Jyothsna: తిరుపతి మున్సిపల్ కార్పొరేషన్ ఎన్నికల ప్రచారం రోజురోజుకూ రసవత్తరంగా మారుతోంది. పోలింగ్ సమీపిస్తున్న తరుణంలో ప్రధాన పార్టీల అభ్యర్థులు ఓటర్లను ప్రసన్నం చేసుకునేందుకు ముమ్మర ప్రయత్నాలు చేస్తున్నారు. ఇందులో భాగంగా 11వ డివిజన్ ఎన్డీఏ కూటమి (టీడీపీ) కార్పొరేటర్ అభ్యర్థి బి. జ్యోత్స్న డివిజన్ పరిధిలో విస్తృతంగా ఇంటింటి ప్రచారం నిర్వహించారు. మేయర్ అభ్యర్థి జేబీ శ్రీనివాస్‌తో పాటు తనను భారీ మెజారిటీతో గెలిపించాలని ఆమె స్థానిక ప్రజలను అభ్యర్థించారు.
ప్రచారంలో భాగంగా ఆమె మాట్లాడుతూ.. గత రెండు రోజులుగా డివిజన్‌లో పర్యటిస్తున్నప్పుడు స్థానికులు ప్రధానంగా డ్రైనేజీ వ్యవస్థ అధ్వానంగా ఉందని, రోడ్లు పూర్తిగా దెబ్బతిన్నాయని తమ దృష్టికి తీసుకొచ్చారని తెలిపారు. గతంలో 2014-2019 టీడీపీ హయాంలోనే తిరుపతి నగరంలో దాదాపు ₹450 కోట్లతో స్మార్ట్ సిటీ ప్రాజెక్టులు, ఫ్లైఓవర్లు, ఆధునిక మున్సిపల్ కార్యాలయ భవనం వంటి ఎన్నో అభివృద్ధి పనులు జరిగాయని గుర్తుచేశారు. రాష్ట్రంలో కూటమి ప్రభుత్వం అధికారంలోకి వచ్చిన వెంటనే సీఎం నారా చంద్రబాబు నాయుడు తిరుపతి మున్సిపల్ కార్పొరేషన్ అభివృద్ధి కోసం ఇప్పటికే ₹106 కోట్లు మంజూరు చేశారని పేర్కొన్నారు.
తాము విజయం సాధించిన వెంటనే ఈ నిధులను సద్వినియోగం చేసుకుంటూ 11వ డివిజన్‌లోని డ్రైనేజీ, రహదారుల సమస్యలకు శాశ్వత పరిష్కారం చూపుతామని జ్యోత్స్న హామీ ఇచ్చారు. తిరుపతిని రాష్ట్రంలోనే నంబర్ 1 స్మార్ట్ సిటీగా మార్చడమే కూటమి లక్ష్యమని, అభివృద్ధి పథంలో ముందుకు సాగేందుకు ఓటర్లంతా సైకిల్ గుర్తుపై ఓటు వేసి తమను ఆశీర్వదించాలని ఆమె విజ్ఞప్తి చేశారు.