Heavy Rains Alert: రెండు తెలుగు రాష్ట్రాల ప్రజలకు వాతావరణ శాఖ అత్యవసర (బిగ్ అలర్ట్) హెచ్చరికలు జారీ చేసింది. బంగాళాఖాతంలో ఏర్పడిన అల్పపీడన ప్రభావంతో నేటి నుంచి ఆంధ్రప్రదేశ్, తెలంగాణలలో విస్తారంగా భారీ నుండి అతి భారీ వర్షాలు కురిసే అవకాశం ఉందని అధికారులు వెల్లడించారు. ఉత్తర ఒడిశా, పశ్చిమ బెంగాల్ తీరాలను ఆనుకుని వాయువ్య బంగాళాఖాతంలో కేంద్రీకృతమైన ఈ అల్పపీడనం ప్రస్తుతం అదే ప్రాంతంలో స్థిరంగా కొనసాగుతోంది. ఇది రాబోయే 48 గంటల్లో మరింత బలపడి తీవ్ర అల్పపీడనంగా (Well Marked Low Pressure) మారనుందని వాతావరణ కేంద్రం స్పష్టం చేసింది.
నైరుతి రుతుపవనాలు చురుగ్గా కదులుతుండటం, దానికి తోడు ఈ అల్పపీడన ప్రభావం తోడవ్వడంతో తెలంగాణ వ్యాప్తంగా రాబోయే రెండు రోజుల పాటు వాతావరణం పూర్తిగా మారిపోనుంది. రాష్ట్రంలోని పలు జిల్లాల్లో ఉరుములు, మెరుపులతో కూడిన అత్యంత భారీ వర్షాలు కురిసే ఛాన్స్ ఉందని అధికారులు తెలిపారు. ముఖ్యంగా నిజామాబాద్, జగిత్యాల, పెద్దపల్లి, ఆదిలాబాద్, కరీంనగర్, రాజన్న సిరిసిల్ల, సిద్దిపేట జిల్లాలపై ఈ అల్పపీడన ప్రభావం తీవ్రంగా ఉండబోతోందని, ఆయా జిల్లాల యంత్రాంగం ఇప్పటికే అప్రమత్తమైందని వాతావరణ శాఖ పేర్కొంది.
మరోవైపు ఆంధ్రప్రదేశ్లోనూ వాతావరణం వేగంగా మారుతోందని ఏపీ విపత్తుల నిర్వహణ సంస్థ (APSDMA) మేనేజింగ్ డైరెక్టర్ ప్రఖర్ జైన్ తెలిపారు. ముఖ్యంగా ఉత్తరాంధ్ర సహా పలు కోస్తా జిల్లాల్లో అల్పపీడన తీవ్రత అధికంగా ఉండనుంది. అల్లూరి సీతారామరాజు, ఏలూరు, శ్రీకాకుళం, విజయనగరం, పార్వతీపురం మన్యం, పల్నాడు ఇంకా పోలవరం పరివాహక ప్రాంతాల్లో ఒకటి రెండు చోట్ల భారీ నుండి అతి భారీ వర్షాలు కురిసే అవకాశం ఉందన్నారు. రాష్ట్రంలోని మిగిలిన ప్రాంతాల్లో తేలికపాటి నుండి మోస్తరు జల్లులు పడే సూచనలు ఉన్నాయి.
ఈ అల్పపీడన తీవ్రత కారణంగా ఆంధ్రప్రదేశ్ తీరం వెంబడి గంటకు 40 నుండి 50 కిలోమీటర్ల వేగంతో బలమైన ఈదురుగాలులు వీచే అవకాశం ఉందని అధికారులు హెచ్చరించారు. సముద్రం తీవ్ర అలజడిగా మారనుండటంతో మత్స్యకారులు ఎవరూ కూడా వేటకు వెళ్లరాదని కచ్చితమైన ఆదేశాలు జారీ చేశారు. వర్షాలు పడే సమయంలో ఉరుములు, మెరుపులతో పాటు పిడుగులు పడే ప్రమాదం ఎక్కువగా ఉన్నందున ప్రజలు బహిరంగ ప్రదేశాల్లో, చెట్ల కింద, విద్యుత్ స్తంభాల వద్ద నిలబడకుండా సురక్షితమైన భవనాల్లో ఆశ్రయం పొందాలని విపత్తుల నిర్వహణ సంస్థ సూచించింది.