Rana Daggubati: విశాఖపట్నం త్వరలోనే తెలుగు సినీ పరిశ్రమకు, డిజిటల్ కంటెంట్ క్రియేటర్లకు మరో అతిపెద్ద అడ్డాగా మారబోతోంది! ఇప్పటివరకు కేవలం షూటింగ్ స్పాట్‌గా మాత్రమే ఉన్న వైజాగ్‌ను.. సినిమాలు, వెబ్ సిరీస్‌లు, గేమింగ్, యానిమేషన్ మరియు క్రియేటర్ ఎకానమీకి ప్రధాన కేంద్రంగా తీర్చిదిద్దాలని ఆంధ్రప్రదేశ్ ప్రభుత్వం కీలక అడుగులు వేస్తోంది. విశాఖ వేదికగా జరిగిన సీఐఐ భాగస్వామ్య సదస్సు 2026 (CII Partnership Summit) లో ఐటీ, విద్యాశాఖ మంత్రి నారా లోకేశ్, ప్రముఖ నటుడు, నిర్మాత రానా దగ్గుబాటి పాల్గొన్న లైవ్ పాడ్‌కాస్ట్ ఈ భారీ మార్పుకు వేదికైంది!
హైదరాబాద్ తరహాలోనే వైజాగ్‌లో ఫిల్మ్ & క్రియేటర్ ఎకోసిస్టమ్ – నారా లోకేశ్ విజన్..
కేవలం సినిమాలకు రాయితీలు ఇవ్వడమే కాకుండా, విశాఖలో ఒక సమగ్రమైన ఎంటర్‌టైన్‌మెంట్ ఎకోసిస్టమ్ (Entertainment Ecosystem) నిర్మించాలని మంత్రి నారా లోకేశ్ పిలుపునిచ్చారు.
-
ఒకే గొడుగు కిందకు సదుపాయాలు: స్టూడియోలు, షూటింగ్ లొకేషన్లు, పోస్ట్-ప్రొడక్షన్ ల్యాబ్స్‌తో పాటు అనుబంధ క్రియేటివ్ వ్యాపారాలన్నీ విశాఖలో అందుబాటులోకి రావాలని లోకేశ్ ఆకాంక్షించారు. గతంలో హైదరాబాద్‌లో స్టూడియోలు, ఫిల్మ్ నగర్ నిర్మాణంతో అది దేశంలోనే అతిపెద్ద సినీ కేంద్రంగా ఎదిగిన తీరును గుర్తుచేస్తూ.. ప్రభుత్వ ప్రోత్సాహంతో వైజాగ్‌లోనూ అదే మోడల్‌ను విజయవంతంగా అమలు చేయవచ్చని తెలిపారు.
-
క్రియేటర్ ఎకానమీకి (Creator Economy) పెద్దపీట: నేటి కాలంలో యూట్యూబ్ ప్రొడక్షన్స్, డిజిటల్ మీడియా, గేమింగ్ రంగాలు ఆర్థిక వృద్ధికి కొత్త ఇంజిన్లుగా మారాయని లోకేశ్ పేర్కొన్నారు. స్మార్ట్‌ఫోన్లు, కొత్త టెక్నాలజీ వల్ల యువ కంటెంట్ క్రియేటర్లకు అడ్డంకులు తొలగిపోయాయని, స్థానిక టాలెంట్‌ను ప్రోత్సహించడానికి ఏపీ ప్రభుత్వం మౌలిక సదుపాయాలు, పూర్తి మద్దతు అందిస్తుందని స్పష్టం చేశారు.
రాబోయే ఏడాదిలో వైజాగ్‌లో మా ప్రొడక్షన్ పనులు మొదలుపెడతాం!.. రానా దగ్గుబాటి..
మంత్రి లోకేశ్ ప్రతిపాదనకు రానా దగ్గుబాటి ఎంతో ఉత్సాహంగా స్పందిస్తూ కీలక హామీలు ఇచ్చారు.
-
వైజాగ్‌లో సినీ నిర్మాణం: “రాబోయే ఏడాదిలో విశాఖపట్నంలో మా సంస్థ తరఫున సినీ నిర్మాణ కార్యకలాపాలు ప్రారంభమయ్యేలా కృషి చేస్తాను. విశాఖ నిజంగా ‘సిటీ ఆఫ్ డెస్టినీ’.. ఈ నగరానికి ఒక ప్రత్యేకమైన ఆకర్షణ ఉంది. ఏపీ ప్రభుత్వంతో కలిసి పనిచేసేందుకు ఎంతో ఆసక్తిగా ఎదురుచూస్తున్నాను” అని రానా ప్రకటించారు.
-
డిజిటల్ క్రియేటర్లకు అండగా: కేవలం సినిమాలకే కాకుండా డిజిటల్, ఇతర ఆధునిక ఫార్మాట్లలో పనిచేసే క్రియేటర్లకు అనుకూలమైన వాతావరణాన్ని విశాఖలో నిర్మించేందుకు ప్రభుత్వంతో కలిసి పనిచేస్తానని రానా హామీ ఇచ్చారు.
-
ఏపీ టూరిజానికి ఇంటర్నేషనల్ ప్రమోషన్: ఆంధ్రప్రదేశ్‌లో ప్రపంచానికి ఇంకా పూర్తిగా పరిచయం కాని ఎన్నో అద్భుతమైన పర్యాటక, చారిత్రక ప్రదేశాలు ఉన్నాయని, వాటికి అంతర్జాతీయ స్థాయిలో గుర్తింపు తెచ్చేలా తమ వంతు ప్రచారం కల్పిస్తామని రానా తెలిపారు.