Aara Mastan: తెలంగాణలో సంచలనం సృష్టించిన ఫోన్ ట్యాపింగ్ కేసు దర్యాప్తు వేగవంతమైంది. ఈ కేసులో కీలక సాక్షిగా ఉన్న ఆరా సర్వే సంస్థ అధినేత ఆరా మస్తాన్ను ప్రత్యేక దర్యాప్తు బృందం (SIT) అధికారులు తాజాగా రెండోసారి విచారించారు. హైదరాబాద్లోని సిట్ కార్యాలయంలో సుమారు రెండున్నర గంటల పాటు ఈ విచారణ కొనసాగింది. ఈ సందర్భంగా అధికారులు ఆయన నుంచి కీలక సమాచారాన్ని సేకరించడంతో పాటు, రెండోసారి ఆయన స్టేట్మెంట్ను రికార్డు చేశారు.
విచారణ పూర్తయిన తర్వాత ఆరా మస్తాన్ మీడియాతో మాట్లాడుతూ ఆసక్తికర విషయాలను వెల్లడించారు. ఈ కేసులో ప్రధాన నిందితుడిగా ఉన్న ప్రభాకర్ రావు చెప్పిన వివరాలను సరిచూసుకోవడానికే తనను మరోసారి పిలిచారని ఆయన తెలిపారు. ముఖ్యంగా, అధికారులు తన రెండు ఫోన్లను 2020 నుంచే ట్యాప్ చేశారని, దానికి సంబంధించిన పూర్తి డేటాను తన ముందే ఉంచి చూపించారని మస్తాన్ పేర్కొన్నారు. గతంలో తను చెప్పిన విషయాలనే అధికారులు మళ్లీ అడిగారని, తనకు తెలిసిన పూర్తి సమాచారాన్ని స్పష్టంగా వివరించానని చెప్పారు.
ప్రస్తుతం ఈ కేసు దర్యాప్తు తుది దశకు చేరుకుందని ఆరా మస్తాన్ అభిప్రాయపడ్డారు. ఉన్నత స్థాయి అధికారులతో కూడిన సిట్ బృందం అత్యంత లోతుగా విచారణ జరుపుతోందని, అందుకే త్వరలోనే ఈ కేసులో అసలు నిజాలు బయటకు వచ్చే అవకాశం ఉందని ఆయన అన్నారు. వారం రోజుల్లో తనను మరోసారి విచారణకు పిలిచే అవకాశం ఉందని, ఈ కేసు త్వరలోనే ఒక కొలిక్కి వస్తుందని ఆయన ధీమా వ్యక్తం చేశారు.