Kishan Reddy: తెలంగాణ రాబడిలో సింహభాగం అందిస్తున్న హైదరాబాద్ నగరం అభివృద్ధి విషయంలో తీవ్ర నిర్లక్ష్యానికి గురవుతోందని కేంద్ర బొగ్గు, గనుల శాఖ మంత్రి, సికింద్రాబాద్ ఎంపీ జి. కిషన్ రెడ్డి తీవ్ర ఆగ్రహం వ్యక్తం చేశారు. రాష్ట్రాదాయంలో ఏకంగా 70 శాతం సమకూరుస్తున్న నగరానికి, అందులో 5 శాతం నిధులు కూడా ఖర్చు చేయడం లేదని ఆయన ఆరోపించారు.
శనివారం హైదరాబాద్లో విలేకరుల సమావేశంలో మాట్లాడిన ఆయన.. సీఎం రేవంత్ రెడ్డి నేతృత్వంలోని కాంగ్రెస్ ప్రభుత్వంపై, గత బీఆర్ఎస్ పాలనపై ఘాటు విమర్శలు చేశారు.
పాత నగర ప్రాంతాలను పట్టించుకోరా?.. కిషన్ రెడ్డి ప్రశ్నాస్త్రాలు
హైదరాబాద్ అభివృద్ధి పేరుతో కేవలం ఐటీ కారిడార్లకే ప్రాధాన్యం ఇస్తూ మిగిలిన ప్రాంతాలను విస్మరిస్తున్నారని కిషన్ రెడ్డి మండిపడ్డారు..
-
ఐటీ హబ్పైనే ప్రేమ: గత బీఆర్ఎస్ ప్రభుత్వం, ప్రస్తుత కాంగ్రెస్ ప్రభుత్వం రెండూ కూడా హైటెక్ సిటీ, కొండాపూర్, మాదాపూర్ వంటి ఐటీ ప్రాంతాల అభివృద్ధిపైనే శ్రద్ధ చూపుతున్నాయని విమర్శించారు.
-
అసలైన హైదరాబాద్ నిర్లక్ష్యం: అసలైన పాత హైదరాబాద్ నియోజకవర్గాలైన సనత్నగర్, సికింద్రాబాద్, ముషీరాబాద్, అంబర్పేట్, ఖైరతాబాద్ వంటి ప్రాంతాలను పాలకులు పూర్తిగా పట్టించుకోవడం లేదని ఆరోపించారు.
-
జీహెచ్ఎంసీ జీతాలకు తిప్పలు: నగర మౌలిక వసతులను పర్యవేక్షించాల్సిన జీహెచ్ఎంసీ (GHMC), జలమండలి (Water Works) తీవ్ర ఆర్థిక లోటులో కూరుకుపోయాయని, చివరకు ఉద్యోగులకు జీతాలు కూడా చెల్లించలేని స్థితికి చేరుకున్నాయని ఆవేదన వ్యక్తం చేశారు.
సీఎం రేవంత్ రెడ్డికి విజ్ఞప్తి!
పురపాలక శాఖ బాధ్యతలను కూడా పర్యవేక్షిస్తున్న ముఖ్యమంత్రి రేవంత్ రెడ్డికి కిషన్ రెడ్డి ఒక విజ్ఞప్తి చేశారు..
హైదరాబాద్ సంపాదిస్తున్న రాబడిని అంతా ఇక్కడే కాకుండా వేరే చోట్లకు తరలిస్తున్నారు. అందుకే హైదరాబాద్ నగరం ద్వారా వచ్చే మొత్తం రాబడిలో కనీసం 50 శాతం నిధులను ఇక్కడి మౌలిక వసతులు, పాత నగర ప్రాంతాల అభివృద్ధికి పునఃకేటాయించాలి..— జి. కిషన్ రెడ్డి (కేంద్ర మంత్రి, సికింద్రాబాద్ ఎంపీ)
నగరంలో వర్షాలు పడినప్పుడు మురుగునీటి వ్యవస్థ, రోడ్ల దుస్థితి దారుణంగా మారుతోందని, వెంటనే ప్రభుత్వం బడ్జెట్లో నగరానికి తగిన ప్రాధాన్యత ఇవ్వాలని డిమాండ్ చేశారు.