Jal Jeevan Mission: ఆంధ్రప్రదేశ్ ప్రభుత్వం ‘జల్జీవన్ మిషన్’ పథకానికి సంబంధించిన కొన్ని పాత ఉత్తర్వులను (జీవోలను) రద్దు చేస్తూ కీలక నిర్ణయం తీసుకుంది. ఈ ఏడాది మార్చి నెలలో గ్రామాల్లోని సుమారు 3,000 ప్రాంతాల్లో ఇంటింటికీ మంచినీటి కొళాయిలు (టాప్స్) ఏర్పాటు చేయడానికి ఇచ్చిన అనుమతులను రద్దు చేస్తూ పంచాయతీరాజ్, గ్రామీణాభివృద్ధి శాఖ తాజా ఉత్తర్వులు జారీ చేసింది.
అసలు ఆ జీవోలు ఏంటి?
గత మార్చి 26వ తేదీన పంచాయతీరాజ్ శాఖ జీవో నంబర్ 53, 54లను విడుదల చేసింది. దీని ప్రకారం..
గ్రామాల్లో ఇంటింటికీ మంచినీరు అందించేలా రూ.1,814.71 కోట్లతో దాదాపు 3 వేల పనులకు అనుమతులు ఇచ్చారు. వీటితో పాటు పెద్ద ఎత్తున నీటి సరఫరా చేసే 7 మల్టీ విలేజ్ స్కీమ్ (MVS) ప్రాజెక్టుల కోసం రూ.9,355 కోట్లను మంజూరు చేశారు. ఈ భారీ పనులను నాబార్డు (NABARD), ఎన్ఐడీఏ, సాస్కి, పూర్వోదయ వంటి సంస్థల నిధులతో చేపట్టాలని ఆనాడు నిర్ణయించారు.
ఇప్పుడు ఎందుకు రద్దు చేశారు?
అయితే, పరిపాలన పరమైన సర్దుబాట్లు – కొన్ని సాంకేతిక కారణాల వల్ల ఆ పాత జీవోలను (53, 54) రద్దు చేస్తూ ప్రభుత్వం తాజాగా జీవో నంబర్ 92ను విడుదల చేసింది. ఈ పనులను మరింత పక్కాగా, మెరుగైన విధానంలో చేయడానికి వీలుగా.. త్వరలోనే అన్ని వివరాలతో కొత్తగా మళ్లీ ఉత్తర్వులు (ఫ్రెష్ జీవోలు) విడుదల చేయనున్నట్లు ప్రభుత్వ అధికారులు వెల్లడించారు.
కాబట్టి పనులు ఆగిపోలేదని, కేవలం పరిపాలన మార్పుల కోసమే పాత ఉత్తర్వులను రద్దు చేసి, కొత్తగా జీవోలు ఇవ్వబోతున్నారని అధికారులు స్పష్టం చేశారు.