిమాండ్ ఉన్నా అధికారులు పట్టించుకోకపోవడంపై ప్రయాణికుల సంఘాలు అసంతృప్తి వ్యక్తం చేస్తున్నాయి. లోకల్ రైల్వేస్టేషన్ల నుండి సమీపంలోని మెట్రో స్టేషన్లకు లేదా మెయిన్ బస్స్టాప్లకు మినీ బస్సులు, షటిల్ సర్వీసులు నడపాలని వారు కోరుతున్నారు.
1. హైటెక్ సిటీ (Hi-Tech City) స్టేషన్
ఈ స్టేషన్ మెయిన్ రోడ్డుకు చాలా దూరంలో ఉంటుంది. ఐటీ కారిడార్లోని మైండ్స్పేస్, సైబర్ టవర్స్, ఫైనాన్షియల్ డిస్ట్రిక్ట్ వంటి కీలక ప్రాంతాలకు వెళ్లే ఉద్యోగుల సంఖ్య ఇక్కడ చాలా ఎక్కువ. కానీ, సిటీ బస్సులు ఏవీ నేరుగా స్టేషన్ లోపలికి రాకపోవడంతో ప్రయాణికులు తప్పనిసరి పరిస్థితుల్లో ఎక్కువ డబ్బులు పెట్టి ఆటోలు, క్యాబ్ల వంటి ప్రైవేటు వాహనాలపై ఆధారపడుతున్నారు.
2. బోరబండ, భరత్నగర్ స్టేషన్లు
ఇవి నివాస ప్రాంతాల (కాలనీల) మధ్య ఉండే స్టేషన్లు. ఇక్కడికి రైళ్లలో వచ్చే జనాలు తమ ఇళ్లకు వెళ్లడానికి లేదా పక్కనే ఉన్న మెట్రో స్టేషన్లకు చేరుకోవడానికి ఆర్టీసీ ఫీడర్ బస్సులు గానీ, షటిల్ సర్వీసులు గానీ అందుబాటులో లేవు.
3. ఫలక్నుమా, ఉందానగర్ స్టేషన్లు
పాతబస్తీ ఇంకా శంషాబాద్ చుట్టుపక్కల ఉండే ఈ స్టేషన్ల నుండి ఎయిర్పోర్ట్ (విమానాశ్రయం) వైపు వెళ్లేందుకు లేదా చుట్టుపక్కల కాలనీలకు చేరుకోవడానికి నేరుగా నడిచే బస్సులు చాలా అరుదుగా ఉంటాయి.
4. సనత్నగర్, జేమ్స్ స్ట్రీట్ స్టేషన్లు
ఇవి పారిశ్రామిక ప్రాంతాలకు, పెద్ద పెద్ద వ్యాపార సముదాయాలకు (కమర్షియల్ హబ్స్) దగ్గరగా ఉన్నప్పటికీ, ప్రయాణికుల రద్దీకి సరిపడా నిరంతర బస్సు సర్వీసులు ఇక్కడ లేవు.
రైలు దిగిన వెంటనే సులభంగా బస్సులు దొరికేలా ఆర్టీసీ అధికారులు చర్యలు తీసుకుంటే తమకు ఆటోల పైన ఉబర్,రాపిడో పైన ఆధారపడాలిసిన అవసరం తప్పుతుందని నగరవాసులు కోరుతున్నారు.