Uttam Kumar Reddy: తెలంగాణ జీవనాడి కృష్ణా నదీ జలాల హక్కులపై రాష్ట్ర శాసనసభ వేదికగా ప్రభుత్వం తన గళాన్ని వినిపించింది. నదీ పరివాహక ప్రాంతం అత్యధికంగా ఉన్న తెలంగాణకు కృష్ణా జలాల్లో సింహభాగం దక్కాలన్నదే తమ లక్ష్యమని సాగునీటి శాఖ మంత్రి ఉత్తమ్ కుమార్ రెడ్డి స్పష్టం చేశారు. ఈ సందర్భంగా గత బీఆర్ఎస్ ప్రభుత్వ వైఫల్యాలను ఎండగడుతూ, ప్రస్తుత ప్రభుత్వం అనుసరిస్తున్న వ్యూహాన్ని ఆయన పవర్ పాయింట్ ప్రజెంటేషన్ ద్వారా సభ ముందుంచారు.
గత ప్రభుత్వ అనాలోచిత నిర్ణయాలే శాపమా?
కృష్ణా జలాల విషయంలో గత పదేళ్లలో తెలంగాణకు తీవ్ర అన్యాయం జరిగిందని మంత్రి ఉత్తమ్ ఆరోపించారు. 2016 అపెక్స్ కౌన్సిల్ సమావేశంలో తెలంగాణకు కేవలం 299 టీఎంసీలు, ఆంధ్రప్రదేశ్కు 512 టీఎంసీల వాటాకు అప్పటి ముఖ్యమంత్రి కేసీఆర్ అంగీకరించి రాష్ట్రానికి మరణశాసనం రాశారని ఆయన మండిపడ్డారు. తెలంగాణ హక్కులను తాకట్టు పెట్టి ఏపీకి అనుకూలంగా నిర్ణయాలు తీసుకున్నారని, ప్రస్తుత వివాదాలన్నింటికీ ఆ సంతకాలే మూలమని విమర్శించారు.
పాలమూరు – రంగారెడ్డి: ఉద్దేశపూర్వక జాప్యం?
దక్షిణ తెలంగాణకు వరప్రదాయిని అయిన పాలమూరు-రంగారెడ్డి ఎత్తిపోతల పథకంపై మంత్రి పలు కీలక అంశాలను లేవనెత్తారు.
- సోర్స్ మార్పు: జూరాల నుంచి తీసుకోవాల్సిన నీటిని కావాలనే శ్రీశైలానికి మార్చడం వల్ల ప్రాజెక్టు అంచనా వ్యయం రూ.84 వేల కోట్లకు పెరిగిందని వెల్లడించారు.
- సాంకేతిక సవాళ్లు: జూరాల వద్ద 414 మీటర్ల ఎత్తు నుంచి 22 పంపులతో నీటిని తోడే అవకాశం ఉండగా, శ్రీశైలం వద్దకు మార్చడం వల్ల 560 మీటర్ల ఎత్తుకు, 37 పంపుల అవసరం ఏర్పడిందని వివరించారు.
- అసంపూర్తి పనులు: 90 శాతం పనులు పూర్తయ్యాయని గత ప్రభుత్వం ప్రచారం చేసినా, క్షేత్రస్థాయిలో కేవలం 35 శాతం పనులే జరిగాయని, కాలువల కోసం భూసేకరణ కూడా పూర్తి చేయలేదని ఆయన పేర్కొన్నారు.
ట్రిబ్యునల్ ముందు బలమైన వాదనలు
బ్రిజేష్ కుమార్ ట్రిబ్యునల్ ముందు తెలంగాణ ప్రభుత్వం తన వాదనలను అత్యంత పటిష్టంగా వినిపిస్తోందని మంత్రి తెలిపారు.
కృష్ణా నదీ పరివాహక ప్రాంతంలో 73 శాతానికి పైగా తెలంగాణలోనే ఉంది.ప్రస్తుతమున్న 814 టీఎంసీల నీటిలో తెలంగాణకు 71 శాతం (సుమారు 783 టీఎంసీలు) వాటా కావాలని కేంద్ర ప్రభుత్వాన్ని కోరుతున్నాం. రాయలసీమ ఎత్తిపోతల పథకాన్ని అడ్డుకోవడంలో గత ప్రభుత్వం విఫలమైనా, కాంగ్రెస్ ప్రభుత్వం రాగానే కేంద్రానికి ఫిర్యాదు చేసి ఆ పనులను నిలిపివేయించామని ఆయన వెల్లడించారు.
బాధ్యత నుంచి తప్పుకున్న ప్రతిపక్షం
రాష్ట్ర ప్రయోజనాలపై జరుగుతున్న ఇంతటి కీలక చర్చకు బీఆర్ఎస్ సభ్యులు హాజరుకాకపోవడాన్ని ప్రభుత్వం తీవ్రంగా తప్పుబట్టింది. ఇరిగేషన్ పేరుతో రూ.1.83 లక్షల కోట్లు ఖర్చు చేసినా, చెప్పుకోదగ్గ స్థాయిలో కొత్త ఆయకట్టును ఎందుకు సృష్టించలేకపోయారో ప్రజలకు సమాధానం చెప్పాల్సిన బాధ్యత వారిపై ఉందన్నారు. కాంగ్రెస్ ప్రభుత్వం అధికారంలోకి వచ్చిన తక్కువ కాలంలోనే పాలమూరు-రంగారెడ్డి కోసం రూ.7 వేల కోట్లు ఖర్చు చేసిందని, పెండింగ్ బిల్లులను కూడా చెల్లిస్తోందని ఆయన తెలిపారు.