Mahesh Kumar Goud: కేంద్రంలోని నరేంద్ర మోదీ, అమిత్ షా వైఖరితో దేశంలో ప్రజాస్వామ్యం తీవ్ర ముప్పులో పడిందని, భారత ఎన్నికల సంఘం పూర్తిగా బీజేపీ అనుబంధ సంస్థలా మారిపోయిందని తెలంగాణ ప్రదేశ్ కాంగ్రెస్ కమిటీ (టీపీసీసీ) అధ్యక్షుడు, ఎమ్మెల్సీ బి. మహేష్ కుమార్ గౌడ్ తీవ్రస్థాయిలో ధ్వజమెత్తారు. ప్రధాన ఎన్నికల కమిషనర్ (సీఈసీ) జ్ఞానేష్ కుమార్ ఏకపక్ష నిర్ణయాలు తీసుకుంటున్నారని ఆరోపిస్తూ.. ఆయనను తక్షణమే పదవి నుంచి తొలగించి, సమగ్ర విచారణ చేపట్టాలని డిమాండ్ చేశారు. జ్ఞానేష్ కుమార్ను తొలగించేంత వరకు కాంగ్రెస్ పార్టీ విశ్రమించబోదని హెచ్చరించారు. సోమవారం హైదరాబాద్లో కాంగ్రెస్ ముఖ్య నేతలతో కలిసి నిర్వహించిన మీడియా సమావేశంలో మహేష్ కుమార్ గౌడ్ మాట్లాడారు.
బీజేపీకి తొత్తుగా మారిన ఎన్నికల సంఘం..
ఈ మీడియా సమావేశంలో రాష్ట్ర ఉప ముఖ్యమంత్రి భట్టి విక్రమార్క, మంత్రులు దుద్దిళ్ల శ్రీధర్ బాబు, పొన్నం ప్రభాకర్, ఎంపీలు వివేక్ వెంకటస్వామి, అనిల్ కుమార్ యాదవ్, చామల కిరణ్ కుమార్ రెడ్డి, మాజీ ఎంపీ మహ్మద్ అజారుద్దీన్, మాజీ మంత్రి షబ్బీర్ అలీ, ఎమ్మెల్యేలు దానం నాగేందర్, శ్రీ గణేష్, నవీన్ యాదవ్లతో పాటు పలువురు డీసీసీ అధ్యక్షులు, సీనియర్ నాయకులు పాల్గొన్నారు.